ការសិក្សាបង្ហាញថាការកាប់បំផ្លាញព្រៃឈើនៅឥណ្ឌូណេស៊ីធ្វើឲ្យអត្រាស្លាប់ដោយកម្តៅកើនឡើង
ការកាប់បំផ្លាញព្រៃឈើ នៅក្នុងខេត្តមួយក្នុងប្រទេសឥណ្ឌូណេស៊ី បានធ្វើឲ្យសីតុណ្ហភាពមធ្យមប្រចាំថ្ងៃកើនឡើងរហូតដល់ទៅប្រមាណជា ១អង្សា ក្នុងរយៈពេលត្រឹមតែ ១៦ឆ្នាំ។ នេះបើតាមការសិក្សាចេញផ្សាយ កាលពីថ្ងៃពុធ ដោយនៅក្នុងនោះ គេបានរកឃើញថា កំណើនសីតុណ្ហភាពនេះបានធ្វើឲ្យអត្រាមនុស្សស្លាប់ នៅក្នុងតំបន់ត្រូវកើនឡើង ៨%។
ចុះផ្សាយនៅថ្ងៃ៖
នៅក្នុងការសិក្សាចុះផ្សាយក្នុងទស្សនាវដ្តីដ៏ល្បីល្បាញជំនាញខាងវិស័យសុខាភិបាល (Lancet Planetary Health) អ្នកស្រាវជ្រាវ ដែលបានវិភាគទៅលើទិន្នន័យបានមកពីផ្កាយរណប បានរកឃើញថា ការកាប់បំផ្លាញព្រៃឈើប្រមាណជាង ៤ពាន់គីឡូម៉ែត្រការ៉េ ក្នុងចន្លោះពីឆ្នាំ២០០២ ដល់ឆ្នាំ២០១៨ បានធ្វើឲ្យសីតុណ្ហភាពមធ្យមប្រចាំថ្ងៃ នៅក្នុងតំបន់ប៉ែកខាងកើតកោះ Borneo ប្រទេសឥណ្ឌូណេស៊ីត្រូវកើនឡើងរហូតដល់ទៅ ០,៩៥អង្សា។ កំណើនសីតុណ្ហភាពនេះ គឺបន្ថែមពីលើការឡើងកម្តៅផែនដីទូទៅ ដែលមានស្រាប់ ប្រមាណជាង ១អង្សា រាប់ចាប់តាំងពីបដិវត្តន៍ឧស្សាហកម្ម។
អ្នកជំនាញដែលទទួលខុសត្រូវលើការសិក្សានេះបានកត់សម្គាល់ថា កំណើនសីតុណ្ហភាពរហូតដល់ទៅជិត ១អង្សា ក្នុងរយៈពេលតែ ១៦ឆ្នាំបែបនេះ គឺជាការកើនឡើងដ៏គំហុកមិនគួរឲ្យជឿ ប្រសិនបើគេប្រៀបធៀបទៅនឹងសីតុណ្ហភាពមធ្យមលើភពផែនដីទាំងមូល ដែលកើនឡើងប្រមាណជា ១អង្សាដែរ ក៏ប៉ុន្តែ ជាកំណើនដែលកើតមាន ក្នុងរយៈពេលរហូតដល់ទៅ ១៥០ឆ្នាំ។
បន្ថែមពីលើទិន្នន័យស្តីពីកំណើនសីតុណ្ហភាពដោយការកាប់បំផ្លាញព្រៃឈើនេះ អ្នកស្រាវជ្រាវបានសិក្សាបន្ថែមទៅលើទិន្នន័យអ្នកស្លាប់ដោយអាកាសធាតុក្តៅខ្លាំង ដោយប្រៀបធៀបគ្នា រវាងចំនួនអ្នកស្លាប់ នៅក្នុងតំបន់ខាងកើតកោះ Borneo និងចំនួនអ្នកស្លាប់នៅតំបន់ផ្សេងទៀតក្នុងប្រទេសឥណ្ឌូណេស៊ីដូចគ្នា ហើយបានរកឃើញថា កំណើនសីតុណ្ហភាពជិត ១អង្សា ដោយសារការកាប់បំផ្លាញព្រៃឈើនេះ បានធ្វើឲ្យចំនួនអ្នកស្លាប់ដោយអាកាសធាតុក្តៅខ្លាំង ត្រូវកើនឡើង រហូតដល់ទៅ ៨%។
គួរកត់សម្គាល់ថា ការសិក្សាចេញផ្សាយនៅថ្ងៃពុធនេះ គឺជាការសិក្សាលម្អិតដ៏កម្រមួយ អំពីផលប៉ះពាល់នៃការកាប់បំផ្លាញព្រៃឈើ និងការឡើងកម្តៅផែនដី ទៅលើសុខភាពរបស់ប្រជាជនដែលរស់នៅក្នុងតំបន់ដែលងាយរងគ្រោះ ក្នុងពេលដែលការសិក្សាកាលពីពេលកន្លងមក ត្រូវបានគេធ្វើឡើងដោយផ្តោតភាគច្រើនទៅលើប្រទេសដែលសម្បូរធនធាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ