តើកូរ៉េខាងជើងបាញ់សាកល្បងមីស៊ីលបាលីស្ទីក ឬបាញ់បង្ហោះផ្កាយរណប?
នៅមួយថ្ងៃក្រោយ ក្រសួងការពារជាតិកូរ៉េខាងត្បូងចោទប្រកាន់ថា កូរ៉េខាងជើងបានបាញ់មីស៊ីលបាលីស្ទិក របបកុម្មុយនិស្តព្យុងយ៉ាងបានចេញមកប្រកាសនៅថ្ងៃអាទិត្យទី៦ មីនាថា ខ្លួនបានធ្វើការសាកល្បងដ៏សំខាន់មួយដើម្បី បង្ហោះផ្កាយរណបទៅក្នុងគន្លងតារាវិថី។ អ្នកជំនាញមួយចំនួនមួយមិនជឿនោះទេ ដោយវាយតម្លៃថា កូរ៉េខាងជើងបានបាញ់សាកល្បងមីស៊ីល នៅតែប៉ុន្មានថ្ងៃមុនដែលកូរ៉េខាងត្បូងត្រូវរៀបចំការបោះឆ្នោតប្រធានាធិបតី។
ចុះផ្សាយនៅថ្ងៃ៖
ស្តាប់ - ០២:២៤
នៅក្នុងការចុះផ្សាយ នៅថ្ងៃអាទិត្យនេះ ទីភ្នាក់ងារព័ត៌មានរដ្ឋកូរ៉េខាងជើង KCNA បានសរសេរថា កូរ៉េខាងជើងបានធ្វើការសាកល្បងបាញ់បង្ហោះផ្កាយរណបស៊ើបការណ៍។ តាមKCNA ជាមួយ ការធ្វើតេស្តសាកល្បង កាលពីថ្ងៃសៅរ៍ នាយកដ្ឋានជាតិនៃការអភិវឌ្ឍអវកាសកូរ៉េខាងជើងបានបញ្ជាក់ពីសុក្រិតភាពនៃការបញ្ជូនទិន្នន័យ ប្រព័ន្ធចាប់ទទួលសញ្ញា និងប្រព័ន្ធបញ្ជារបស់ផ្កាយរណប។
ជារួម កូរ៉េខាងជើងបាននិយាយពីការបាញ់សាកល្បងផ្កាយរណបស៊ើបការណ៍ ប៉ុន្តែ មិនមែនមីស៊ីលបាលីស្ទិកដូចការលើកឡើងរបស់ ជប៉ុន និងកូរ៉េខាងត្បូងនោះទេ។ នៅថ្ងៃម្សិលមិញក្រសួងការពារជាតិកូរ៉េខាងត្បូងបាននិយាយថា ការបាញ់សាកល្បងមីស៊ីលរបស់កូរ៉េខាងជើង កាលពីថ្ងៃសៅរ៍ កំពុងគំរាមកំហែងដល់សន្តិសុខក្នុងតំបន់ ជាពិសេស នៅក្នុងកាលៈទេសៈដែលកូរ៉េខាងត្បូងកំពុងត្រៀមរៀបចំការបោះឆ្នោត នៅថ្ងៃពុធសប្តាហ៍ក្រោយ។
តើកូរ៉េខាងជើងកំពុងបាញ់សាកល្បងមីស៊ីលបាលីស្ទិក ឬបាញ់បង្ហោះផ្កាយរណប ឲ្យប្រាកដ?
នៅ១០ឆ្នាំមុន កូរ៉េខាងជើងធ្លាប់បានអះអាងថា ខ្លួនបានបាញ់បង្ហោះផ្កាយរណបសម្រាប់ប្រើក្នុងវិស័យទូរគមនាគមន៍។ ប៉ុន្តែ សម្រាប់សហរដ្ឋអាមេរិក និងសម្ព័ន្ធមិត្តកូរ៉េខាងត្បូង និងជប៉ុន អ្វីដែលកូរ៉េខាងជើងបាញ់បង្ហោះជាផ្កាយរណបមែន ឬមិនមែន វាមិនសំខាន់នោះទេ។ អ្វីដែលសំខាន់គឺនៅត្រង់ថា តួមីស៊ីល ដែលកូរ៉េខាងជើងបាញ់សាកល្បងនេះ គឺជាប្រភេទមីស៊ីលប្រើបច្ចេកវិទ្យាតែមួយ ជាមួយនឹងបាលិស្ទីកអន្តរទ្វីប ដែលអាចប្រើបានទាំងក្នុងវិស័យអវកាស និងប្រើជាអាវុធក្នុងវិស័យយោធា និងដែលហាមឃាត់ដាច់ខាត ដោយសេចក្តីសម្រេចរបស់ក្រុមប្រឹក្សាសន្តិសុខ។
គេអាចថា បច្ចេកវិទ្យានៃតួមីស៊ីលគឺ តែមួយ។ បើវាផ្ទុកផ្កាយរណប វាគឺជារ៉ុកកែតស៊ីវិល សម្រាប់ប្រើក្នុងវិស័យអវកាស តែបើគេដកផ្កាយរណបចេញ ហើយជំនួសមកវិញដោយក្បាលគ្រាប់ វាគឺជាមីស៊ីលអន្តរទ្វីប ដែលអាចបាញ់បានចម្ងាយរាប់ម៉ឺនគីឡូម៉ែត្រ ហើយជាពិសេស វាជាប្រភេទមីស៊ីលដែលអាចផ្ទុកក្បាលគ្រាប់នុយក្លេអ៊ែរបាន។
ម្យ៉ាង ការអភិវឌ្ឍផ្កាយរណបស៊ើបការណ៍សម្ងាត់យោធា រួមជាមួយការផលិតសព្វាវុធ សុពែរស៊ូនិក ដែលកូរ៉េខាងជើងបានធ្វើតេស្តជាបន្តបន្ទាប់កាលពីខែមករា គឺជាផែនការកងទ័ពដែលមេដឹកនាំកូរ៉េខាងជើងបានប្រកាសដៅទុក តាំងពីឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ