ចិនឆ្លើយតបនឹងអាមេរិកដោយយល់ថា សម្តីរបស់ប្រមុខការទូតអាមេរិកជាការមូលបង្កាច់ចិន
នៅថ្ងៃសុក្រ ទី២៧ ឧសភា ប្រទេសចិនតាមរយៈអ្នកនាំពាក្យក្រសួងការបរទេសលោកវ៉ាង វ៉េនប៊ីនបានបញ្ចេញប្រតិកម្មតបនឹងសកុន្ទរកថារបស់ប្រមុខការទូតអាមេរិកលោកអង់តូនី ប៊្លីនកិន។ លោកប៊្លីនកិនដែលបានថ្លែងក្នុងថ្ងៃព្រហស្បតិ៍ ទី២៦ ឧសភាថា ចិនជាប្រទេសតែមួយគត់ដែលចង់កែប្រែសណ្តាប់ធ្នាប់ពិភពលោក និងតម្លៃសកល។ លោកវ៉ាង វ៉េនប៊ីនបានយល់ឃើញថា ពាក្យសម្តីរបស់លោកប៊្លីនកិនមានលក្ខណៈមូលបង្កាច់ប្រទេសចិន។
ចុះផ្សាយនៅថ្ងៃ៖
ស្តាប់ - ០១:៥៨
សម្រាប់អ្នកនាំពាក្យក្រសួងការបរទេសចិនលោកវ៉ាង វ៉េនប៊ីន សុន្ទរកថារបស់ប្រមុខការទូតអាមេរិកលោកអង់តូនី ប៊្លីនកិនមានគោលដៅបិទខ្ទប់ និងរារាំងការអភិវឌ្ឍន៍របស់ប្រទេសចិន និងដើម្បីរក្សាអនុត្តរភាព និងអំណាចរបស់អាមេរិក។ តាមរយៈសុន្ទរកថាមួយនេះ លោកប៊្លីនកិនបានសាបព្រោះនូវព័ត៌មានមិនពិត បានបំផ្លើសពីការគំរាមកំហែងរបស់ចិន បានលូកដៃកកូរកកាយនៅក្នុងកិច្ចការផ្ទៃក្នុងរបស់ចិន និងបានមូលបង្កាច់នយោបាយផ្ទៃក្នុង និងនយោបាយការបរទេសរបស់ចិន នេះជាការបន្ថែមលោកវ៉ាង វ៉េនប៊ីន។
ប្រតិកម្មវាយបកចាស់ដៃនឹងអាមេរិកបានធ្វើឡើង ក្រោយពីប្រមុខការទូតអាមេរិកលោកអង់តូនី ប៊្លីនកិនបានថ្លែងក្នុងថ្ងៃព្រហស្បតិ៍ ទី២៦ ឧសភាថា ចិនជាប្រទេសតែមួយគត់ដែលមានបំណងចង់ផ្លាស់ប្តូរសណ្តាប់ធ្នាប់អន្តរជាតិ និងមានលទ្ធភាពកាន់តែច្រើនដើម្បីធ្វើនៅក្នុងវិស័យសេដ្ឋកិច្ច ការទូត យោធា និងបច្ចេកវិទ្យា។ លោកប៊្លីនកិនយល់ថា ចក្ខុវិស័យរបស់ចិនកំពុងនាំពិភពលោកឲ្យចាកចេញពីតម្លៃសកលដែលបានគាំទ្រដល់ការរីកចម្រើនជាច្រើនរបស់ពិភពលោកនារយៈពេល ៧៥ឆ្នាំចុងក្រោយនេះ។
នៅក្នុងសុន្ទរកថាដដែល លោកប៊្លីនកិនក៏បានបរិហារលើអាកប្បកិរិយារបស់ចិនទៅលើតៃវ៉ាន់ដោយមិនភ្លេចបញ្ជាក់ថា នយោបាយរបស់អាមេរិកចំពោះតៃវ៉ាន់មិនមានការផ្លាស់ប្តូរទេ។ ការបញ្ជាក់របស់លោកប៊្លីនកិនបានធ្វើឡើង បន្ទាប់ពីប្រធានាធិបតីអាមេរិកលោកបៃដិនបានថ្លែងដល់ទៅពីរដងនារយៈពេលចុងក្រោយនេះដោយបញ្ជាក់ថា អាមេរិកត្រៀមខ្លួនរួចជាស្រេចដើម្បីការពារតៃវ៉ាន់តាមផ្លូវយោធា។ យ៉ាងណាក៏ដោយ លោកប៊្លីនកិនបានធានាថា អាមេរិកមិនស្វែងរកជម្លោះ ឬបញ្ឆេះសង្រ្គាមត្រជាក់ថ្មីទេ។
ផ្ទុយទៅវិញ និងបើតាមលោកប៊្លីនកិន អាមេរិកបានប្តេជ្ញាចិត្តដើម្បីបញ្ជៀសជម្លោះ ឬសង្រ្គាមត្រជាក់ថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ