ចិនប្រកាសបញ្ជូនឲ្យតៃវ៉ាន់នូវបុរសតៃវ៉ាន់ម្នាក់ដែលជាប់សង្ស័យក្នុងរឿងឃាតកម្មសម្លាប់មនុស្ស
នៅថ្ងៃអង្គារ ទី៧ ធ្នូ រដ្ឋអំណាចចិនបានប្រកាសពីការបញ្ជូនឲ្យតៃវ៉ាន់នូវបុរសតៃវ៉ាន់ម្នាក់ដែលជាប់សង្ស័យក្នុងបទឃាតកម្មសម្លាប់មនុស្ស។ យោងតាមបទចោទប្រកាន់ បុរសជាប់សង្ស័យដែលមានឈ្មោះហ័ងបានភៀសខ្លួនទៅកាន់ស្រុកស៊ីយ៉ាមែនស្ថិតប៉ែកអាគ្នេយ៍ប្រទេសចិន ក្រោយពីរូបគេបានបាញ់សម្លាប់បុរសម្នាក់នៅក្នុងទីក្រុងតៃប៉ិក។ កាយវិការរបស់ចិនដីគោកចំពោះចិនតៃវ៉ាន់នេះជាកិច្ចសហប្រតិបត្តិការដ៏កម្រមួយ ខណៈដែលបងប្អូនបង្កើតគូសត្រូវទាំងពីរកំពុងមានទំនាក់ទំនងតានតឹងខ្លាំង។
ចុះផ្សាយនៅថ្ងៃ៖
ស្តាប់ - ០២:១២
ការដែលប៉ូលិសចិនក្នុងស្រុកស៊ីយ៉ាមែនបានសម្រេចបញ្ជូនបុរសតៃវ៉ាន់ម្នាក់ដែលជាប់សង្ស័យក្នុងរឿងឃាតកម្មទៅឲ្យតៃវ៉ាន់វិញបានធ្វើឡើង ក្រោយពីបុរសរូបនោះបានទទួលស្គាល់ពីទង្វើសម្លាប់មនុស្សរបស់ខ្លួន។ តែប៉ូលិសចិនក្នុងស្រុកស៊ីយ៉ាមែនមិនបានលំអិតពីថ្ងៃខែដែលត្រូវបញ្ជូនទេ។ ចំណែកការិយាល័យទទួលកិច្ចការតៃវ៉ាន់របស់ចិនដីគោកបានបញ្ជាក់ថា ការសម្រេចនេះនឹងពង្រឹងលើកិច្ចខិតខំប្រឹងប្រែងក្នុងការប្រយុទ្ធប្រឆាំងនឹងឧក្រិដ្ឋកម្ម និងសម្រាប់ការរក្សាសណ្តាប់ធ្នាប់នៅក្នុងទំនាក់ទំនងរវាងភាគីទាំងពីរចិន តៃវ៉ាន់។
គួររម្លឹកថា ពួកឧក្រិដ្ឋជនតៃវ៉ាន់តែងមានទម្លាប់ភៀសខ្លួនទៅកាន់ចិនដីដីគោកដើម្បីគេចពីក្រញាំតុលាការតៃវ៉ាន់។ តែគេមិនត្រូវភ្លេចនិយាយទេថាក្នុងឆ្នាំ ២០១៩ ចិនដីគោក និងចិនតៃវ៉ាន់បានចុះកិច្ចព្រមព្រៀងមួយដើម្បីប្រឆាំងនឹងឧក្រិដ្ឋកម្មដោយចែងពីការបញ្ជូនឲ្យគ្នាទៅវិញ ទៅមកនូវជនសង្ស័យដែលតាមចាប់ខ្លួន។ តែតាំងពីការជាប់ឆ្នោតប្រធានាធិបតីតៃវ៉ាន់របស់លោកស្រីសៃ អ៊ីងវេនក្នុងឆ្នាំ ២០១៦ ដែលជាអ្នកប្រឆាំងចិនមក ការអនុវត្តន៍លើកិច្ចព្រមព្រៀងមួយនេះត្រូវបានជាប់គាំងដោយភាពតានតឹងរវាងភាគីទាំងពីរ។
« ឧក្រិដ្ឋជនជាសត្រូវរបស់ពិភពលោក។ យើងសង្ឃឹមថា រដ្ឋអំណាចទាំងសងខាងនឹងអាចបន្តយុទ្ធនាការរួមគ្នាដើម្បីប្រឆាំងនឹងឧក្រិដ្ឋកម្ម » នេះជាការយល់ឃើញរបស់ការិយាល័យតៃវ៉ាន់ទទួលបន្ទុកកិច្ចការទំនាក់ទំនងជាមួយចិនដីគោក។ យោងតាមការិយាល័យតៃវ៉ាន់នេះដដែល ចិនបានបញ្ជូនឲ្យតៃវ៉ាន់នូវពលរដ្ឋតៃវ៉ាន់ជាប់សង្ស័យចំនួន ៤នាក់កាលពីឆ្នាំ ២០២០។ តែគេគ្មានតួលេខចំនួនពលរដ្ឋចិនជាប់សង្ស័យដែលតៃវ៉ាន់បានបញ្ជូនទៅឲ្យចិនដីគោកទេ។ យ៉ាងណាក៏ដោយ អ្វីដែលចិនបានធ្វើចំពោះតៃវ៉ាន់ពេលនេះជាកាយវិការដ៏កម្រមួយ ខណៈដែលបងប្អូនបង្កើតគូសត្រូវទាំងពីរកំពុងមានទំនាក់ទំនងតានតឹងខ្លាំង។
ក្រោមភ្នែក ច្រមុះរបស់ចិនដីគោក កោះតៃវ៉ាន់ជាខេត្តឧទ្ទាមមួយដែលខ្លួនមិនញញើតនឹងប្រើកម្លាំងវាយប្រហារទេ បើកោះមួយនេះហ៊ានប្រកាសឯករាជ្យនៅថ្ងៃណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ