ឥណ្ឌូណេស៊ីកាត់ទោសដាក់ពន្ធនាគារមនុស្សជាច្រើននាក់ពីបទសម្លាប់ដំរី
នៅថ្ងៃព្រហស្បតិ៍ទី ២៧មករានេះតុលាការឥណ្ឌូណេស៊ីបានកាត់ទោស មនុស្សចំនួន ១១នាក់ ឱ្យជាប់ពន្ធនាគារ ពី ១៩ខែទៅបីឆ្នាំកន្លះ ពីបទ បានដាក់របងអគ្គីសនី បណ្តាលឱ្យឆក់ងាប់ដំរី៥ក្បាល កាលពីឆ្នាំ២០២០។ ដំរីងាប់នោះជាពពួកសត្វដែលត្រូវការពារអភិរក្ស និងដែលមនុស្សត្រូវការសម្លាប់ដើម្បីយកភ្លុក។
ចុះផ្សាយនៅថ្ងៃ៖
ស្តាប់ - ០១:៤៦
កាលពីឆ្នាំ២០២០ ក្នុងរយៈពេលតែមួយសប្តាហ៍ អាជ្ញាធរបានរកឃើញសំណល់ខ្មោចដំរី ចំនួន៥ក្បាល គ្មានភ្លុក ងាប់នៅជិតចំការដាំដូងប្រេងមួយ ក្នុងភូមិ Tuwie Peuriya។ បើតាមមជ្ឈមណ្ឌលអភិរក្សធនធានធម្មជាតិ ដំរីនោះបានងាប់ ជាងពីរខែមកហើយ ដោយហេតុឆក់ខ្សែភ្លើងតង់ស្យុងខ្ពស់។ ខ្សែភ្លើង ដែលគេត ដោយចេតនា ធ្វើជារបងឆក់សម្លាប់សត្វ។
បន្ទាប់ពីបានអង្កេតអស់ពេលជាយូរខែ ប៉ូលិសឥណ្ឌូណេស៊ី អាចចាប់ខ្លួនជនល្មើសបាននៅខែសីហា និងកញ្ញាឆ្នាំ២០២១ ហើយបញ្ជូនទៅឱ្យតុលាការកាត់ទោស ពីបទបរបាញ់សម្លាប់សត្វ ស្របតាមច្បាប់អភិរក្សប្រព័ន្ធអេកូសាស្ត្រនិងធនធានធម្មជាតិ។
ក្នុងចំណោមជនល្មើសទាំង១១នាក់ ខ្លះត្រូវជាប់ពន្ធនាគារ១៩ខែ ខ្លះដល់ជិតបីឆ្នាំកន្លះ។
នារយៈពេលប៉ុន្មានឆ្នាំចុងក្រោយមកនេះ គេសង្កេតឃើញមានគ្រោះថ្នាក់ច្រើនដែលបង្កឱ្យដំរីព្រៃស៊ូម៉ាត្រាងាប់។ នៅខែវិច្ឆិកាកន្លងទៅថ្មីៗនេះ មានកូនដំរីព្រៃមួយក្បាលបានងាប់ ក្រោយពីពួកអ្នកសម្លាប់សត្វព្រៃបានដាក់អន្ទាក់កាប់ក្បាលយកភ្លុក។
ការកាប់ព្រៃឈើ បានធ្វើសត្វព្រៃរស់ក្នុងធម្មជាតិ ដូចយ៉ាងដំរីនេះ បាត់បង់ជម្រក និងចូលមកយាយីមនុស្សដែលប្រឹងការពារផលដំណាំកសិកម្មរបស់ខ្លួន។ ជាពូជសត្វត្រូវអភិរក្ស ដំរីព្រៃ នៅកោះស៊ូម៉ាត្រា ជាសត្វរងការគំរាមកំហែងសម្លាប់យកភ្លុកខ្លាំងណាស់។ ភ្នាក់ងារអភិរក្សធនធានធម្មជាតិខេត្ត ប៉ាន់ប្រមាណថា ខេត្តអាឆេមានដំរីស៊ូម៉ាត្រារស់នៅដោយសេរីក្នុងព្រៃ មិនដល់៥០០ក្បាលទេ។ ជាសរុប ឥណ្ឌូណេស៊ីមាននៅសល់សត្វដំរីព្រៃតែប្រមាណ២៤០០ក្បាលតែប៉ុណ្ណោះ នៅទូទាំងប្រទេស។ នេះបើតាមការប៉ាន់ស្មានរបស់ភ្នាក់ងារអភិរក្សអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ