រដ្ឋធានីរបស់ស្រីលង្ការងរញ្ជួយដោយបាតុកម្មហិង្សាប្រឆាំងទំនិញឡើងថ្លៃ និងការខ្វះភ្លើងអគ្គិសនី
រដ្ឋធានីកូឡុំបូរបស់ស្រីលង្កាបានស្ថិតនៅក្រោមការយាម រក្សាសន្តិសុខយ៉ាងតឹងរ៉ឹង នៅថ្ងៃសុក្រនេះ នៅបន្ទាប់ពីមានបាតុកម្មដ៏ហិង្សាដុតបំផ្លាញ រថយន្តរបស់ប៉ូលិស និងទាហានកាលពីយប់ថ្ងៃព្រហស្បតិ៍ម្សិលមិញ។ វិបត្តិសេដ្ឋកិច្ច និងបញ្ហាខ្វះថាមពល ជាដើមហេតុធ្វើឲ្យប្រជាជនស្រីលង្កាផ្ទុះកំហឹង ចុះថ្នល់ធ្វើបាតុកម្ម ទាមទារឲ្យប្រធានាធិបតីចុះចេញពីអំណាច។
ចុះផ្សាយនៅថ្ងៃ៖
ស្តាប់ - ០២:២៥
ប៉ុន្មានថ្ងៃមកហើយ បាតុកម្មតវ៉ានឹងរឿងទំនិញឡើងថ្លៃ និងបញ្ហាខ្វះខាតថាមពល បានកើតឡើងពេញផ្ទៃប្រទេសស្រីលង្កា។ ប៉ុន្តែ បាតុកម្មទ្រង់ទ្រាយធំ និងហិង្សាទើបចាប់រាលដាលខ្លាំងដល់រដ្ឋធានីកូឡុំបូ នៅថ្ងៃព្រហស្បតិ៍ នៅបន្ទាប់ពីប្រជាជនចាប់ផ្ទុះកំហឹងខ្លាំង ដោយសារតែរឿងខ្វះប្រេង។
នៅថ្ងៃព្រហស្បតិ៍ គេមិនអាចរកទិញប្រេងម៉ាសូតនៅគ្រប់ស្ថានីយ៍ប្រេង នៅទូទាំងប្រទេស។ ដោយសារតែគ្មានប្រេងម៉ាស៊ូត រដ្ឋាភិបាលស្រីលង្កាបានសម្រេចកាត់ផ្តាច់ភ្លើងអគ្គិសនី ចំនួន១៣ម៉ោង កាលពីថ្ងៃព្រហស្បតិ៍។ គ្មានភ្លើងប្រើប្រាស់ ចំនួន១៣ម៉ោង គឺជាថេរវេលាដ៏វែង ដែលស្រីលង្កាមិនធ្លាប់ជួបប្រទះ ចាប់តាំងពីបានទទួលឯករាជ្យកាលពីឆ្នាំ ១៩៤៨។
គ្មានប្រេងឥន្ធនៈ ទំនិញឡើងថ្លៃសព្វសារពើ រួមផ្សំនឹងការខ្វះខាតទំនិញចាំបាច់ សម្រាប់ជីវភាពប្រចាំថ្ងៃ ជាហេតុផលចំបងដែលជំរុញឲ្យប្រជាជនស្រីលង្កាផ្ទុះកំហឹង និងលើកគ្នាទៅធ្វើបាតុកម្ម នៅមុខគេហដ្ឋានរបស់លោកប្រធានាធិបតី ហ្គោតាបាយ៉ា រ៉ាយ៉ាប៉ាក់សា ដោយបានទាមទារឲ្យប្រធានាធិបតី ព្រមទាំងបងប្អូន សមាជិកគ្រួសាររបស់លោកប្រធានាធិបតីចុះចេញពីតំណែងរដ្ឋាភិបាល។
សូមបញ្ជាក់ថា បងប្រុសរបស់ប្រធានាធិបតីស្រីលង្កា គឺលោកម៉ាហ៊ីនដា(Mahinda)ជានាយករដ្ឋមន្ត្រី នៅពេលប្អូនប្រុសរបស់លោក គឺបាស៊ីល(Basil) កាន់តំណែងជារដ្ឋមន្ត្រីហិរញ្ញវត្ថុ ខណៈបងប្រុសច្បងគឺលោក ចាម៉ាល់(Chamal)ជារដ្ឋមន្ត្រីកសិកម្ម ហើយក្មួយប្រុសរបស់លោក ឈ្មោះណាម៉ាល់( Namal)ទទួលបន្ទុកផ្នែកកីឡា។
នៅមុខគេហដ្ឋានរបស់ប្រធានាធិបតី បាតុករបានដុតឡានក្រុងរបស់ប៉ូលិស និងទាហានពីរគ្រឿង និងប្រើដុំថ្មគប់ទៅលើក្រុមប៉ូលិស។ តាមប៉ូលិស ស្រីលង្កា មនុស្ស៦នាក់រងរបួស ចំណែកមនុស្ស៤៥នាក់ត្រូវបានចាប់ខ្លួន នៅក្នុងការប្រឈមមុខ ដាក់គ្នារវាងបាតុករ និងប៉ូលិស កាលពីយប់ម្សិលម៉ិញ។
ប្រធានាធិបតីស្រីលង្កាដែលគ្មានវត្តមាននៅគេហដ្ឋាននៅយប់ថ្ងៃកើតហេតុ បានចេញសេចក្តីថ្លែងការណ៍ចោទប្រកាន់បាតុករស្រីលង្កាថា កំពុងចង់ធ្វើបដិវត្តន៍អារ៉ាប់ នៅស្រីលង្កា។ បដិវត្តន៍អារ៉ាប់ដែលផ្ទុះឡើងដោយសារវិបត្តិសេដ្ឋកិច្ច កំហឹងរបស់ប្រជាជនដោយសារអំពើពុករលួយ។
ស្រីលង្កាបានធ្លាក់ខ្លួនក្នុងវិបត្តិសេដ្ឋកិច្ចកាន់តែខ្លាំង ដោយសារវិធានការរឹតត្បិតដើម្បីប្រឆាំងការឆ្លងរាលដាលជំងឺកូវីដ ដែលបានទៅសម្លាប់វិស័យទេសចរណ៍ ដែលជាប្រភពចំណូលសំខាន់សម្រាប់សេដ្ឋកិច្ច។ នៅថ្ងៃសុក្រ តួលេខរដ្ឋាភិបាលបង្ហាញថា អត្រាអតិផរណាបានកើនឡើងដល់១៨%នៅខែមីនា ចំណែកចំណីអាហារបានកើនឡើងខ្ពស់បំផុត ប្រមាណ ៣០%។
ស្រីលង្កាចាប់ផ្តើមជួបការខ្វះខាតមុខទំនិញចាំបាច់ ដែលនៅក្នុងនោះមានផងដែរ ថ្នាំពេទ្យរហូតធ្វើឲ្យមន្ទីរពេទ្យ នៅតាមរដ្ឋជាច្រើនសម្រេចផ្អាកដំណើរការវះកាត់អ្នកជំងឺ។ តាមអ្នកជំនាញ ដោយសារតែការគ្រប់គ្រងមិនបានល្អ រដ្ឋាភិបាលស្រីលង្កាខ្វះខាតរូបិយបណ្ណបរទេស ដើម្បីអាចទិញ នាំទំនិញចូលពីបរទេស។
គួរបញ្ជាក់ថា កាលពីឆ្នាំ ២០២០ រដ្ឋាភិបាលស្រីលង្កាធ្លាប់បានចេញបញ្ជា ហាមការនាំចូលមកពីបរទេស ក្នុងបំណងសន្សំរូបិយបណ្ណបរទេស ដើម្បីទុកសងទៅម្ចាស់បំណុលបរទេស ប្រមាណ ៧ពាន់លានដុល្លារ ក្នុងមួយឆ្នាំ។ ក្នុងចំណោមប្រាក់បំណុលសរុប៥១ពាន់លានដុល្លារ មួយភាគធំ ជាបំណុលដែលស្រីលង្កាខ្ចីពីប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ