ស្រីលង្កា៖ប្រធានាធិបតីបានផាត់បក្សពួកមួយចំនួនចេញពីសមាសភាពរដ្ឋាភិបាលថ្មី
នៅក្នុងប្រទេសស្រីលង្កា ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សាបានបង្ហាញសមាភាពរដ្ឋាភិបាលថ្មីនាថ្ងៃចន្ទ ទី១៨ មេសា។ ការបង្ហាញសមាភាពរដ្ឋាភិបាលថ្មីនេះបានធ្វើឡើង ខណៈដែលប្រទេសកំពុងជួបវិបត្តិសេដ្ឋកិច្ចធ្ងន់ធ្ងរមិនធ្លាប់មានគិតតាំងពីទទួលបានឯករាជ្យក្នុងឆ្នាំ ១៩៤៨។ ជារៀងរាល់ថ្ងៃ ប្រជាជនបាននាំគ្នាធ្វើបាតុកម្មដើម្បីទាមទារឲ្យលោកហ្គោតាបាយ៉ា រ៉ាយ៉ាប៉ាក់សាចុះចេញពីតំណែង រួមទាំងបក្សពួក និងគ្រួសារត្រកូលរ៉ាយ៉ាប៉ាក់សា។ តើរដ្ឋាភិបាលថ្មីអាចដោះស្រាយវិបត្តិ និងរំងាប់កំហឹងរបស់ប្រជាជនបានដែរ ឬទេ?។
ចុះផ្សាយនៅថ្ងៃ៖
ស្តាប់ - ០២:២២
ប្រឈមនឹងសម្ពាធរបស់ចលនាមហាជន ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សាបានជ្រើសយកផ្លូវរៀបចំសមាភាពរដ្ឋាភិបាលថ្មីជាជាងចុះចេញពីតំណែងតាមការទាមទាររបស់ក្រុមបាតុករ។ មួយវិញទៀតនៅក្នុងសមាសភាពរដ្ឋាភិបាលថ្មីនេះ លោកហ្គោតាបាយ៉ា រ៉ាយ៉ាប៉ាក់សាក៏មិនបានប្តូររូបនាយករដ្ឋមន្រ្តីលោកម៉ាហ៊ីនដា រ៉ាយ៉ាប៉ាក់សាដែលជាបងប្រុសធំជាងគេរបស់លោកទេ។ តែអ្វីដែលថ្មីបន្តិចនៅក្នុងសមាសភាពរដ្ឋាភិបាលថ្មីមានពីរចំណុច ទី១ លោកហ្គោតាបាយ៉ា រ៉ាយ៉ាប៉ាក់សាបានដកប្អូនប្រុសចំនួន ២នាក់ រួមទាំងក្មួយប្រុសម្នាក់ចេញពីតំណែងរដ្ឋមន្រ្តី និងទី២ ចំនួនរដ្ឋមន្រ្តីត្រូវបានកាត់បន្ថយពី ២៨នាក់មកនៅត្រឹម ២១នាក់។
ថ្លែងនៅចំពោះមុខរដ្ឋាភិបាលថ្មី លោកហ្គោតាបាយ៉ា រ៉ាយ៉ាប៉ាក់សាបានទទួលស្គាល់ថា រដ្ឋាភិបាលចាស់បានប្រព្រឹត្តិកំហុសឆ្គងដោយបានហាមការនាំចូលផលិតផលមួយចំនួនចាប់ពីខែមីនាក្នុងឆ្នាំ ២០២០។ តែលោកភ្លេចគិតថា នាយករដ្ឋមន្រ្តីក្នុងរដ្ឋាភិបាលចាស់ និងនាយករដ្ឋមន្រ្តីក្នុងរដ្ឋាភិបាលថ្មីជាមនុស្សដដែល។ បន្ទាប់មក លោកហ្គោតាបាយ៉ា រ៉ាយ៉ាប៉ាក់សាបានសោកស្តាយចំពោះការលំបាករបស់ប្រជាជនដោយសារវិបត្តិសេដ្ឋកិច្ចដែលលោកទម្លាក់កំហុសលើកូវីដ១៩ និងថា ស្រីលង្កាគួរណាស់ចរចារកជំនួយពីអង្គការមូលនិធិរូបិយវត្ថុអន្តរជាតិ IMF ឲ្យបានមុននេះ។
គួរបញ្ជាក់ថា ស្រីលង្កាដែលមានពលរដ្ឋ ២២លាននាក់បានជួបការខ្វះខាតសព្វគ្រប់តាំងពីច្រើនខែ ពិសេសផលិតផលចាំបាច់ដូចជាអាហារ ប្រេងសាំង និងថ្នាំពេទ្យ។ នេះដោយនៅមិនទាន់រាប់បញ្ចូលពីការខ្វះភ្លើងអគ្គិសនីប្រើប្រាស់ដែលមានតំបន់ខ្លះបានដាច់ភ្លើងច្រើនម៉ោងក្នុងមួយថ្ងៃ។ ធ្ងន់ធ្ងរជាងនេះ ស្រីលង្កាបានប្រកាសក្នុងថ្ងៃ ទី១២ មេសាពីការខកខានសងបំណុលបរទេសដែលមានទឹកប្រាក់ ៥១ ០០០លានដុល្លារ។ វិបត្តិសេដ្ឋកិច្ចដែលស្រីលង្កាកំពុងឆ្លងកាត់ពេលនេះជាវិបត្តិសេដ្ឋកិច្ចដ៏អាក្រក់ខ្លាំងដែលប្រទេសមិនធ្លាប់ជួបប្រទះគិតតាំងពីទទួលបានឯករាជ្យក្នុងឆ្នាំ ១៩៤៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ