ប៉ាគីស្ថាន៖នាយករដ្ឋមន្រ្តីថ្មីប្រគល់ក្រសួងសំខាន់ៗឲ្យគណបក្សធំចំនួនពីរដែលធ្លាប់ប្រជែងគ្នា
នៅក្នុងប្រទេសប៉ាគីស្ថាន នាយករដ្ឋមន្រ្តីថ្មីលោកស្ហេបា ស្ហារីហ្វបានបង្កើតរដ្ឋាភិបាលចម្រុះថ្មីនាថ្ងៃអង្គារ ទី១៩ មេសា។ រដ្ឋាភិបាលចម្រុះថ្មីនេះបានចូលរួមដោយគណបក្សដែលបានពួតដៃគ្នាទម្លាក់នាយករដ្ឋមន្រ្តីលោកអ៊ីមរ៉ាន់ ខាន់កាលពីថ្ងៃទី១០ មេសា។ តែក្រសួងសំខាន់ៗត្រូវបានលោកស្ហេបា ស្ហារីហ្វប្រគល់ទៅឲ្យគណបក្សសម្ព័ន្ធមូស្លីមប៉ាគីស្ថានរបស់លោក និងគណបក្សប្រជាជនប៉ាគីស្ថាន។ ទោះជាយ៉ាងនេះក្តី នាយករដ្ឋមន្រ្តីធ្លាក់ពីអំណាចលោកអ៊ីមរ៉ាន់ ខាន់បានសន្យាមិនទុកឲ្យរដ្ឋាភិបាលចម្រុះថ្មីនេះរស់បានយូរឡើយ។
ចុះផ្សាយនៅថ្ងៃ៖
ស្តាប់ - ០២:១៥
ក្រោយពីបានគ្របដណ្តប់ជីវិតនយោបាយប៉ាគីស្ថានអស់ជាច្រើនទស្សវតរ៍តាមរយៈការប្តូរគ្នាកាន់អំណាចម្តងម្នាក់ៗមក គណបក្សសម្ព័ន្ធមូស៊្លីមប៉ាគីស្ថាន និងគណបក្សប្រជាជនប៉ាគីស្ថានដែលធ្លាប់ប្រជែងគ្នាបានរួមគ្នាដឹកនាំប្រទេសម្តង។ នេះជាកុងសង់ស៊ុសដែលគណបក្សធំទាំងពីរ រួមទាំងគណបក្សតូចតាចមួយចំនួនបានពួតដៃគ្នាទម្លាក់នាយករដ្ឋមន្រ្តីលោកអ៊ីមរ៉ាន់ ខាន់កាលពីថ្ងៃទី១០ មេសាតាមរយៈញត្តិដកសេចក្តីទុកចិត្ត។ រដ្ឋាភិបាលចម្រុះថ្មីមានសមាជិកចំនួន ៣៧រូប ក្នុងនោះមានស្រ្តីចំនួន ៥រូប។ កំណត់សម្គាល់មួយទៀត នាយករដ្ឋមន្រ្តីថ្មីលោកស្ហេបា ស្ហារីហ្វបានយកក្រសួងសំខាន់ៗ ដូចជាការបរទេស ហិរញ្ញវត្ថុ ព័ត៌មាន ឬមហាផ្ទៃសម្រាប់ចែកចាយឲ្យគណបក្សធំទាំងពីរ។
កម្មវត្ថុអាទិភាពរបស់រដ្ឋាភិបាលចម្រុះថ្មីមានច្រើន រួមមាន ផ្សះផ្សា និងស្រោចស្រង់ទំនាក់ទំនងជាមួយបស្ចិមលោក ពិសេសជាមួយអាមេរិកដែលបានធ្លាក់ចុះខ្លាំងនៅក្នុងជំនាន់នាយករដ្ឋមន្រ្តីលោកអ៊ីមរ៉ាន់ ខាន់ បង្កើនទំនាក់ទំនងជាមួយមូលនិធិរូបិយវត្ថុអន្តរជាតិ IMF ដើម្បីទទួលបានប្រាក់កម្ចីដែលនៅសេសសល់ពីកញ្ចប់ប្រាក់កម្ចីចំនួន ៦ ០០០លានដុល្លារដែល IMF បានឲ្យប៉ាគីស្ថានខ្ចីកាលពីឆ្នាំ ២០១៩។ នៅក្នុងវិស័យសន្តិសុខ លោកស្ហេបា ស្ហារីហ្វត្រូវបន្តចរចាស្វែងរកសន្តិភាពជាមួយចលនាតាលីបង់ប៉ាគីស្ថានដែលបានបង្កើនការវាយប្រហារនារយៈពេលចុងក្រោយនេះ ពិសេសតាំងពីអាហ្វហ្កានីស្ថានបានធ្លាក់ក្នុងដៃពួកតាលីបង់ជាថ្មី។
អាទិភាពបន្ទាប់ គឺការស្រោចស្រង់វិបត្តិសេដ្ឋកិច្ចដែលប៉ាគីស្ថានបានផុងខ្លួនកាន់តែជ្រៅនារយៈពេលប៉ុន្មានខែចុងក្រោយនេះ។ តែមានសំណួរមួយចោទឡើងថា តើគណបក្សសម្ព័ន្ធមូស៊្លីមប៉ាគីស្ថាន និងគណបក្សប្រជាជនប៉ាគីស្ថានដែលធ្លាប់ប្រជែងគ្នាអាចធ្វើការជាមួយគ្នាបានដល់ពេលណាទៅ?។ នៅមិនទាន់មានចម្លើយចំពោះសំណួរនេះទេ។ តែសម្រាប់នាយករដ្ឋមន្រ្តីធ្លាក់ពីអំណាចលោកអ៊ីមរ៉ាន់ ខាន់វិញ លោកបានសន្យាបន្តការតស៊ូនយោបាយដោយអំពាវនាវឲ្យសកម្មជនចុះផ្លូវទាមទារឲ្យមានការរៀបចំបោះឆ្នោតសភាមុនអាណត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ