លង់ជ្រៅទៅក្នុងវិបត្តិសេដ្ឋកិច្ច ស្រីលង្កាខកខានមិនបានសងបំណុលអន្តរជាតិ
ញាំញី ដោយវិបត្តិសេដ្ឋកិច្ចដ៏ធ្ងន់ធ្ងរ មិនធ្លាប់មាន គិតចាប់តាំងពីទទួលបានឯករាជ្យនៅឆ្នាំ១៩៤៨ ស្រីលង្កា បានប្រកាសខកខានមិនបានសងប្រាក់បំណុលអន្តរជាតិ នៅថ្ងៃអង្គារទី ១២មេសានេះ។ខណៈដែលស្រីលង្កាកំពុងជួប វិបត្តិសេដ្ឋកិច្ច ដ៏អាក្រក់បំផុត ប្រជាជនស្រីលង្កាបានធ្វើបាតុកម្មជាបន្តបន្ទាប់ដើម្បីប្រឆាំងនឹងទំនិញឡើងថ្លៃ បញ្ហាខ្វះស្បៀង ថ្នាំពេទ្យ និងប្រេង។ ដោយសារបាតុកម្មដ៏ហិង្សា នៅទីក្រុងកូឡុំបូ រដ្ឋាភិបាលស្រីលង្កាសម្រេចប្រកាសដាក់ប្រទេសក្នុងស្ថានភាពអាសន្ន កាលពីថ្ងៃទី១មេសា។
ចុះផ្សាយនៅថ្ងៃ៖
ស្តាប់ - ០២:២៧
នៅថ្ងៃកំណត់ត្រូវសងបំណុល នៅថ្ងៃអង្គារនេះ រដ្ឋាភិបាលស្រីលង្កាបានប្រកាសខកខានមិនបានសងប្រាក់បំណុលអន្តរជាតិ។ នៅក្នុងសេចក្តីប្រកាសព័ត៌មានចុះផ្សាយនៅថ្ងៃអង្គារទី១២មេសា ក្រសួងហិរញ្ញវត្ថុស្រីលង្កាបានអះអាងថា ការប្រកាសខកខានមិនបានសងបំណុល គឺជាជម្រើសចុងក្រោយ ដើម្បីបង្ការកុំឲ្យចំណាត់ថ្នាក់ហិរញ្ញវត្ថុរបស់ប្រទេសស្រីលង្កាធ្លាក់ចុះអាក្រក់ជាងនេះ។
ដោយខកខានមិនបានសងបំណុលបរទេស នៅថ្ងៃអង្គារនេះ ក្រសួងហិរញ្ញវត្ថុស្រីលង្កា បានបញ្ជាក់ថា ម្ចាស់បំណុល របស់ស្រីលង្កាដែលអាចជារដ្ឋាភិបាលបរទេសនៅតែអាចមានជម្រើសពីរ។ ឬមួយគេដាក់បញ្ចូលការប្រាក់បំណុលដែលស្រីលង្កាត្រូវសងនៅថ្ងៃនេះ ទៅក្នុងបំណុលសរុប ឬមួយទៀត គេអាចទទួលបានការសងបំណុលដែរ ប៉ុន្តែ ដោយជាមួយនឹងលុយរូពីរបស់ស្រីលង្កា។
ស្រីលង្កាបានផុងកាន់តែជ្រៅ ទៅក្នុងវិបត្តិសេដ្ឋកិច្ច ចាប់តាំងពីកើតមានវិបត្តិជំងឺកូវីដ។ មានសេដ្ឋកិច្ចពឹងផ្អែកខ្លាំងលើទៅលើវិស័យទេសចរណ៍ ស្រីលង្កាបានបាត់បង់ប្រាក់ចំណូល និងជួបវិបត្តិខ្វះថវិកា។ ដើម្បីបន្តចិញ្ចឹមប្រទេស រដ្ឋាភិបាលគ្មានជម្រើសអ្វីក្រៅពីដកលុយពីហិបបម្រុងរូបិយបណ្ណបរទេស ទៅប្រើសម្រាប់ទិញនាំចូលទំនិញ ពីបរទេស។
គិតត្រឹមចុងខែវិច្ឆិកាឆ្នាំ ២០២១ ហិបបម្រុងរូបិយប័ណ្ណបរទេសរបស់ស្រីលង្កានៅសល់ប្រាក់តែ ១ ៥០០លានដុល្លារប៉ុណ្ណោះ។ ក្រៅពីការការផ្គត់ផ្គង់ក្នុងស្រុក រដ្ឋាភិបាលក៏ត្រូវការរូបិយប័ណ្ណបរទេសសម្រាប់សងម្ចាស់បំណុល ជាពិសេសចិន ដែលបានឲ្យ ស្រីលង្កាខ្ចី ដល់ទៅ ៣៥ ០០០លានដុល្លារ។ ប្រឈមនឹងការខ្វះខាតរូបិយប័ណ្ណបរទេស រដ្ឋាភិបាលស្រីលង្កា ធ្លាប់បានចេញបញ្ជា ហាមការនាំចូលមកពីបរទេស ក្នុងបំណងសន្សំរូបិយប័ណ្ណបរទេស ដើម្បីទុកសងម្ចាស់បំណុលបរទេស ដែលមានប្រមាណ ៧ពាន់លានដុល្លារ ក្នុងមួយឆ្នាំ។
នៅឆ្នាំមុន ទីភ្នាក់ងារអន្តរជាតិខាងវាយតម្លៃហានិភ័យបំណុលធ្លាប់បានទម្លាក់ចំណាត់ថ្នាក់របស់ស្រីលង្កា ដែលជាហេតុធ្វើឲ្យប្រទេសកោះមួយនេះ ជួបការលំបាកក្នុងការខ្ចីប្រាក់ នៅទីផ្សារអន្តរជាតិ។
ដោយសារតែគ្មានរូបិយប័ណ្ណបរទេសគ្រប់គ្រាន់សម្រាប់ទិញប្រេង និងនាំចូលទំនិញចាំបាច់ ស្រីលង្កាជួបវិបត្តិអតិផរណា ចំណីអាហារកាន់តែឡើងថ្លៃ ហើយនិងគ្មានប្រេងសម្រាប់រោងចក្រអគ្គិសនី ដែលជាហេតុធ្វើឲ្យប្រជាជនធ្វើបាតុកម្មទាមទារឲ្យរដ្ឋាភិបាលចុះចេញពីតំណែង នៅប៉ុន្មានសប្តាហ៍មកនេះ។
ប្រធានធនាគារកណ្តាលស្រីលង្កាបាននិយាយនៅថ្ងៃអង្គារនេះថា ស្រីលង្កាត្រូវការផ្តោតសំខាន់ទៅលើការនាំចូលទំនិញចាំបាច់ ជាជាងខ្វល់រឿងសងប្រាក់បំណុល។ លោកបានបន្ថែមថា ស្រីលង្កាសម្រេចផ្អាក មិនទាន់សងប្រាក់បំណុល រហូតដល់ថ្ងៃដែល ស្រីលង្ការកបានកិច្ចព្រមព្រៀងជាមួយ ម្ចាស់បំណុល និងជំនួយពីកម្មវិធី ផ្តល់ប្រាក់កម្ចីរបស់មូលនិធិរូបិយវត្ថុអន្តរជាតិ ដែលរដ្ឋាភិបាលស្រីលង្កា ត្រូវជួបពិភាក្សា នៅប៉ុន្មានថ្ងៃខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ