កូរ៉េខាងត្បូងថា កូរ៉េខាងជើងបាញ់សាកល្បងមីស៊ីលដែលមានសមត្ថភាពខ្លាំងជាងមុន
នៅតែប៉ុន្មានម៉ោងក្រោយ ប្រទេសសមាជិកក្រុមប្រឹក្សាសន្តិសុខថ្កោលទោសសកម្មភាពបាញ់មីស៊ីលបាលីស្ទិករបស់កូរ៉េខាងជើង កាលពីសប្តាហ៍មុន កូរ៉េខាងជើងបានបាញ់សាកល្បងមីស៊ីលជាលើកទី២ នៅថ្ងៃអង្គារទី១១មករានេះ។ តាមអគ្គបញ្ជាការដ្ឋានកងទ័ពកូរ៉េខាងត្បូង មីស៊ីលដែលកូរ៉េខាងជើងបាញ់ឲ្យទៅធ្លាក់នៅសមុទ្រខាងកើត ដែលកម្លាំងខ្លាំងជាងមីស៊ីលអ៊ីពែសូនិក ដែលកូរ៉េខាងជើងបានបាញ់កាលពីសប្តាហ៍មុនទៅទៀត។
ចុះផ្សាយនៅថ្ងៃ៖
ស្តាប់ - ០២:១៨
រាល់ការបាញ់សាកល្បងមីស៊ីលម្តងៗ មិនត្រឹមតែជួយធ្វើឲ្យសមត្ថភាពយោធារបស់កូរ៉េខាងជើងកាន់តែរីកចម្រើនទៅមុខតែប៉ុណ្ណោះទេ ប៉ុន្តែ វាអនុញ្ញាតឲ្យកូរ៉េខាងជើងបង្កើនប្រភេទអាវុធទំនើបៗសម្រាប់នាំចេញ យកទៅលក់ឲ្យអតិថិជន និងក្រុមឈ្មួញជួយដូរអាវុធខុសច្បាប់នៅក្នុងពិភពលោក។ នេះជាការវាយតម្លៃរបស់ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield។
នៅក្នុងសេចក្តីថ្លែងការណ៍រួម កាលពីថ្ងៃចន្ទ ដែលធ្វើឡើងនៅមុនកិច្ចប្រជុំបិទទ្វារនៅក្រុមប្រឹក្សាសន្តិសុខ អាមេរិករួមជាមួយ ប្រទេស៥ទៀត ដែលជាសមាជិកនៃក្រុមប្រឹក្សាសន្តិសុខអង្គការសហប្រជាជាតិបានទាមទារឲ្យកូរ៉េខាងជើងឈប់ជាបន្ទាន់សកម្មភាពដែលអាចបង្កឲ្យមានគ្រោះថ្នាក់ ការផ្ទុះអាវុធ និងគំរាមកំហែងស្ថិរភាពនៅក្នុងតំបន់។
កូរ៉េខាងជើងវិញហាក់ស្តាប់មិនលឺសេចក្តីអំពាវនាវ។ នៅតែប៉ុន្មានម៉ោងក្រោយក្រុមប្រឹក្សាសន្តិសុខបើកកិច្ចប្រជុំពិសេសដើម្បីនិយាយពីការបាញ់មីស៊ីលរបស់កូរ៉េខាងជើង ប៉ុន្តែ ដោយគ្មានចេញសេចក្តីសម្រេចថ្កោលទោសអ្វី កូរ៉េខាងជើងបានផ្គើនបាញ់សាកល្បងមីស៊ីលជាលើកទី២ នៅថ្ងៃអង្គារនេះ។
នៅក្នុងសេចក្តីប្រកាសព័ត៌មាន អគ្គបញ្ជាការដ្ឋានកូរ៉េខាងត្បូងបានអះអាងថា កូរ៉េខាងជើងបានបាញ់មីស៊ីលដែលមានសមត្ថភាពខ្លាំងជាងមីស៊ីលអ៊ីពែសូនិកដែលកូរ៉េខាងជើងបានបាញ់កាលពីសប្តាហ៍មុន។ នៅថ្ងៃព្រហស្បតិ៍ ទី៦មករា ព្យុងយ៉ាងធ្លាប់ប្រកាសថា ខ្លួនបានបាញ់សាកល្បងដោយជោគជ័យ មីស៊ីលអ៊ីពែសូនិកដែលបានវាយចំគោលដៅ ស្ថិតនៅចម្ងាយ ៧០០គីឡូម៉ែត្រ។ ប៉ុន្តែ តាមអគ្គបញ្ជាការដ្ឋានកូរ៉េខាងត្បូង មីស៊ីលដែលកូរ៉េខាងជើងបាញ់សាកល្បងនៅថ្ងៃអង្គារមានកម្លាំងខ្លាំងជាងលើកមុន ព្រោះវាហោះក្នុងល្បឿនអតិបរិមារ ១២ ៣៤៨ គីឡូម៉ែត្រក្នុងមួយម៉ោង ដែលលឿនជាងសំឡេងដល់ទៅ១០ដង។ ខុសប្លែកពីមីស៊ីលបាលីស្ទិកដែលហោះទៅក្នុងអវកាស មុននឹងធ្លាក់សំដៅចំគោលដៅ មីស៊ីលអ៊ីពែសូនិក ជាប្រភេទមីស៊ីលបណ្តែត ហោះក្នុងកំពស់ទាប និងហោះលឿនជាងសំឡេង៥ដង ពោលគឺប្រមាណ ៦២០០គីឡូម៉ែត្រក្នុងមួយម៉ោង។
នៅក្រោយការបាញ់សាកល្បងជាលើកទី២ ឯកអគ្គរដ្ឋទូតអាមេរិកប្រចាំអង្គការសហប្រជាជាតិបានអំពាវនាវសាជាថ្មីឲ្យសហគមន៍អន្តរជាតិអនុវត្តឲ្យបានតឹងរ៉ឹង ការដាក់ទណ្ឌកម្មសេដ្ឋកិច្ចលើកូរ៉េខាងជើង។ ក្រុមប្រឹក្សាសន្តិសុខអង្គការសហប្រជាជាតិបានដាក់ទណ្ឌកម្មសេដ្ឋកិច្ចចុងក្រោយបំផុតទៅលើកូរ៉េខាងជើង នៅឆ្នាំ ២០១៧ ក្នុងរឿងកូរ៉េខាងជើងបាញ់សាកល្បងមីស៊ីលបាលីស្ទិក និងកម្មវិធីផលិតអាវុធនុយក្លេអ៊ែរ។ ក្រោយមក ចិន និងរុស្ស៊ីសមាជិកអចិន្ត្រៃយ៍ ក្រុមប្រឹក្សាសន្តិសុខលែងគាំទ្រឲ្យមានការដាក់ទណ្ឌកម្មសាជាថ្មី និងបានអំពាវនាវ ឲ្យគេដកទណ្ឌកម្មមួយចំនួនដើម្បីសម្រួលការនាំចេញគ្រឿងសមុទ្ររបស់កូរ៉េខាងជើង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ