របបសឹកភូមាឡើងតុលាការយុត្តិធម៌អន្តរជាតិ ប្រឆាំងនឹងបទចោទប្រកាន់ប្រល័យពូជសាសន៍រ់ូហ៊ីងយ៉ា
នៅថ្ងៃចន្ទ ទី២១ កុម្ភៈ ២០២២នេះ របបសឹកភូមា បានចេញមុខជំនួសលោកស្រីអ៊ុងស៊ានស៊ូជី នៅតុលាការយុត្តិធម៌អន្តរជាតិ (ICJ) ក្រុងឡាអេ ដើម្បីតតាំងជាមួយតុលាការ ក្នុងសំណុំរឿងចោទប្រកាន់ភូមាប្រព្រឹត្តអំពើប្រល័យពូជសាសន៍លើជនជាតិភាគតិចរ៉ូហ៊ីងយ៉ា កាន់សាសនាអ៊ីស្លាម។
ចុះផ្សាយនៅថ្ងៃ៖
ស្តាប់ - ០១:៤៥
នៅថ្ងៃបើកសវនាការដំបូងកាលពីឆ្នាំ២០១៩ លោកស្រី អ៊ុងសានស៊ូជី បានដឹកនាំប្រតិភូ ឡើងទៅការពារក្តីនៅចំពោះមុខតុលាការយុត្តិធម៌អន្តរជាតិ ក្រុងឡាអេដោយផ្ទាល់តែម្តង។ ប៉ុន្តែពេលនេះ លោកស្រីជ័យលាភីបានធ្លាក់ពីអំណាច និងកំពុងជាប់ឃុំដោយក្រុមយោធាដែលលោកស្រីធ្លាប់បានការពារនៅឡាអេ។
ដូច្នេះនៅលើកនេះ របបសឹកត្រូវការពារខ្លួនដោយខ្លួនឯង ដោយបញ្ជូនប្រតិភូក្រុមថ្មី ដឹកនាំដោយលោក កូកូឡាំង Ko Ko Hlaing រដ្ឋមន្ត្រីក្រសួងកិច្ចសហប្រតិបត្តិការអន្តរជាតិ និងលោកស្រីរដ្ឋអាជ្ញា ធីតា អូ Thida Oo។ តំណាងរបបសឹកទាំងពីររូបនេះ បានជាប់ទណ្ឌកម្ម អាមេរិកតាំងពីរដ្ឋប្រហារថ្ងៃទី ១កុម្ភៈ២០២១មក។ ក្នុងសវនការដែលប្រព្រឹត្តទៅតាមប្រព័ន្ធវីដេអូខុនហ្វេរិន ភាគីយោធាភូមានឹងមានកម្មវត្ថុចម្បងមួយគឺធ្វើយ៉ាងណាបញ្ជាក់ថាតុលាការយុត្តិធម៌អន្តរជាតិដែលជាស្ថាប័នរបស់អង្គការសហប្រជាជាតិ គ្មានសមត្ថកិច្ចក្នុងសំណុំរឿងនេះទេ។
ចំណែកប្រទេសហ្កំប៊ី ដែលបានដាក់បណ្តឹង ក្នុងនាមអង្គការសន្និសីទអ៊ីស្លាម នឹងបង្ហាញសក្ខីកម្មបញ្ច្រាសវិញនៅថ្ងៃពុធទី២៣កុម្ភៈ២០២២។ សម្រាប់ហ្កំប៊ី ក្រុមកាន់អំណាចនៅភូមា បានរំលោភសន្ធិសញ្ញាអង្គការសហប្រជាជាតិឆ្នាំ១៩៤៨ស្តីពីអំពើប្រល័យពូជសាសន៍។ ជនជាតិភាគតិចរ៉ូហ៊ីងយ៉ា កាន់សាសនាអ៊ីស្លាម ប្រមាណ៨សែន៥ម៉ឺននាក់ បានបង្ខំចិត្តរត់ទៅរស់នៅក្នុងជំរំជនភៀសខ្លួននៅប្រទេសបង់ក្លាដែល បន្ទាប់ពីក្រុមយោធាភូមាបានបើកប្រតិបត្តិការបង្ក្រាបជនរ៉ូហ៊ីងយ៉ា ស្លាប់អស់ជាង១៥០០នាក់ កាលពីឆ្នាំ ២០១៧។
មុនសវនាការថ្ងៃចន្ទនេះ រដ្ឋាភិបាលរួបរួមជាតិភូមា ដែលជារដ្ឋាភិបាលស្រមោលបង្កើតឡើងដោយក្រុមតំណាងរាស្ត្រនិរទេសខ្លួន បានអះអាង ក្រុមខ្លួនសមជាតំណាងភូមា មិនមែនក្រុមរដ្ឋាភិបាលសឹកទេ ដែលត្រូវឡើងទៅតតាំងនៅតុលាការយុត្តិធម៌អន្តរជាតិពេលនេះ។ ប៉ុន្តែគ្មានអន្តរជាតិណាទទួលស្គាល់រដ្ឋាភិបាលបង្រួបបង្រួមដែលរដ្ឋាភិបាលសឹកភូមាចាត់ទុកជាក្រុមភេរវជននេះទេ។
សាលក្រមរបស់តុលាការយុត្តិធម៌អន្តរជាតិ មានតម្លៃខ្លាំងណាស់ ប៉ុន្តែតុលាការគ្មានមធ្យោបាយពិតប្រាកដដាក់បង្ខំឱ្យភាគីពាក់ព័ន្ធអនុវត្តទេ។ ហើយរដ្ឋប្រហារយោធានៅភូមា បានធ្វើឱ្យសវនាការស្តីបទចោទប្រកាន់ប្រល័យពូជសាសន៍លើជនជាតិរ៉ូហ៊ីងយ៉ានេះកាន់តែស្មុគស្មាញមួយកំរិតទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ