អ-ស-ប៖ វិបត្តិកូវីដ ធ្វើឲ្យការវិនិយោគបរទេសក្នុងពិភពលោកធ្លាក់ចុះ ជិត ៤០%
២០២០ជាឆ្នាំខ្មៅងងឹតសម្រាប់គម្រោងវិនិយោគបរទេស។ របាយការណ៍របស់ អង្គការសហប្រជាជាតិ ទទួលបន្ទុកផ្នែកពាណិជ្ជកម្ម បានបង្ហាញថា ដោយសារជំងឺរាតត្បាតកូវីដ១៩ ទឹកប្រាក់វិនិយោគបរទេស នៅក្នុងពិភពលោកនឹងធ្លាក់ចុះប្រមាណ ៤០% នៅឆ្នាំ២០២០។ គ្រប់តំបន់មិនថា អាស៊ី អឺរ៉ុប អាមេរិក ឬអាហ្វ្រិក នឹងត្រូវរងប៉ះពាល់ ដោយសារការធ្លាក់ចុះនៃការវិនិយោគបរទេស ដោយនៅក្នុងនោះ បណ្តាប្រទេសកំពុងអភិវឌ្ឍ នៅអាស៊ី រងផលប៉ះពាល់ខ្លាំងជាងគេ។
ចុះផ្សាយនៅថ្ងៃ៖
ស្តាប់ - ០៣:០៤
ស្ថាប័នរបស់អង្គការសហប្រជាជាតិ ទទួលបន្ទុកផ្នែកពាណិជ្ជកម្ម និងការអភិវឌ្ឍន៍ កាលពីខែ មីនាកន្លងទៅ ធ្លាប់បានព្យាករថា ការវិនិយោគបរទេសនឹងអាចធ្លាក់ចុះពី១៥ ទៅ ២០ភាគរយសម្រាប់ឆ្នាំ២០២០នេះ។ ប៉ុន្តែ នៅ៣ខែ ក្រោយ អង្គការសហប្រជាជាតិ បានកែ ដូរមកវិញ ថា ការវិនិយោគបរទេស នៅក្នុងពិភពលោក នឹងធ្លាក់ចុះ ជិត៤០ភាគរយ នៅឆ្នាំនេះ ដោយសារតែវិបត្តិកូវីដ។ ការវិនិយោគបរទេស និងបន្តធ្លាក់ចុះ ពី៥ ទៅ ១០ភាគរយ នៅឆ្នាំក្រោយ មុននឹងអាចងើបឡើងមកវិញ នៅឆ្នាំ ២០២២។ ជារួម ទឹកប្រាក់វិនិយោគបរទេស នៅឆ្នាំនេះ នឹងធ្លាក់ចុះពី ជាង ១៥៤ម៉ឺនលានដុល្លារ នៅឆ្នាំ ២០១៩ មកនៅក្រោម ១០០ម៉ឺនលាន ដុល្លារ។ គឺជាការធ្លាក់ចុះដ៏ខ្លាំង ដែលមិនធ្លាប់មាន នៅក្នុងរយៈពេល ១៥ឆ្នាំចុងក្រោយនេះ។
តាមរបាយការណ៍ របស់អង្គការសហប្រជាជាតិ ប្រទេសកំពុងអភិវឌ្ឍ ដែលពឹងផ្អែកខ្លាំងទៅលើការវិនិយោគបរទេស នឹងរងប៉ះពាល់ខ្លាំងជាងគេ។ ទឹកប្រាក់វិនិយោគ បរទេសនៅទឹកដីអឺរ៉ុប និងអាស៊ី នឹងធ្លាក់ចុះពី ៣០ទៅ ៤៥ភាគរយ។ ២០ភាគរយនៅអាមេរិកខាងជើង និងពី ២៥ ទៅ ៤០ភាគរយ នៅតំបន់អាហ្វ្រិក។ អាហ្វ្រិកដែលរស់ពឹងអាស្រ័យ លើការនាំចេញវត្ថុធាតុដើម របស់ខ្លួន នឹងរងគ្រោះខ្លាំង ព្រោះថា ការធ្លាក់ចុះនៃតម្លៃវត្ថុធាតុដើម ដូចជាប្រេងជាដើម នឹង រឹតតែមិនធ្វើឲ្យគេចង់បោះទុនវិនិយោគនៅអាហ្វ្រិកនោះទេ។ គេវាយតម្លៃថា ការវិនិយោគបរទេសទៅលើការធ្វើអាជីវកម្មរ៉ែ នៅអាហ្វ្រិកនឹងធ្លាក់ចុះ ដល់ទៅ៧០%។
របាយការណ៍របស់អង្គការសហប្រជាជាតិ បានលើកឡើងពីកត្តាជាច្រើនដែលនាំឲ្យ ការវិនិយោគបរទេសធ្លាក់ចុះខ្លាំងនៅឆ្នាំនេះ។ វិធានការបិទខ្ទប់ប្រទេស ធ្វើឲ្យគម្រោងវិនិយោគមានស្រាប់ មិនអាចអនុវត្តបាន១០០ភាគរយ។ វិធានការបិទខ្ទប់ប្រទេស បានទៅបង្អាក់ ខ្សែបណ្តាញ ផលិតនិងផ្គត់ផ្គង់របស់រោងចក្រ នៅក្នុងតំបន់។ ក្រុមហ៊ុនពហុជាតិ ជាង ៥ពាន់ដែលត្រូវគេសាកសួរ សម្រាប់របាយការណ៍របស់អង្គការសហប្រជាជាតិ បានព្យាករពីការធ្លាក់ចុះនៃប្រាក់ចំណេញ ប្រមាណ ៤០ភាគរយ។ ក្រុមហ៊ុនខ្លះ ត្រូវខាតបង់ គ្មានប្រាក់ចំណូលតែម្តង។ គ្មានប្រាក់ចំណេញ ក្រុមហ៊ុននឹងត្រូវពិនិត្យសើរើឡើងវិញ គម្រោងវិនិយោគ ដែលគេចង់ពង្រីក ចេញទៅក្រៅតំបន់។ គួរបញ្ជាក់ថា ប្រាក់ចំណេញ របស់ក្រុមហ៊ុនដើតួសំខាន់ ប្រមាណ ៥០ភាគរយនៃការវិនិយោគបរទេស។
មួយវិញទៀត នៅក្នុងកាលៈទេសៈ ដែលសេដ្ឋកិច្ចពិភពលោកកំពុង ដើរថយក្រោយ ដោយសារជំងឺរាតត្បាតកូវីដ ក្រុមហ៊ុនបរទេសជាច្រើន មិនសូវចង់បោះទុនវិនិយោគ ព្រោះ គេបារម្ភពីបញ្ហារាំងស្ទះ នៃសង្វាក់ផលិតកម្ម ការផ្គត់ផ្គង់វត្ថុធាតុដើម និងការដឹកជញ្ជូនទំនិញ ចេញទៅលក់នៅលើទីផ្សារអន្តរជាតិជាដើម។ ជាមួយចក្ខុវិស័យកំណើនសេដ្ឋកិច្ចសកលដែលធ្លាក់ចុះ គេក៏កាន់តែលែងចង់វិនិយោគបន្ថែមទៀត។
តាមអគ្គលេខាធិការរបស់ស្ថាប័នអង្គការសហប្រជាជាតិទទួលបន្ទុកពាណិជ្ជកម្ម ស្ថានភាពមិនច្បាស់លាស់ សព្វថ្ងៃនេះ នឹងអាស្រ័យទៅលើរយៈពេលនៃវិបត្តិកូវីដ ហើយនិងកម្មវិធីនយោបាយរបស់រដ្ឋាភិបាល ដើម្បីកាត់បន្ថយហានិភ័យសេដ្ឋកិច្ច។ គេវាយតម្លៃថា ជាមួយនឹងវិបត្តិកូវីដ រដ្ឋាភិបាលរបស់ប្រទេសអ្នកមាន មួយចំនួន រឹតតែពង្រឹងនយោបាយជាតិនិយម តាមរយៈ ការបង្វិលទឹកប្រាក់វិនិយោគមកក្នុងស្រុក។ និន្នាការនេះនឹងប៉ះពាល់ដល់ ប្រទេសកំពុងអភិវឌ្ឍន៍ នៅ ប៉ុន្មានទសវត្សរ៍ទៅមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ