ជនជាតិរ៉ូហ៊ីងយ៉ាប្រមាណជា ៦០នាក់ប្រឈមនឹងការបណ្តេញចេញពីថៃទៅភូមាវិញ
នៅក្នុងប្រទេសថៃ មន្រ្តីប៉ូលិសម្នាក់បានថ្លែងក្នុងថ្ងៃអាទិត្យ ទី៥ មិថុនាពីការរកឃើញជនជាតិរ៉ូហ៊ីងយ៉ាចំនួន ៥៩នាក់ ក្នុងនោះមានកូនក្មេងចំនួន ៥នាក់នៅលើកោះមួយស្ថិតប៉ែកខាងត្បូង។ តាមមន្រ្តីប៉ូលិសថៃរូបនេះដដែល ជនជាតិរ៉ូហ៊ីងយ៉ាទាំង ៥៩នាក់បានភៀសខ្លួនតាមកាណូតចេញពីភូមាទៅកាន់ប្រទេសម៉ាឡេស៊ី និងប្រហែលត្រូវបានក្រុមអ្នករត់ពន្ធមនុស្សទម្លាក់ចោលនៅលើកោះនោះ។ ប៉ូលិសថៃបានបើកការស៊ើបអង្កេតដើម្បីចង់ដឹងថា តើពួកគេជាជនរងគ្រោះដោយការរត់ពន្ធមនុស្ស ឬមួយបានចូលទឹកដីថៃដោយខុសច្បាប់។
ចុះផ្សាយនៅថ្ងៃ៖
ស្តាប់ - ០២:០៤
ការរកឃើញជនជាតិរ៉ូហ៊ីងយ៉ានៅក្នុងប្រទេសថៃ ទោះនៅរស់ ឬស្លាប់មិនមែនជារឿងថ្មីទេ ព្រោះថៃជាទឹកដីដែលពួកអ្នកកាន់សាសនាអ៊ីស្លាមរស់ក្នុងប្រទេសភូមាមួយនេះបានឆ្លងកាត់ដើម្បីធ្វើដំណើរទៅកាន់ប្រទេសម៉ាឡេស៊ី។ ជារៀងរាល់ឆ្នាំ មានជនជាតិរ៉ូហ៊ីងយ៉ាងជាច្រើនពាន់នាក់បានរត់ភៀសខ្លួនដោយចំណាយលុយច្រើន និងដោយផ្សងសំណាងតាមទូកអស់ជាច្រើនខែ។ ប៉ូលិសថៃបានបញ្ជាក់នៅក្នុងសេចក្តីប្រកាសព័ត៌មានថា ជនជាតិរ៉ូហ៊ីងយ៉ាទាំង ៥៩នាក់ ក្នុងនោះមានក្មេង ៥នាក់ដែលបានរកឃើញនៅលើកោះមួយបានជាប់ចោទពីបទចូលទឹកដីថៃដោយខុសច្បាប់ និងត្រូវប្រឈមចាប់បញ្ជូនទៅកាន់ភូមាវិញ។
តាមសេចក្តីប្រកាសព័ត៌មានរបស់ប៉ូលិសថៃដដែល ជនជាតិរ៉ូហ៊ីងយ៉ាទាំង ៥៩នាក់មានសភាពហេវហត់ និងប្រហែលជាគ្មានអ្វីទទួលទានតាំងពី ៣ថ្ងៃ ៥ថ្ងៃមកហើយ។ ពួករ៉ូហ៊ីងយ៉ាបានប្រាប់ប៉ូលិសថៃថា មានកាណូតចំនួន ៣គ្រឿង និងមានជនជាតិរ៉ូហ៊ីងយ៉ាសរុបចំនួន ១៧៨នាក់បានចាកចេញពីភូមា និងបង់ក្លាដែសដោយម្នាក់បានបង់លុយចំនួន ១ ២០០ដុល្លារ។ នៅក្នុងចំណោមកាណូតទាំង ៣គ្រឿង មាន ២គ្រឿងដែលដឹកពួករ៉ូហ៊ីងយ៉ាចំនួន ១១៩នាក់ត្រូវបានប៉ូលិសម៉ាឡេស៊ីចាប់ឃាត់ និងមួយគ្រឿងទៀតត្រូវបានម្ចាស់កាណូតដឹកទៅទម្លាក់លើកោះមួយរបស់ថៃដោយបានប្រាប់ពួកគេថាជាកោះរបស់ម៉ាឡេស៊ី។
ក្នុងខែឧសភាកន្លងទៅថ្មីៗនេះ ថៃបានរកឃើញសាកសពជនជាតិរ៉ូហ៊ីនយ៉ាចំនួន ១៤នាក់ក្នុងនោះមានក្មេងនៅលើឆ្នេរមួយក្រោយពីពួកបានព្យាយាមរត់ចេញពីភូមា។ គួរបញ្ជាក់ថា ម៉ាឡេស៊ីដែលប្រជាជនភាគច្រើនជាអ្នកកាន់សាសនាអ៊ីស្លាមជាគោលដៅសំខាន់របស់ពួករ៉ូហ៊ីងយ៉ាដែលរត់ចេញពីជំរំជនភៀសខ្លួនក្នុងប្រទេសបង់ក្លាដែស ឬរត់គេចពីការធ្វើទុកបុកម្នេញនៅក្នុងប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ