បំណែកមីស៊ីលអន្តរទ្វីបកូរ៉េខាងជើងធ្លាក់ក្នុងដែនសេដ្ឋកិច្ចផ្តាច់មុខជប៉ុន
បំណែកមីស៊ីលដែលកូរ៉េខាងជើងបានបាញ់នៅថ្ងៃព្រហស្បតិ៍នេះ បានធ្លាក់ក្នុងដែនទឹកជប៉ុន ចម្ងាយប្រមាណតែ១៥០គីឡូម៉ែត្រពីកោះខាងជើងបំផុតរបស់ជប៉ុន។ បើតាមក្រសួងការពារជាតិជប៉ុន មីស៊ីលនោះទំនងមានប្រភេទជាមីស៊ីលអន្តរទ្វីបផង។
ចុះផ្សាយនៅថ្ងៃ៖
ស្តាប់ - ០១:៥៧
“កូរ៉េខាងជើងបានបាញ់មីស៊ីលមួយប្រភេទឆ្ពោះទៅទិសខាងកើត” នេះបើតាមការជូនដំណឹងរបស់មេបញ្ជាការកងទ័ពកូរ៉េខាងត្បូង តាមរយៈសេចក្តីថ្លែងការណ៍មួយ។ បន្តិចក្រោយមក ឆ្មាំសមុទ្ទជប៉ុន បានបង្ហោះសារអាសន្នមួយស្តីពីការបាញ់មីស៊ីលអន្តរទ្វីបពីសំណាក់កូរ៉េខាងជើង ប្រាប់ទូកជប៉ុនដែរ។
ការវិភាគជប៉ុនបានបង្ហាញថា មីស៊ីលបាលីស្ទិករបស់កូរ៉េខាងជើង ហោះឡើងបានរយៈពេល ៧១នាទី និងបានធ្លាក់នៅវេលាម៉ោង១៥និង៤៤នាទីម៉ោងនៅជប៉ុន ក្នុងតំបន់សេដ្ឋកិច្ចផ្តាច់មុខ លើផ្ទៃនៃសមុទ្ទជប៉ុន ចម្ងាយប្រមាណតែ១៥០គីឡូម៉ែត្រពីជ្រោយអូស្ហ៊ីម៉ា Oshima (កោះខាងជើងបំផុតនៃតំបន់ហុកកៃដូ)។ នេះបើតាមសេចក្តីប្រកាសរបស់ក្រសួងការពារជាតិជប៉ុន។
បុរសខ្លាំងទីពីរនៃក្រសួងការពារជាតិជប៉ុន លោក ម៉ាកូតូ អូនីគី Makoto Oniki បានលម្អិតបន្ថែមទៀតថា មីស៊ីលដែលកូរ៉េខាងជើងបាញ់សាកល្បងថ្ងៃនេះ អាចជាមីស៊ីលបាលីស្ទិកអន្តរទ្វីបផង ព្រោះមីស៊ីលអាចហោះឡើងដល់រយៈកម្ពស់ជាង ៦ពាន់គីឡូម៉ែត្រ ពោលគឺ ខ្ពស់ខ្លាំងជាងមីស៊ីលអន្តរទ្វីប ICBM Hwasong-15 ដែលព្យុងយ៉ាងបានសាកល្បងកាលពីខែវិច្ឆិកា ២០១៧ទៀត។ តាមរយៈសម្មតិកម្មនេះគេអាចសន្និដ្ឋានបានថា ថ្ងៃនេះ កូរ៉េខាងជើងបានមីស៊ីលអន្តរទ្វីបប្រភេទថ្មី។
ជាមួយនឹងការបញ្ជាក់ថា បំណែកមីស៊ីលធ្លាក់មិនបានបង្កឱ្យមានការខូតខាតដល់នាវា ឬយន្តហោះ ក្រសួងការពារជាតិជប៉ុន បានចាត់ទុកការបាញ់សាកល្បងមីស៊ីលរបស់ព្យុងយ៉ាងថ្ងៃនេះ ថាជាការគំរាមកំហែងសន្តិសុខជប៉ុន យ៉ាងធ្ងន់ធ្ងរ។ លោក អូនីគី បានប្រកាសថា “នៅពេលដែលពិភពលោកកំពុងប្រឈមនឹងសង្គ្រាមឈ្លានពានរុស្ស៊ីនៅអ៊ុយក្រែន កូរ៉េខាងជើង បន្តបាញ់មីស៊ីល ផ្គើននិងបង្កហេតុដាក់សហគមន៍អន្តរជាតិជាឯកតោភាគីខ្លាំងឡើងៗ ដែលនេះជាទង្វើមិនអាចអត់ទោសឱ្យបានទេ”។
តាំងពីចូលឆ្នាំ២០២២មក ព្យុងយ៉ាងបានសាកល្បងមីស៊ីលយ៉ាងច្រើនមែនទែន ជាមីស៊ីលអ៊ីពែរសូនិកផង មីស៊ីលបាលីស្ទិករយៈមធ្យមផង។ កាលពីសប្តាហ៍មុន បើតាមសេអ៊ូល កូរ៉េខាងជើងបានបាញ់មីស៊ីលបាលីស្ទិកអន្តរទ្វីបដែរ តែត្រូវបរាជ័យ និងទំនងជាបានបាញ់រុកកែតជាច្រើនទៀត កាលពីថ្ងៃអាទិត្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ