ឥណ្ឌានិងប៉ាគីស្ថាន ជួបគ្នាដោយស្ងាត់ៗនៅឌូបៃ ដើម្បីដោះស្រាយជម្លោះព្រំដែននៅកាស្មៀរ
មន្ត្រីជាន់ខ្ពស់នៃភ្នាក់ងារចារកិច្ចឥណ្ឌា និងប៉ាគីស្ថាន ទំនងជាបានជួបចរចាគ្នាដោយស្ងាត់នៅក្រុងឌូបៃ និងក្រោមការសម្របសម្រួលរបស់អារ៉ាប៊ីសាអូឌីត កាលពីខែមករា ដើម្បីសម្រកភាពតានតឹងយោធា នៅតាមព្រំដែន ក្នុងតំបន់កាស្មៀរ។ នេះបើតាមប្រភពស្និទ្ធនឹងសំណុំរឿងដែលទើបអះអាងប្រាប់ទីភ្នាក់ងារសារព័ត៌មានReuters កាលពីថ្ងៃទី ១៤មេសា ម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ប្រទេសជិតខាងមានអាវុធនុយក្លេអ៊ែរដូចគ្នាទាំងពីរ គឺឥណ្ឌានិងប៉ាគីស្ថានលែងនិយាយរកគ្នា តាំងពីឆ្នាំ២០១៩មក។ ក្រោយភេរវកម្មអត្តឃាតប្រឆាំងក្បួនទ័ពឥណ្ឌានៅតំបន់កាស្មៀរ និងបន្ទាប់ពីនាយករដ្ឋមន្ត្រី ឥណ្ឌាបានសម្រេចដកស្វ័យតភាពតំបន់កាស្មៀរនោះមក ទំនាក់ទំនងការទូតធ្លាក់ដុនដាបខ្លាំង ទំនាក់ទំនងពាណិជ្ជកម្មត្រូវព្យួរ ...
ប៉ុន្តែថ្មីៗនេះ រដ្ឋាភិបាលទាំងពីរ បានបើកផ្លូវទូត ដើម្បីស្តារទំនាក់ទំនងឱ្យវិលត្រលប់មកភាពធម្មតាឡើងវិញ តាមរយៈការជួបពិភាក្សាដោយស្ងាត់ៗនៅក្នុងប្រទេសទីបី។ បើតាមប្រភពព័ត៌មានដែលទីភ្នាក់ងាររ៉យទ័រទទួលបាន ភ្នាក់ងារចារកិច្ចឥណ្ឌានិងប៉ាគីស្ថានបានជួបគ្នាជាច្រើនលើកនិងតាំងពីជាច្រើនខែមកហើយ នៅថៃ នៅក្រុងឡុងដ៍ ឬនៅឌូបៃ។ ប៉ុន្តែពុំមានការជូនដំណឹងជាសាធារណៈទេ ព្រោះសភាពការណ៍អាចប្រែក្រឡាស់បាននៅឡើយ។
ក្រោយជំនួបចរចានៅឌូបៃកាលពីខែមករា ឥណ្ឌានិងប៉ាគីស្ថានបានសម្រេចបិទបញ្ចប់ ការប្រយុទ្ធគ្នាដោយអាវុធនៅតាមបន្ទាត់ព្រំដែនជាប់ជម្លោះនៃតំបន់កាស្មៀរ។ បទឈប់បាញ់មានចូលជាធរមានមកទល់ពេលនេះ។ ប្រទេសជិតខាងទាំងពីរក៏បានលើកឡើងអំពីផែនការរៀបចំការបោះឆ្នោតនៅតំបន់កាស្មៀរនៅឆ្នាំនេះ ដើម្បីផ្សះផ្សាតំបន់ដែលហែកហួរបង្ហូរឈាមអស់រយៈពេលជាង៧៤ឆ្នាំមកហើយ ដោយប៉ាគីស្ថានឈប់ស្រែកប្រឆាំងនឹងការបញ្ចប់ស្វ័យភាពតំបន់កាស្មៀរឥណ្ឌា ចំណែកឥណ្ឌាឈប់ចោទប៉ាគីស្ថានថាបង្កអំពើហិង្សាតាមព្រំដែន។ នេះបើតាមប្រភពដដែល។
ក្រសួងការបរទេសឥណ្ឌាបដិសេធមិនធ្វើអត្ថាធិប្បាយចំពោះជំនួបដោយស្ងាត់ៗនេះទេ។ ចំណែកក្រសួងការពារជាតិប៉ាគីស្ថានក៏មិនឆ្លើយនឹងសំណួររបស់អ្នកកាសែតជុំវិញសំណុំរឿងនេះដែរ។ ប៉ុន្តែបើតាមអ្នកវិភាគ ប៉ាគីស្ថាន និងឥណ្ឌា មានហេតុផលចាំបាច់ត្រូវតែខិតរកគ្នាវិញ។ ឥណ្ឌាមានបញ្ហាព្រំដែនជាមួយចិនជាប់គាំងស្តូកស្តឹង តាំងពីឆ្នាំមុនមក មិនចង់ឱ្យយោធាបើកសមរភូមិមួយទៀតនៅខាងប៉ាគីស្ថានទេ។ ចំណែកប៉ាគីស្ថាន កំពុងលង់ក្នុងវិបត្តិសេដ្ឋកិច្ច រស់បានដោយជំនួយសង្គ្រោះរបស់មូលនិធិរូបិយវត្ថុ ក៏មិនអាចបណ្តោយឱ្យមានការតតាំងនៅតំបន់កាស្មៀរអូសបន្លាយបានដែរ។ ម្យ៉ាងទៀតប៉ាគីស្ថានត្រូវគិតគូររក្សាស្ថិរភាពនៅប៉ែកខាងលិចទៀត នៅពេលកងទ័ពអាមេរិកត្រូវដកចេញពីអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ