កូរ៉េខាងជើង៖គីម ជុងអ៊ុនបានអះអាងនាឱកាសព្យុះហយាត្រាកងទ័ពពីការចង់ពង្រឹងសមត្ថភាពនុយក្លេអ៊ែរ
នៅថ្ងៃអង្គារ ទី២៦ មេសា កូរ៉េខាងជើងបានប្រារព្ធខួបគម្រប់ ៩០ឆ្នាំនៃការបង្កើតកងទ័ពប្រជាមានិតកូរ៉េ។ ពិធីនេះបានរៀបចំឡើងដោយមានការដង្ហែរក្បួនព្យុះហយាត្រាកងទ័ពនៅលើទីលានគីម អ៊ីលស៊ុងក្នុងក្រុងព្យុងយ៉ាង។ នាឱកាសដ៏មហាឡារឹកនោះ មេដឹកនាំលោកគីម ជុងអ៊ីលបានថ្លែងសុន្ទរកថាដោយបញ្ជាក់ពីការចង់ពង្រឹងសមត្ថភាពអាវុធនុយក្លេអ៊ែរដែលលោកយល់ថា ជានិមិត្តរូបនៃកម្លាំងជាតិ និងជាបេះដូងនៃកម្លាំងទ័ពដ៏ខ្លាំងរបស់កូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:០០
នៅកូរ៉េខាងជើង ខែមេសាជាខែប្រារព្ធខួបសំខាន់ចំនួនពីររបស់ប្រទេសទី១ ជាខួបកំណើតលោកគីម អ៊ីលស៊ុងដែលជាស្ថាបនិកកូរ៉េខាងជើង និងទី២ ជាខួបកំណើតកងទ័ពប្រជាមានិតកូរ៉េ។ សម្រាប់ឆ្នាំ ២០២២ នេះ ថ្ងៃទី១៥ មេសាជាខួបកំណើត ១១០ឆ្នាំរបស់លោកគីម អ៊ីលស៊ុង និងថ្ងៃទី២៦ មេសាជាខួប ៩០ឆ្នាំនៃការបង្កើតកងទ័ពប្រជាមានិតកូរ៉េ។ គឺនៅក្នុងឱកាសខួបកំណើតកងទ័ពនេះដែលក្រុងព្យុងយ៉ាងបានរៀបចំក្បួនព្យុះហយាត្រាកងទ័ពយ៉ាងអធិកអធមដោយមានដង្ហែរក្បួនរថក្រោះ គ្រាប់មីស៊ីល និងការបាញ់កាំជ្រួច។
នៅក្នុងសុន្ទរកថានាឱកាសនោះ មេដឹកនាំគីម ជុនអ៊ុនបញ្ជាក់ពីឆន្ទៈចង់បន្តបង្កើន និងពង្រឹងសមត្ថភាពអាវុធនុយក្លេអ៊ែររបស់កូរ៉េខាងជើង។ តាមគីម ជុងអ៊ុន អាវុធនុយក្លេអ៊ែរដែលជានិមិត្តរូបនៃកម្លាំងជាតិ និងជាបេះដូងនៃកម្លាំងទ័ពដ៏ខ្លាំងត្រូវតែពង្រឹងទាំងគុណភាព និងការបាញ់បានកាន់តែឆ្ងាយ។ មានការកត់សម្គាល់ថា គ្រាប់មីស៊ីលដែលកូរ៉េខាងជើងបានបង្ហាញពេលនេះនៅមិនទាន់បានបាញ់សាកល្បងនៅឡើយទេ។ តែក្រុមអ្នកវិភាគ និងក្រុមអ្នកទទួលខុសត្រូវអាមេរិក រួមទាំងកូរ៉េខាងត្បូងបានយល់ឃើញថា កូរ៉េខាងជើងអាចនឹងសាកល្បងអាវុធនុយក្លេអ៊ែររបស់ខ្លួននាពេលឆាប់ៗខាងមុខ។
កាលពីថ្ងៃចន្ទ ទី២៥ មេសា គីម ជុងអ៊ុនបានព្រមានពីការអាចប្រើអាវុធនុយក្លេអ៊ែរនៅពេលដែលផលប្រយោជន៍របស់ប្រទេសទទួលការគំរាមកំហែង។ ក្រុមអ្នកវិភាគបានមើលឃើញថា ការព្រមានរបស់គីម ជុងអ៊ុនអាចជាសារបញ្ជូនត្រង់ទៅកាន់ប្រធានាធិបតីកូរ៉េខាងត្បូងជាប់ឆ្នោតថ្មីថ្មោងលោកយូន ស៊ុកយោលដែលត្រូវចូលកាន់តំណែងជាផ្លូវការនៅថ្ងៃទី១០ ឧសភាខាងមុខ។ លោកយូន ស៊ុកយោលធ្លាប់បានចាត់ទុកកូរ៉េខាងជើងជាសត្រូវទី១ របស់កូរ៉េខាងត្បូង និងបានសន្យាប្រកាន់ជំហរតឹងរឹងទល់នឹងការបង្ករឿងរបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ