ប្រឈមនឹងមេរោគបំប្លែងខ្លួន « អូមីក្រុង » ធនាគារអភិវឌ្ឍន៍អាស៊ីទម្លាក់ការព្យាករកំណើនសេដ្ឋកិច្ច
នៅថ្ងៃអង្គារ ទី១៤ ធ្នូ ធនាគារអភិវឌ្ឍន៍អាស៊ីបានចេញផ្សាយរបាយការណ៍មួយស្តីពីស្ថានភាពសេដ្ឋកិច្ចនៅក្នុងតំបន់អាស៊ីប៉ាស៊ីហ្វិក។ របាយការណ៍បានព្រមានថា មេរោគបំប្លែងខ្លួន « អូមីក្រុង » ដែលឆ្លងខ្លាំង និងឆ្លងលឿនអាចធ្វើឲ្យប៉ះពាល់ដល់កំណើនសេដ្ឋកិច្ចនៅក្នុងតំបន់។ តាមការព្យាករឡើងវិញរបស់ធនាគារអភិវឌ្ឍន៍អាស៊ី កំណើនសេដ្ឋកិច្ចនៅក្នុងបណ្តាប្រទេសអាស៊ីកំពុងអភិវឌ្ឍន៍មានការធ្លាក់ចុះបន្តិចក្នុងឆ្នាំ ២០២១ និងឆ្នាំ ២០២២។
ចុះផ្សាយនៅថ្ងៃ៖
ស្តាប់ - ០២:១៦
តាមការព្យាករថ្មីរបស់ធនាគារអភិវឌ្ឃន៍អាស៊ី កំណើនសេដ្ឋកិច្ចក្នុងតំបន់អាស៊ីប៉ាស៊ីហ្វិកសម្រាប់ឆ្នាំ ២០២១ អាចមាន ៧% ពោលធ្លាក់ចុះបន្តិចបើធៀបនឹងការព្យាករក្នុងខែកញ្ញាកន្លងទៅដែលមាន ៧,១%។ សម្រាប់ឆ្នាំ ២០២២ គឺអាចធា្លក់ពី ៥,៤% ទៅ ៥,៣%។ របាយការណ៍របស់ធនាគារអភិវឌ្ឃន៍អាស៊ីបានមើលឃើញពីការធ្លាក់ចុះនូវករណីឆ្លងកូវីដ១៩ និងកំណើននៃការចាក់វ៉ាក់សាំងនៅក្នុងតំបន់អាស៊ីប៉ាស៊ីហ្វិក។ តែបើមើលជារួមនៅក្នុងលោកវិញ ជំងឺឆ្លងរាតត្បាតដោយកូវីដ១៩ កំពុងបន្តមានដោយមិនដឹងចប់នៅពេលណាទេ។
បន្ទាប់មក ធនាគារអភិវឌ្ឃន៍អាស៊ីបានលើកឡើងពីកំណើនករណីឆ្លងថ្មីក្នុងទឹកដីអឺរ៉ុបដែលកំពុងកើតមាននៅលើបណ្តាប្រទេសដែលបានចាក់វ៉ាក់សាំងច្រើន និងដែលអាចបង្ខំឲ្យរដ្ឋាភិបាលចាត់វិធានការរឹតបន្តឹងជាថ្មី ដូចជាការដើរហើររបស់ពលរដ្ឋ។ ទាក់ទងនឹងការចាក់វ៉ាក់សាំងនៅក្នុងបណ្តាប្រទេសអាស៊ីកំពុងអភិវឌ្ឃន៍ត្រូវបានធនាគារអភិវឌ្ឃន៍អាស៊ីបញ្ជាក់ថា មានអត្រាកើនឡើងគួរឲ្យកត់សម្គាល់។ គិតត្រឹមដំណាច់ខែវិច្ឆិកា មានពលរដ្ឋសរុបរបស់ប្រទេសអាស៊ីកំពុងអភិវឌ្ឃន៍ជិតពាក់កណ្តាលបានចាក់វ៉ាក់សាំងគ្រប់ចំនួនដូស។
តែអត្រានៃការចាក់វ៉ាក់សាំងនៅមានភាពមិនស្មើគ្នារវាងប្រទេសនីមួយៗ ក្នុងនោះ ២០ប្រទេសមានអត្រាចាក់វ៉ាក់សាំងតិចជាង ៤០%។ នេះជាហេតុផលដែលបានធ្វើឲ្យប្រទេសទាំងនេះប្រឈមនឹងភាពងាយរងគ្រោះនៅចំពោះមុខករណីឆ្លងថ្មីដោយកូវីដ១៩ និងកូវីដ១៩ បំប្លែងខ្លួន។ វិសមភាពក្នុងការចាក់វ៉ាក់សាំងកំពុងបង្កឲ្យមានរលកឆ្លងថ្មី ហើយរលកឆ្លងថ្មីអាចរារាំងដល់ដំណើរការសេដ្ឋកិច្ច និងគម្រោងបើកប្រទេសឡើងវិញ នេះជាការព្រមានរបស់ធនាគារអភិវឌ្ឃន៍អាស៊ី។
បន្ទាប់មក ធនាគារអភិវឌ្ឃន៍អាស៊ីបានលើកឡើងពីការគំរាមកំហែងផ្សេងទៀតសម្រាប់សេដ្ឋកិច្ចសកល រួមមាន ទីផ្សារអចលនទ្រព្យនៅចិនដាំក្បាលចុះ កំណើនអតិផរណា និងភាពរអាក់រអួលលើចរន្តផ្គត់ផ្គង់សកល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ