អាមេរិកចាត់ទុកទង្វើរបស់កងទ័ពភូមាលើជនជាតិរ៉ូហ៊ីងយ៉ាថាជាអំពើប្រល័យពូជសាសន៍
នៅថ្ងៃចន្ទ ២១មីនា ឆ្នាំ២០២២នេះ សហរដ្ឋអាមេរិកនឹងប្រកាសជាផ្លូវការចាត់ទុកអំពើហិង្សាប្រព្រឹត្តដោយកងទ័ពភូមាលើជនជាតិភាគតិចរ៉ូហ៊ីងយ៉ាថាជាអំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ។ ចំណាត់ការរបស់អាមេរិកនេះទទួលបានការស្វាគមន៍ភ្លាមៗពីសកម្មជនសិទ្ធិមនុស្ស និងសហគមន៍ជនជាតិភាគតិចរ៉ូហ៊ីងយ៉ាកាន់សាសនាអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:០៩
សហរដ្ឋអាមេរិកនឹងប្រកាសចាត់ទុកទង្វើរបស់កងទ័ពភូមាទៅលើជនជាតិរ៉ូហ៊ីងយ៉ាថាជាអំពើប្រល័យពូជសាសន៍ និងជាឧក្រិដ្ឋកម្មប្រឆាំងមនុស្សជាតិ នៅមួយខែក្រោយរបបសឹកភូមាឡើងតុលាការយុត្តិធម៌អន្តរជាតិ (ICJ) ប្រឆាំងនឹងបទចោទប្រកាន់ប្រល័យពូជសាសន៍រ៉ូហ៊ីងយ៉ានេះ។
ប្រមុខការបរទេសអាមេរិកលោកអង់តូនី ប្ល៊ីងកិន នឹងប្រកាសសេចក្តីសម្រេចរបស់អាមេរិកនាថ្ងៃចន្ទនេះនៅក្នុងសុន្ទរកថាមួយ នៅឯសារមន្ទីរ Holocaust ក្នុងទីក្រុងវ៉ាស៊ីនតោនដែលជាទីមានតាំងពិព័របង្ហាញផងពីដំណើរឆ្ពោះទៅកាន់អំពើប្រល័យពូជសាសន៍របស់យោធាភូមា។
តំណាងសហគមន៍រ៉ូហ៊ីយ៉ាបាននិយាយថាទង្វើរបស់កងទ័ពភូមាគួរតែត្រូវបានចាត់ទុកជាអំពើប្រល័យពូជសាសន៍តាំងពីមុនមក តែយ៉ាងណាក៏ដោយសហគមន៍រ៉ូហ៊ីងយ៉ា ជឿថាចំណាត់ការថ្មីរបស់អាមេរិកនឹងជួយជម្រុញដល់ដំណើរការនៅតុលាការយុត្តិធម៌អន្តរជាតិក្នុងទីក្រុងឡាអេ។
ស្រដៀងគ្នានេះ អ្នកស្រី Thin Thin Hlaing សកម្មជនសិទ្ធិជនជាតិភាគតិចរ៉ូហ៊ីយ៉ាក៏បានស្វាគមន៍ចំពោះសេចក្តីសម្រេចចិត្តរបស់អាមេរិកដែរ។ អ្នកស្រីបានមានប្រសាស៍ថាពីមុន អ្នកស្រីមានអារម្មណ៍ថាជនជាតិរ៉ូហ៊ីងយ៉ាកំពុងរស់នៅក្នុងសភាពងឹងឹតស្លុប ប៉ុន្តែឥឡូវនេះពួកគេមើលឃើញពន្លឺមួយហើយ ពីព្រោះថានៅទីបំផុតទៅអន្តរជាតិទទួលដឹងឮពីការរងទុក្ខវេទនារបស់ជនជាតិរ៉ូហ៊ីងយ៉ា។
គួររំឭកថា ប្រតិបត្តិការបង្ក្រាបរបស់កងទ័ពភូមាទៅលើសហគមន៍រ៉ូហ៊ីងយ៉ាដែលផ្តើមឡើងក្នុងឆ្នាំ២០១៧ បានបណ្តាលឲ្យស្លាប់មនុស្សច្រើនជាង ១ ៥០០នាក់ និងរុញច្រានឲ្យជនជាតិរ៉ូហ៊ីងយ៉ាប្រមាណ៨សែន ៥ម៉ឺននាក់រត់ទៅរស់នៅក្នុងជំរំឯប្រទេសបង់ក្លាក្បែរខាង។
ក្រៅពីនេះ នៅមានសេចក្តីរាយការណ៍ជាច្រើនទៀតអំពីករណីរំលោភសេពសន្ថវៈ និងការធ្វើទុក្ខបុកម្នេញលើជនជាតិរ៉ូហ៊ីងយ៉ាប្រមាណ ៦សែននាក់ដែលកំពុងរស់នៅក្នុងរដ្ឋរ៉ាឃីនរបស់ប្រទេសភូមា។
តុលាការយុត្តិធម៌អន្តរជាតិបានចោទប្រកាន់ទង្វើរបស់កងទ័ពភូមាថាជាអំពើប្រល័យពូជសាសន៍លើជនជាតិភាគតិចរ៉ូហ៊ីងយ៉ា កាន់សាសនាអ៊ីស្លាម និងទើបតែបានបើកសវនាការជាថ្មីទាក់ទិនសំណុំរឿងនេះកាលពីមួយខែមុន ពោលគឺនៅថ្ងៃទី២១ កុម្ភៈ ឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ