ស្រីលង្កា៖គ្រួសារត្រកូលរ៉ាយ៉ាប៉ាក់សេកំពុងប្រឈមនឹងការខ្ទាតចេញពីឆាកនយោបាយ?
ប្រទេសស្រីលង្កាកំពុងបន្តផុងខ្លួនកាន់តែជ្រៅទៅក្នុងវិបត្តិសេដ្ឋកិច្ច និងនយោបាយ។ ប្រឈមនឹងការប៉ះទង្គិចគ្នាយ៉ាងហិង្សារវាងក្រុមបាតុករប្រឆាំងរដ្ឋាភិបាល និងក្រុមបាតុករគាំទ្ររដ្ឋាភិបាលនៅថ្ងៃចន្ទ ទី៩ ឧសភា នាយករដ្ឋមន្រ្តីលោកម៉ាហ៊ីនដា រ៉ាយ៉ាប៉ាកសេបានព្រមលាចុះពីតំណែង។ បន្ទាប់មក ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សេដែលជាប្អូនប្រុសបានប្រកាសដាក់បំរាមគោចរ និងបានដាក់ពង្រាយកម្លាំងប៉ូលិស និងទាហានជាច្រើនពាន់នាក់នាថ្ងៃអង្គារ ទី១០ ឧសភាដើម្បីធានាពីការគោរពបំរាមគោចរ។ តែទោះជាយ៉ាងនេះក្តី ស្ថានការណ៍ហាក់កំពុងបន្តពុះកញ្រ្ជោលខ្លាំង។ គួររម្លឹកថា ស្រីលង្កាដែលមានពលរដ្ឋ ២២លាននាក់កំពុងបន្តផុងខ្លួនកាន់តែជ្រៅទៅក្នុងវិបត្តិសេដ្ឋកិច្ច។ អស់ជាច្រើនសប្តាហ៍ដែលប្រជាជនធ្វើបាតុកម្មទាមទារឲ្យប្រធានាធិបតី និងនាយករដ្ឋមន្រ្តីចុះចេញពីតំណែង។ លោកម៉ាត់ចាប៉ារ៉ាណាន់ អាប្រាហាំ ស៊ូម៉ាន់ធីរ៉ាន់ តំណាងរាស្រ្តបក្សប្រឆាំងបានយល់ឃើញថា ដំណោះស្រាយសម្រាប់វិបត្តិសព្វថ្ងៃ គឺការដកខ្លួនពីឆាកនយោបាយរបស់គ្រួសារត្រកូលរ៉ាយ៉ាប៉ាក់សេទាំងអស់។ ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សេក៏ត្រូវចុះចេញពីតំណែងដែរ។
ចុះផ្សាយនៅថ្ងៃ៖
ស្តាប់ - ០១:២៩
« ខ្ញុំគិតថា ប្រធានាធិបតីត្រូវតែចុះចេញពីតំណែងភ្លាម។ បើគ្មានការលាឈប់ពីតំណែងរបស់ប្រធានាធិបតីទេ នោះវិបត្តិនឹងគ្មានថ្ងៃបញ្ចប់ឡើយ។ អស់រយៈពេល ៣១ថ្ងៃមកហើយដែលក្រុមបាតុករអហិង្សាបានអំពាវនាវឲ្យប្រធានាធិបតីចុះចេញពីតំណែង។ ក្រុមបាតុករសន្តិវិធីទាំងនេះមិនបានបង្កអំពើហិង្សាអ្វីទាំងអស់។
គឺទើបតែនៅថ្ងៃចន្ទ ទី៩ ឧសភាដែលមានផ្ទុះអំពើហិង្សាប្រឆាំងនឹងក្រុមបាតុករអហិង្សាទាំងនោះ។ ពួកគេបានរងការវាយប្រហារពីក្រុមអ្នកគាំទ្រនាយករដ្ឋមន្រ្តីលោកម៉ាហ៊ីនដា រ៉ាយ៉ាប៉ាក់សេ។ ក្រុមសកម្មជនគាំទ្រនាយករដ្ឋមន្រ្តីត្រូវបានគេកែនប្រមូលឲ្យត តាំងទល់នឹងក្រុមបាតុករអហិង្សាប្រឆាំងរដ្ឋាភិបាលក្នុងទីក្រុងកូឡុំបូ។
នៅក្នុងទីក្រុង ក្រុមបាតុករប្រឆាំងរដ្ឋាភិបាលបានរក្សាភាពអហិង្សារបស់ពួកគេ។ តែនៅទីកន្លែងផ្សេងទៀតក្នុងប្រទេស ក្រុមបាតុករប្រឆាំងរដ្ឋាភិបាលខឹងសម្បារ និងបានវាយប្រហារលើក្រុមសកម្មជនគាំទ្ររដ្ឋាភិបាលវិញដែលនាំឲ្យការប្រឈមមុខ និងការប៉ះទង្គិចគ្នាបន្តមានជាហូរហែ។ ខ្ញុំសូមបញ្ជាក់ម្តងទៀត ដើមចមសំខាន់នៃវិបត្តិពេលនេះ គឺរូបប្រធានាធិបតី ហើយគាត់ត្រូវតែចុះចេញពីតំណែងភ្លាម »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ