ប៉ាគីស្ថាននិងឥណ្ឌាចោទប្រកាន់គ្នាទៅវិញទៅមកនៅអ.ស.ប.ថា “ជ្រុលនិយម”
នៅលើវេទិកាអង្គមហាសន្និបាតអង្គការប្រជាជាតិ នាយករដ្ឋមន្ត្រីប៉ាគីស្ថាន លោក អ៊ីមរ៉ាន ខាន់ បានថ្លែងចោទប្រកាន់ប្រទេសឥណ្ឌាថាជាអ្នកសាបព្រោះអំពើភ័យខ្លាចលើអ្នកកាន់សាសនាអ៊ីស្លាម។ សុន្ទរកថាដែលបានប្រទាក់ឱ្យប្រតិភូឥណ្ឌាមានប្រតិកម្មយ៉ាងខ្លាំងក្លាតបវិញ។ ហើយទន្ទឹមពេលជាមួយគ្នានោះ លោកនាយករដ្ឋមន្ត្រីឥណ្ឌាបានស្នើសុំឱ្យអាមេរិកត្រួតពិនិត្យនិងតាមដាន យ៉ាងល្អិតល្អន់ តួនាទីរបស់ប៉ាគីស្ថាននៅអាហ្វហ្កានីស្ថាន និងតួនាទីប៉ាគីស្ថានក្នុងបញ្ហាភេរវនិយម។
ចុះផ្សាយនៅថ្ងៃ៖
ស្តាប់ - ០១:៥៩
កំហឹងរបស់អតីតបងប្អូនជាគូសត្រូវនឹងគ្នា មិនរលត់ទេ។ នៅថ្ងៃសុក្រទី ២៤កញ្ញា ក្នុងឱកាសមហាសន្និបាតអង្គការប្រជាជាតិ លោកនាយករដ្ឋមន្ត្រីប៉ាគីស្ថាន អ៊ីមរ៉ាន់ខាន់បានថ្លែងចោទប្រកាន់លោកនាយករដ្ឋមន្ត្រីឥណ្ឌា លោក ណារិនដ្រា ម៉ូឌី ថាចង់លុបបំបាត់ពូជអ្នកកាន់សាសនាអ៊ីស្លាមឱ្យអស់ពីឥណ្ឌា។ ជាការស្អប់ខ្ពើមអ៊ីស្លាមដ៏អាក្រក់និងធំបំផុត នៅឥណ្ឌា និង មកលើប្រជាពលរដ្ឋអ៊ីស្លាមចំនួន២០០លាននាក់នៅឥណ្ឌា។ តាំងពីឆ្នាំ២០១៩ ក្រោយពេលឥណ្ឌាបានដកស្វ័យភាពតំបន់កាស្មៀរឥណ្ឌា ដែលជាតំបន់ជាប់ជម្លោះជាមួយប៉ាគីស្ថានមក ប្រជាពលរដ្ឋរស់ក្នុងតំបន់កាស្មៀរដែលភាគច្រើនជាអ្នកកាន់សាសនាអ៊ីស្លាម បានរងការគាបសង្កត់កាន់តែខ្លាំងឡើង។ នេះបើតាមប្រសាសន៍អនឡាញរបស់លោកអ៊ីមរ៉ាន ខាន់ ដែលបានថែមទាំងចោទប្រកាន់សហរដ្ឋអាមេរិកថាបានបិទភ្នែកបណ្តោយឱ្យមានការរំលោភសិទ្ធិមនុស្សនៅឥណ្ឌា។
ជាប្រតិកម្មទាន់ហន់ ឥណ្ឌាបានធ្វើការចោទប្រកាន់ប៉ាគីស្ថានវិញភ្លាមថា ប៉ាគីស្ថានបានផ្តល់ជម្រកឱ្យអូសាម៉ាប៊ិនឡាដិន និងបានចិញ្ចឹមក្រុមភេរវជន ដើម្បីធ្វើបាបប្រទេសជិតខាង។ ឥណ្ឌាក៏បានគាស់រំលើកថាប៉ាគីស្ថានធ្លាប់ប្រព្រឹត្តអំពើហិង្សាលើជនជាតិភាគតិចនៅប៉ាគីស្ថាន និងអំពើប្រល័យពូជសាសន៍វប្បធម៌និងសាសនា កាលពីឆ្នាំ១៩៧១ ពេលបង់ក្លាដែលបានឯករាជ្យ។
បន្ទាប់មកត្រូវជួបសន្ទនាជាមួយលោក ចូ បៃដិនផង សុន្ទរកថារបស់លោកនាយករដ្ឋមន្ត្រីប៉ាគីស្ថានប្រព្រឹត្តទៅជួនចំពេលដែលលោកនាយករដ្ឋមន្ត្រីឥណ្ឌា ណារិនដ្រា ម៉ូឌី កំពុងមានជំនួបជាមួយលោកប្រធានាធិបតីអាមេរិក ចូបៃដិន នៅសេតវិមាន។ លោកម៉ូឌី បានបង្ហាញក្តីព្រួយបារម្ភចំពោះតួនាទីរបស់ប៉ាគីស្ថាននៅអាហ្វហ្កានីស្ថាន ដោយចង់ឱ្យអាមេរិកត្រួតពិនិត្យនិងតាមដានយ៉ាងល្អិតល្អន់ តួនាទីរបស់ប៉ាគីស្ថាននៅអាហ្វហ្កានីស្ថាន និងតួនាទីរបស់ប៉ាគីស្ថានក្នុងបញ្ហាភេរវនិយម។
ទាក់ទងនឹងប្រទេសអាហ្វហ្កានីស្ថាននេះ ធ្លាប់ជាអ្នកគាំទ្ររបបតាលីបង់ពីឆ្នាំ១៩៩៦-២០០១ លោកនាយករដ្ឋមន្ត្រីប៉ាគីស្ថានបានការពារខ្លួនថា តាលីបង់បានសន្យាគោរពសិទ្ធិមនុស្ស បានលើកទឹកចិត្តសហគមន៍អន្តរជាតិពីវេទិកាអង្គការសហប្រជាជាតិ ឱ្យចូលចរចាជាមួយនឹងពួកតាលីបង់ ដើម្បីពង្រឹងស្ថិរភាពរដ្ឋាភិបាលបច្ចុប្បន្នផងដើម្បីប្រជាពលរដ្ឋអាហ្វហ្កានីស្ថានផង។
អ្នកទទួលខុសត្រូវអាមេរិកបានចោទប្រកាន់ភ្នាក់ងារចារកិច្ចប៉ាគីស្ថានថានៅតែបន្តគាំទ្រពួកតាលីបង់។ រដ្ឋបាលអាមេរិកមុនបានកាត់ផ្តាច់រាល់គ្រប់ជំនួយយោធាទៅប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ