ស្រីលង្កា ធ្វើកុប្បកម្មទូទាំងប្រទេសដើម្បីទម្លាក់រដ្ឋាភិបាល
មធ្យោបាយដឹកជញ្ជូនសាធារណៈឈប់ស្ងៀមទ្រឹង ការិយាល័យរដ្ឋបាលគ្មានមនុស្សធ្វើការម្នាក់សោះ នៅថ្ងៃសុក្រទី ៦ឧសភា ២០២២នេះ នៅទូទាំងប្រទេសស្រីលង្កា។ ស្រីលង្កាបាននាំគ្នាធ្វើកុប្បកម្មថ្នាក់ជាតិ ដើម្បីទម្លាក់រដ្ឋាភិបាលដែលកំពុងដឹកនាំប្រទេស ប្រឈមនឹងវិបត្តិសេដ្ឋកិច្ចដ៏ធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០២:១៥
ក្រោមការអំពាវនាវរបស់សហជីព បុគ្គលិក កម្មករ អ្នកធ្វើការ រាប់លាននាក់ បាននាំគ្នាចុះរារាំងផ្លូវមិនឱ្យរថភ្លើងអាចធ្វើចរាចរណ៍បានទេ។ ឡានក្រុងឯកជន ក៏ឈប់ស្ងៀមនៅ(បេន)ស្ថានីយ៍ដែរ។ កម្មករកាត់ដេរ ចេញធ្វើបាតុកម្មនៅមុខរោងចក្រ លើកទង់ជាតិខ្មៅ ស្ទើរទូទាំងប្រទេស ដើម្បីបង្ហាញកំហឹងដែលមានចំពោះរដ្ឋាភិបាល។ សិស្សនិស្សិតរាប់ពាន់នាក់បានប៉ុនប៉ងសម្រុកចូលរដ្ឋសភាជាតិ តែត្រូវប៉ូលិសបំបែក ដោយបាញ់ឧស្ម័នបង្ហូរទឹកភ្នែក។
មេដឹកនាំសហជីព បានអះអាងថារកឃើញកំហុសនយោបាយរបស់ប្រធានាធិបតីស្រីលង្កាដែលរុញសេដ្ឋកិច្ចជាតិឱ្យធ្លាក់ត្រដាបត្រដួស។ ដូច្នេះប្រធានាធិបតីនេះត្រូវតែចុះចេញពីតំណែង។ ប៉ុន្តែលោកប្រធានាធិបតី បានបញ្ជាក់ជាលើកច្រើនសាហើយថាលោកមិនចុះចេញពីតំណែងទេ បើទោះបីមានបាតុកម្មធំ ហើយបាតុករទៅបោះទីតាំងនៅមុខគេហដ្ឋានប្រធានាធិបតីតាំងពីជាច្រើនថ្ងៃមកហើយក៏ដោយ។
សូមរំលឹកថា ក្រោយវិបត្តិកូវីដ ប្រភពចំណូលនិងដង្ហើមសេដ្ឋកិច្ចដែលរំពឹងយ៉ាងខ្លាំងលើវិស័យទេសចរណ៍ បានរីងស្ងួត ស្រីលង្កាពេលនេះ កំពុងប្រឈមនឹងវិបត្តិសេដ្ឋកិច្ចដ៏អាក្រក់បំផុតមិនធ្លាប់មានទេ គិតចាប់តាំងពីប្រទេសបានទទួលឯករាជ្យនៅឆ្នាំ១៩៤៨មក។ តាំងពីប៉ុន្មានខែមកហើយ ដែលស្រីលង្កា ត្រូវប្រឈមនឹងការផ្តាច់ចរន្តអគ្គីសនី កង្វះស្បៀងអាហារ ប្រេង និងថ្នាំសង្កូវ។ ស្រីលង្កាលែងមានលទ្ធភាពនាំប្រេងចូល សេវាសាធារណៈត្រូវបង្ខំចិត្តកាត់ភ្លើងជារៀងរាល់ថ្ងៃ ប្រជាពលរដ្ឋត្រូវតម្រង់ជួរយ៉ាងវែងនៅតាមស្ថានីយ៍ប្រេងដើម្បីទិញសាំង ឬប្រេងកាត។ មន្ទីរពេទ្យអស់ថ្នាំសំខាន់ៗនិងចាំបាច់ដែលតម្រូវឱ្យរដ្ឋាភិបាលបានអំពាវនាវសុំជំនួយពីប្រជាពលរដ្ឋស្រីលង្ការស់នៅក្រៅប្រទេស។
ស្ថានភាពកាន់តែធ្ងន់ធ្ងរទៅៗ រហូតជំរុញឱ្យប្រជាពលរដ្ឋចុះធ្វើបាតុកម្មទ្រង់ទ្រាយទាមទារទម្លាក់រដ្ឋាភិបាល។ កាលពីថ្ងៃទី ១២មេសា ស្រីលង្កាបានថែមទាំងប្រកាសខកខានមិន សងបំណុលអន្តរជាតិចំនួន ៥១ពាន់លានដុល្លារទៀត។ គ្មានទស្សនវិស័យល្អក្នុងពេលឆាប់ៗទេ បើតាមរដ្ឋមន្ត្រីក្រសួងហិរញ្ញវត្ថុ លោក អាលី សាប្រី វិបត្តិសេដ្ឋកិច្ចស្រីលង្កាអាចអូសបន្លាយយូរដល់ទៅពីរឆ្នាំទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ