អង្គការសិទ្ធិមនុស្ស៖ក្រោមសម្ពាធរបស់ចិន ប្រទេសជាច្រើនបានបញ្ជូនជនជាតិតៃវ៉ាន់ទៅឲ្យចិន
អង្គការសិទ្ធិមនុស្សឈ្មោះ Safeguard Defenders បានឲ្យដឹងតាមរយៈរបាយការណ៍មួយនៅថ្ងៃពុធ ទី១ ធ្នូ នេះថា ក្រោមសម្ពាធរបស់រដ្ឋាភិបាលក្រុងប៉េកាំង មានជនជាតិតៃវ៉ាន់ជាប់សង្ស័យជាច្រើនរយនាក់ត្រូវបានប្រទេសជាច្រើនបញ្ជូនទៅកាន់ប្រទេសចិន។ របាយការណ៍របស់ Safeguard Defenders បានសរសេរច្បាស់ៗថា ការធ្វើបត្យាប័នជនជាតិតៃវ៉ាន់ទៅឲ្យចិនបានធ្វើឡើងនៅក្នុងក្របខណ្ឌនៃការតាមប្រម៉ាញ់ជនជាតិតៃវ៉ាន់ក្នុងគោលដៅបំផ្លាញអធិបតេយ្យភាពកោះតៃវ៉ាន់ដែលចិនបានចាត់ទុកជាខេត្តមួយរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៥៥
តាមរបាយការណ៍របស់អង្គការសិទ្ធិមនុស្សឈ្មោះ Safeguard Defenders មានជនជាតិតៃវ៉ាន់យ៉ាងតិច ៦០០នាក់ត្រូវបានគេធ្វើបត្យាប័នទៅកាន់ប្រទេសចិននៅក្នុងចន្លោះឆ្នាំ ២០១៦ និងឆ្នាំ ២០១៩។ ភាគច្រើននៃជនជាតិតៃវ៉ាន់ទាំងនេះជាក្រុមមនុស្សដែលជាប់សង្ស័យក្នុងបទឧក្រិដ្ឋកម្មធ្វើតាមទូរស័ព្ទប្រព្រឹត្តិនៅក្នុងប្រទេសទី៣ និងដែលជនរងគ្រោះស្ថិតនៅក្នុងប្រទេសចិន។ តែអង្គការសិទ្ធិមនុស្ស Safeguard Defenders បានលើកឡើងពីករណីប្រទេសជាច្រើនដែលប្រហែលជាបានធ្វើបត្យាប័នជនជាតិតៃវ៉ាន់ជាច្រើននាក់ដោយបង្ខំទៅឲ្យចិនដីគោកក្រោមសម្ពាធរបស់រដ្ឋាភិបាលក្រុងប៉េកាំង។ នៅក្នុងរបាយការណ៍ Safeguard Defenders បានលើកឈ្មោះប្រទេសអេស្ប៉ាញ អាមេនី កេនយ៉ា កម្ពុជា និងប្រទេសហ្វីលីពីន។
Safeguard Defenders ដែលមានទីស្នាក់ការក្នុងទីក្រុងម៉ាឌ្រីដ ប្រទេសអេស្ប៉ាញបានទាញសញ្ញាអាសន្នថា នៅពេលពួកគេទៅដល់ទឹកដីចិន ជនជាតិតៃវ៉ាន់ទាំងនោះប្រឈមនឹងការគំរាមកំហែងឃុំខ្លួននៅក្រៅប្រព័ន្ធតុលាការ ការធ្វើទារុណកម្ម ការបាត់ខ្លួនដោយបង្ខំ ឬមួយក៏ការបង្ខំឲ្យសារភាពនៅលើកញ្ចក់ទូរទស្សន៍ជាដើម។ អេស្ប៉ាញដែលជាប្រទេសហត្ថលេខីនៃសន្ធិសញ្ញាសិទ្ធិមនុស្សអឺរ៉ុបបានរងការវាយប្រហារខ្លាំងជាងគេពីអង្គការសិទ្ធិមនុស្ស Safeguard Defenders។ នេះក៏ដោយសារអេស្ប៉ាញបានធ្វើបត្យាប័នជនជាតិតៃវ៉ាន់ជាង ២០០នាក់ទៅឲ្យចិនដីគោក។
ក្នុងឆ្នាំ ២០១៧ តុលាការអេស្ប៉ាញបានចាត់ទុកថា ជនសង្ស័យតៃវ៉ាន់ និងចិនដីគោកចំនួន ១២១នាក់អាចបញ្ជូនទៅឲ្យចិនកម្មុយនិស្តដោយអនុលោមតាមគោលការណ៍ចិនតែមួយ។ ទង្វើរបៀបនេះត្រូវបានអង្គការសិទ្ធិមនុស្ស Safeguard Defenders យល់ថា អេស្ប៉ាញក្បត់នឹងពាក្យសន្យារបស់ខ្លួនក្នុងផ្នែកសិទ្ធិមនុស្ស និងធ្វើមិនដឹង មិនឮពីការរំលោភសិទ្ធិមនុស្សធ្ងន់ធ្ងរនៅចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ