កូរ៉េខាងជើង បរាជ័យក្នុងការបាញ់សាកល្បងមីស៊ីល
នៅថ្ងៃពុធទី១៦មីនា២០២២នេះ កូរ៉េខាងជើងបានបាញ់សាកល្បងមីស៊ីលថ្មីមួយទៀត ដែលគេមិនដឹងជាប្រភេទអ្វីឱ្យពិតប្រាកដ ព្រោះការសាកល្បងនោះត្រូវបរាជ័យ។ នេះបើតាមប្រភពយោធាកូរ៉េខាងត្បូង។ ប៉ុន្តែបើតាមអ្នកវិភាគ មីស៊ីលបរាជ័យនោះ អាចជាប្រភេទមីស៊ីលបាលីស្ទីកអន្តរទ្វីប (ICBM)។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
“កូរ៉េខាងជើងបានបាញ់មីស៊ីលមួយប្រភេទ ចេញពីតំបន់ស៊ូណាន Sunan នៅវេលាម៉ោង៩និង៣០នាទីថ្ងៃនេះ ប៉ុន្តែមីស៊ីលបានផ្ទុះឆេះភ្លាម ក្រោយពីបាញ់បង្ហោះចេញបានបន្តិច”។ នេះបើតាមសេចក្តីថ្លែងការណ៍លម្អិតរបស់លោកមេបញ្ជាការកងទ័ពកូរ៉េខាងត្បូង។ ចំណែកប្រព័ន្ធសារព័ត៌មានជប៉ុនវិញ ដោយសំអាងពីលើប្រភពចេញមកពីក្រសួងការពារជាតិបានលើកឡើងថា ព្យុងយ៉ាង ទំនងជាបាញ់សាកល្បងមីស៊ីលបាលីស្ទិក ហើយអ្នកទទួលខុសត្រូវជាន់ខ្ពស់រដ្ឋាភិបាលជប៉ុន បានជួបប្រជុំគ្នាជាបន្ទាន់នៅការិយាល័យនាយករដ្ឋមន្ត្រីដើម្បីជជែកអំពីស្ថានភាពនេះ។
ក្នុងរយៈពេលបីខែដំបូងនៃឆ្នាំ២០២២ កូរ៉េខាងជើងបានបាញ់សាកល្បងមីស៊ីល ដល់ទៅ១០ បើរាប់ទាំងការបាញ់បរាជ័យលើកនេះផង ក្នុងនោះ៧ដងជាមីស៊ីល និង២ដងជាការបាញ់បង្ហោះផ្កាយរណប។ សហរដ្ឋអាមេរិកនិងកូរ៉េខាងត្បូង បានប្រកាសតាំងពីសប្តាហ៍មុន ថាតាមការពិត ព្យុងយ៉ាងបានធ្វើការសាកល្បងប្រព័ន្ធមីស៊ីលបាលីស្ទិកអន្តរទ្វីបថ្មី ដែលគេប្រសិទ្ធនាមថា “មីស៊ីលយក្ស”។ ជាប្រភេទមីស៊ីលដែលកូរ៉េខាងជើងពុំដែលធ្លាប់សាកល្បងពីមុនមកទេ។ កូរ៉េខាងជើងចិញ្ចឹមចិត្តចង់មានមីស៊ីលបាលីស្ទិកអន្តរទ្វីប ដែលអាចពាំគ្រាប់ច្រើន តាំងពីយូរមកហើយ និងបានបង្ហាញ ជាលើកទីមួយ មីស៊ីលបាលីស្ទិកអន្តរទ្វីបរបស់ខ្លួន Hwasong កាលពីតុលាឆ្នាំ២០២០។ ហើយថ្ងៃនេះ ព្យុងយ៉ាងទំនងជាបាញ់សាកល្បងមីស៊ីល Hwasong-១៧នេះឯង។ នេះបើតាមការវិភាគរបស់អ្នកស្រាវជ្រាវបង្គោលនៃវិទ្យាសា្ថនឯកជន Sejong។
សម្រាប់គ្រប់អ្នកវិភាគ បរាជ័យនេះអាចបញ្ជាក់បានថាមិនមែនជាមីស៊ីលធម្មតាទេ។ ហើយកូរ៉េខាងជើងអាចនឹងបាញ់សាកល្បងមីស៊ីល ម្តងឬពីរដងទៀត នៅរវាងពីពេលនេះដល់ថ្ងៃទី ១៥មេសា២០២២ ថ្ងៃដែលព្យុងយ៉ាងត្រូវប្រារព្ធខួប១១០ឆ្នាំនៃកំណើតរបស់លោក គីម អ៊ីលស៊ុង បិតាបក្សកុម្មុយនិស្តកូរ៉េខាងជើង។ ម្យ៉ាងទៀត នេះជាពេលវេលាដ៏ប្រសើរសម្រាប់កូរ៉េខាងជើងសាកល្បងមីស៊ីលផ្សេងៗ ព្រោះពិភពលោកកំពុងវិលវល់នឹងវិបត្តិអ៊ុយក្រែនផង កូរ៉េខាងត្បូងទើបមានប្រធានាធិបតីថ្មីដែលមាននយោបាយតឹងតែងខ្លាំងប្រឆាំងកូរ៉េខាងជើង។ លោក យូន ស៊ុកយោល មិនច្រានចោលលទ្ធភាពចរចាជាមួយព្យុងយ៉ាងមែន តែអ្នកវិភាគយល់ថាជំហរនយោបាយរបស់លោក កាត់បន្ថយទស្សនៈវិស័យចរចាខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ