ភូមាដោះលែងអ្នកកាសែតជនជាតិអាមេរិក Fenster ហើយបណ្តេញចេញពីប្រទេស
បន្ទាប់ពីជាប់ឃុំឃាំងអស់ជិត៦ខែ នៅក្នុងពន្ធនាគារ ពីបទធ្វើសកម្មភាពភេរវកម្ម អ្នកកាសែតជនជាតិអាមេរិក Danny Fenster ទើបបានទទួលការដោះលែង នៅថ្ងៃចន្ទទី ១៥វិច្ឆិកា ២០២១នេះ មួយថ្ងៃមុនការបើកសវនាការ ដែលតុលាការអាចផ្តន្ទាទោសឱ្យជាប់ពន្ធនាគារអស់មួយជីវិត។ ជាមួយនឹងការប្រកាសដោះលែង ភូមាបានបណ្តេញDanny Fenster ចេញភ្លាមពីប្រទេស។
ចុះផ្សាយនៅថ្ងៃ៖
ស្តាប់ - ០១:៥៤
Danny Fenster បានរួចផុតពីការឃុំឃាំង ដោយសារតែមានជំនួបចរចាផ្ទាល់មួយទល់នឹងទល់មួយ រវាងប្រមុខដឹកនាំភូមា លោក មីន អ៊ុងឡាំង និងអតីតឯកអគ្គរដ្ឋទូតអាមេរិកប្រចាំអង្គការសហប្រជាជាតិលោក Bill Richardson។ ជាផ្លូវការ លោក Richardson បានអញ្ជើញទៅដល់ប្រទេសភូមា តាំងពីដើមខែវិច្ឆិកា សម្រាប់រយៈពេលពីរសប្តាហ៍ ក្នុងក្របខ័ណ្ឌនៃការបំពេញបេសកកម្មមនុស្សធម៌ទេ តែក៏មានបង្កប់កម្មវត្ថុស្វែងរកសេរីភាពឱ្យអ្នកកាសែតDanny Fensterដែរ។
ជាអ្នកកាសែតបរទេសតែម្នាក់គត់ជាប់ក្នុងពន្ធនាគារនៅភូមា ក្រោយរដ្ឋប្រហារថ្ងៃទី ១កុម្ភៈ Danny Fenster បានចាកចេញភ្លាមពីភូមា ជាមួយលោក Richardson និងត្រូវទៅដល់សហរដ្ឋអាមេរិកនៅថ្ងៃអង្គារទី ១៦វិច្ឆិកា។ លោកបានមកដល់អាស៊ី កាលពីបីឆ្នាំមុន និង ជានិពន្ធនាយក នៃកាសែត Frontier Myanmar ដែលជាកាសែតឯករាជ្យមួយនៅភូមា។ ចាប់ខ្លួនបាននៅព្រលានយន្តហោះ កាលពីថ្ងៃទី២៤ឧសភា២០២១ អាជ្ញាធរសឹកភូមា បានចោទ Danny Fenster ពីបទញុះញង់ឲ្យមានអំពើហិង្សា អសន្តិសុខសង្គម ការបះបោរផ្តាច់ទឹកដី និង ពីបទភេរវកម្ម។ កាលពីសប្តាហ៍មុន តុលាការសឹកភូមាបានកាត់ទោសឱ្យ Danny Fenster ជាប់ពន្ធនាគារចំនួន១១ឆ្នាំ ពីញុះញង់បះបោរប្រឆាំងយោធ ហើយនៅថ្ងៃអង្គារទី ១៦វិច្ឆិកា លោកFenster ត្រូវបង្ហាញខ្លួននៅក្នុងសវនការពីបទភេរវកម្ម ដែលតុលាការអាចផ្តន្ទាទោសលោកឱ្យជាប់ពន្ធនាគារអស់មួយជីវិត។
ប៉ុន្តែ “ដោយមូលហេតុមនុស្សធម៌ ភូមាព្រមលើកលែងទោសឱ្យDanny Fenster”។ នេះជាការគូសបញ្ជាក់នៅក្នុងសេចក្តីថ្លែងការណ៍របស់អាជ្ញាធរភូមា។ ចំណែករដ្ឋមន្ត្រីក្រសួងការបរទេសអាមេរិក លោក អង់តូនី ប្លីងកិន ក៏បានចេញថ្លែងការណ៍អបអរ សេរីភាពរបស់លោក Fenster និងប្រកាសអំពាវនាវសុំសេរីភាពជូនអ្នកជាប់ឃុំឃាំងនៅភូមាដោយអយុត្តិធម៌ផ្សេងទៀត។
ក្រោយរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រីអ៊ុងសានស៊ូជីមក រដ្ឋាភិបាលសឹក ភូមា បានបើកយុទ្ធនាការបង្ក្រាបបង្ហូរឈាមស្លាប់ជនស៊ីវិលជាង១២០០នាក់និងចាប់ខ្លួនក្រុមអ្នកប្រឆាំងជាង៧០០០នាក់ ក្នុងចំណោមនោះ១០០នាក់ជាអ្នកកាសែត ហើយបើតាមសមាគមការពារសិទ្ធិមនុស្សអាស៊ាន Reporting ASEAN មានអ្នកកាសែត៣១នាក់បន្តជាប់ឃុំឃាំងនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ