កូរ៉េខាងជើងបាញ់មីស៊ីល២បន្ថែមទៀតដែលគេសង្ស័យថាជាមីស៊ីលបាលីស្ទិក
កូរ៉េខាងជើងបានបាញ់មីស៊ីល ២បន្ថែមទៀតដែលគេសង្ស័យថាជាប្រភេទមីស៊ីលបាលីស្ទិក នៅថ្ងៃចន្ទ ទី១៧ មករានេះ។ ការបាញ់សាកល្បងមីស៊ីលជាលើកទី៤របស់កូរ៉េខាងជើងកើតឡើងតែប៉ុន្មានថ្ងៃប៉ុណ្ណោះ ក្រោយអាមេរិកបានដាក់ទណ្ឌកម្មថ្មីលើប្រទេសដែលមានអាវុធនុយក្លេអ៊ែរមួយនេះ។
ចុះផ្សាយនៅថ្ងៃ៖
ស្តាប់ - ០២:១៧
ចូលដល់ឆ្នាំថ្មី ២០២២ភ្លាម កូរ៉េខាងជើងបានបាញ់សាកល្បងមីស៊ីលចំនួន៤ដងក្នុងរយៈពេលមិនទាំងដល់ពីរសប្តាហ៍ផង។ បើតាមយោធាកូរ៉េខាងត្បូង ទីក្រុងព្យុងយ៉ាងបានបាញ់មីស៊ីលមិនស្គាល់អត្តសញ្ញាណចំនួនពីរចូលទៅក្នុងសមុទ្រនៅជិតឆ្នេរភាគខាងកើតរបស់ប្រទេសកូរ៉េខាងជើងនៅថ្ងៃចន្ទនេះ។
រដ្ឋាភិបាលជប៉ុនក៏បានរាយការណ៍ដែរពីការបាញ់មីស៊ីលរបស់កូរ៉េខាងជើង។ ប្រធានគណៈរដ្ឋមន្ត្រីជប៉ុនលោក Hirokazu Matsuno បានថ្កោលទោសទង្វើរបស់ក្រុងព្យុងយ៉ាងថាជាការគំរាមកំហែងដល់សន្តិភាព និងសន្តិសុខក្នុងតំបន់។
តើគេបានដឹងអ្វីខ្លះពីការបាញ់មីស៊ីលថ្មីចុងក្រោយរបស់កូរ៉េខាងជើង?
អគ្គសេនាធិការចម្រុះរបស់ប្រទេសកូរ៉េខាងត្បូង និយាយថាកូរ៉េខាងជើងបានបាញ់មីស៊ីលចំនួនពីរចេញពីភាគខាងកើតនៃព្រលានយន្តហោះ Sunan ក្នុងទីក្រុងព្យុងយ៉ាង។ មីស៊ីលទាំងនោះធ្វើដំណើរបានចម្ងាយប្រមាណ ៣៨០គីឡូម៉ែត្រដល់រយៈកម្ពស់អតិបរមា ៤២ គីឡូម៉ែត្រ។ កូរ៉េខាងជើង ធ្លាប់បានប្រើប្រាស់ដីព្រលានដើម្បីបាញ់សាកល្បងមីស៊ីលបាលីស្ទិករយៈចម្ងាយមធ្យម Hwasong-12 (IRBM) កាលពីឆ្នាំ ២០១៧។
យ៉ាងណាក៏ដោយ គេនៅមិនទាន់ដឹងច្បាស់នោះទេថាតើមីស៊ីលប្រភេទណាដែលកូរ៉េខាងជើងបានបាញ់នៅថ្ងៃនេះ។ ក៏ប៉ុន្តែទាំងមន្ត្រីកូរ៉េខាងត្បូងនិងជប៉ុន និយាយថាមីស៊ីលទាំងនោះទំនងជាមីស៊ីលបាលីស្ទិក។
គួររំឭកថា កូរ៉េខាងជើងបានបាញ់សាកល្បងមីស៊ីលចំនួនបីផ្សេងទៀតក្នុងដើមឆ្នាំ ២០២២ដែលភាពញឹកញាប់នេះត្រូវបានអ្នកសង្កេតការណ៍ជឿថាមិនមែនជារឿងធម្មតាឡើយ។ ជាការគួរឲ្យកត់សម្គាល់ មីស៊ីលដែលកូរ៉េខាងជើងបានបាញ់ក៏មានដែរមីស៊ីលដែលមានល្បឿនលឿនខ្លាំងអ៊ីពែសូនិក។
ការបាញ់មីស៊ីលជាបន្តបន្ទាប់របស់ក្រុងព្យុងយ៉ាងទទួលបានការរិះគន់និងថ្កោលទោសជាខ្លាំងពីសហគមន៍អន្តរជាតិ។ កាលពីសប្តាហ៍មុន អាមេរិកបានសម្រេចដាក់ទណ្ឌកម្មថ្មីលើប្រទេសកូរ៉េខាងជើងដែលនេះជាទណ្ឌកម្មដំបូងបង្អស់ក្រោមរដ្ឋបាលរបស់លោកប្រធានាធិបតីចូ បៃដិន។
ក្រៅពីនេះ ទីក្រុងវ៉ាស៊ីនតោនក៏បានអំពាវនាវផងដែរឲ្យអង្គការសហប្រជាជាតិដាក់បញ្ចូលឈ្មោះបុគ្គល និងអង្គភាពមួយចំនួនរបស់កូរ៉េខាងជើងចូលក្នុងបញ្ចីខ្មៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ