ខ្លាចដូចអ៊ុយក្រែន តៃវ៉ាន់ ប្រមូលទ័ពបំរុងមកបង្វឹកបង្ហាត់មេរៀនប្រយុទ្ធ
តាំងពីរុស្ស៊ីចូលឈ្លានពានលើអ៊ុយក្រែនមក តៃវ៉ាន់ព្រួយបារម្ភកាន់តែខ្លាំងឡើង ខ្លាចប៉េកាំងប្រើកម្លាំងមកវាយយកកោះតៃវ៉ាន់ដែរ។ ក្រោយសេចក្តីអំពាវនាវរបស់លោកស្រីប្រធានាធិបតីឱ្យមានការរួបរួមតៃវ៉ាន់ជាធ្លុងមួយ នៅថ្ងៃចន្ទទី ១៤មីនា២០២២នេះ តៃវ៉ាន់បានបើកវគ្គបង្ហាត់ហ្វឹកហ្វឺន ទ័ពបំរុង នៃកងកម្លាំងយោធាតៃវ៉ាន់ ជាច្រើនរយនាក់។
ចុះផ្សាយនៅថ្ងៃ៖
ស្តាប់ - ០២:១៥
កាលពីឆ្នាំទៅ ក្នុងពេលមានភាពតានតឹងជាមួយចិន តៃវ៉ាន់ធ្លាប់បានប្រមូលកម្លាំងទ័ពបំរុងមកហ្វឹកហាត់មកម្តងហើយ។ ថ្ងៃនេះ តៃវ៉ាន់បានកោះហៅជាថ្មី ទ័ពបំរុងប្រមាណបួនរយនាក់ មកធ្វើលំហាត់សឹក សមបាញ់ តាមកម្មវិធីត្រៀមចេញប្រយុទ្ធ។ ទាហានបំរុងម្នាក់បានអះអាងប្រាប់អ្នកសារព័ត៌មានថា វគ្គបណ្តុះបណ្តាល បានជួយឱ្យគេស្ថិតក្នុងលក្ខណៈត្រៀមជាស្រេច និងតាមទាន់នូវតាកតិចយោធាថ្មីៗ។
ក្នុងសម្លៀកបំពាក់យោធា លោកស្រីប្រធានាធិបតីតៃវ៉ាន់ សៃអ៊ីនវេន ថ្លែងទៅកាន់ទ័ពបំរុង អំពីភាពចាំបាច់ដែលតៃវ៉ាន់ត្រូវរួបរួមគ្នាធានាការពារជាតិ(តៃវ៉ាន់)។ សម្រាប់លោកស្រីប្រធានាធិបី ស្ថានភាពនៅអ៊ុយក្រែន ឆ្លុះឱ្យឃើញកាន់តែច្បាស់ទៀតថា បន្ថែមពីលើសាមគ្គីភាពនិងជំនួយអន្តរជាតិ ការការពារប្រទេសរំពឹងលើការរួបរួមកម្លាំងរបស់ប្រជាជន។ សន្តិសុខជាតិមិនអាស្រ័យតែលើកងកម្លាំងយោធាមួយទេ ត្រូវមានកងទ័ពបំរុងជាជំនួយទើបបាន។ អំណាចយោធាមានកំរិត តែអំណាចប្រជាជនទើបធំធេងគ្មានកំណត់។ នេះជាការអះអាង របស់លោកឧត្តមសេនីយ៍ Chen Chung-chi ជាមេបញ្ជាការកងទ័ពទី ៦នៃយោធាតៃវ៉ាន់ ដោយបន្ថែមថា អ៊ុយក្រែនជាឧទាហរណ៍ជាក់ស្តែង។
លំហាត់សឹកដែលបានចាប់ផ្តើមតាំងពីដើមខែមីនា ដើម្បីការពារខ្លួនពីឈ្លានពានរបស់សត្រូវ ប្រព្រឹត្តទៅតាមបណ្តោយឆ្នេរសមុទ្ទ ក្បែររដ្ឋធានីតៃប៉ិ និងប្រព្រឹត្តក្នុងខណៈដែលតៃវ៉ាន់កំពុងតាមដានសកម្មភាពរុស្ស៊ីឈ្លានពានអ៊ុយក្រែន ទាំងអារម្មណ៍ព្រួយបារម្ភកាន់តែខ្លាំងឡើងខ្លាចក្រែងចិនយកគំរូតាមរុស្ស៊ី។
ម៉ូស្គូគាំទ្រប៉េកាំង ដោយចាត់ទុកតៃវ៉ាន់ជាចំណែកមួយនៃដែនដីចិន។ លោកប្រធានាធិបតីចិន ស៊ី ជីនពីង ធ្លាប់បានព្រមានដោយចំៗថានឹងប្រើកម្លាំងវាយយកតៃវ៉ាន់ និងបានប្រកាន់យកនយោបាយបែបវាយលុកខ្លាំង ដោយបញ្ជូនយន្តហោះយោធាហោះរំលោភចូលក្នុងតំបន់ការពារដែនអាកាសតៃវ៉ាន់ កាន់តែញឹកញយ និងក្នុងចំនួនដ៏ច្រើនបំផុត (៥៦គ្រឿង) កាលពីខែតុលាឆ្នាំទៅ។ នៅថ្ងៃចន្ទនេះ ក្រសួងការពារជាតិតៃវ៉ាន់បានឱ្យដឹងទៀតថា មានយន្តហោះយោធាចិនចំនួន១៣គ្រឿង ក្នុងនោះ១២គ្រឿងជាយន្តហោះចម្បាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ