ចប់សមយុទ្ធព័ទ្ធតៃវ៉ាន់ ចិនទំនងបន្តធ្វើលំហាត់សឹក បាញ់គ្រាប់ពិត ផ្សេងទៀត
សមយុទ្ធដ៏ធំសម្បើមមិនធ្លាប់មានដែលចិនបានរៀបចំធ្វើឡើងនៅជុំវិញកោះតៃវ៉ាន់តាមគម្រោង បានចូលដល់ថ្ងៃបិទបញ្ចប់នៅថ្ងៃអាទិត្យទី ៧ សីហា ។ ប៉ុន្តែបើតាមប្រភពមិនបញ្ចេញឈ្មោះ ប៉េកាំងនឹងបន្តធ្វើសមយុទ្ធជាទៀងទាត់ ផ្សេងទៀត នៅតាមបណ្តោយព្រំដែនសមុទ្ទពុះចែកចិនពីតៃវ៉ាន់ និងគ្រោងបន្តធ្វើសមយុទ្ធដោយបាញ់គ្រាប់ពិត នៅសមុទ្ទលឿងរហូតដល់ថ្ងៃទី ១៥សីហា។
ចុះផ្សាយនៅថ្ងៃ៖
ស្តាប់ - ០២:០៧
« នៅថ្ងៃអាទិត្យទី ៧ សីហា យោធាចិនបានធ្វើលំហាត់សមរួមគ្នានៅក្នុងសមុទ្ទនិងនៅលើផ្ទៃអាកាស ឡោមព័ទ្ធកោះតៃវ៉ាន់ »។ នេះជាប្រសាសន៍របស់មេបញ្ជាការកងទ័ពនៃកងកម្លាំងយោធាចិន ដែលទទួលបន្ទុកគ្រប់គ្រងផ្ទៃសមុទ្ទខាងកើត រាប់ទាំងតៃវ៉ាន់ផង ដោយគូសបញ្ជាក់បន្ថែមទៀតថា លំហាត់សឹកនេះជាការធ្វើតេស្តសាកល្បងកម្លាំងអាវុធ របស់កងទ័ពទ័ពលើដី និងសមត្ថភាពវាយប្រហារផ្លូវអាកាស រយៈឆ្ងាយ។
ក្រសួងការពារជាតិតៃវ៉ាន់ បានបញ្ជាក់ព័ត៌មានថាចិនពិតជាបានពង្រាយកម្លាំងយន្តហោះ៦៦គ្រឿង នាវា១៤គ្រឿង និងដ្រូនជុំវិញច្រកសមុទ្ទតៃវ៉ាន់មែន គឺធ្វើហាក់ដូចជាកំពុងវាយប្រហារយកកោះតៃវ៉ាន់ និងវាយប្រហារលើនាវាក្នុងដែនទឹកតៃវ៉ាន់យ៉ាងដូច្នោះ។
ប៉ុន្តែបើតាមតៃវ៉ាន់ មានសញ្ញាដែលបញ្ជាក់ថា សមយុទ្ធទំនងជាបានបិទបញ្ចប់ តាំងពីថ្ងៃត្រង់ ថ្ងៃអាទិត្យមក ៖ តំបន់គ្រោះថ្នាក់ចំនួន ៦ ក្នុងចំណោមតំបន់គ្រោះថ្នាក់បណ្តោះអាសន្នទាំង៧ដែលចិនបានណែនាំមិនឱ្យក្រុមហ៊ុនអាកាសចរណ៍នានាបើកបរកាត់ បានត្រលប់រកសភាពដើមវិញហើយ។ ចរាចរណ៍នាវា និងការហោះហើរ ចាប់ដំណើរការបន្តិចម្តងៗហើយ។ ចំណែកតំបន់ផ្ទៃទឹកប៉ែកខាងកើតកោះតៃវ៉ាន់ បន្តស្ថិតនៅជាតំបន់គ្រោះថ្នាក់មួយចុងក្រោយ គួរចៀសវាងរហូតដល់(ម៉ោង២សកល) ត្រូវជាម៉ោង១០ព្រឹកថ្ងៃចន្ទទី ៨សីហា ម៉ោងក្នុងស្រុក។
បដិសេធមិនអះអាងដោយច្បាស់លាស់ថាសមយុទ្ធបានបិទបញ្ចប់តាមគម្រោង ក្រសួងការពារជាតិចិនបានបង្ហើបឱ្យដឹងអំពីគម្រោងធ្វើសមយុទ្ធដោយបាញ់គ្រាប់ពិត ថ្មីមួយទៀត រហូតដល់ថ្ងៃទី១៥សីហា នៅសមុទ្ទលឿង ដែលខណ្ឌចែកចិនពីឧបទ្វីបកូរ៉េ។ ហើយបើតាមបទវិចារណកថាមិនបញ្ចេញឈ្មោះ ចុះផ្សាយដោយទូរទស្សន៍ CCTV នៅថ្ងៃទី ៧ សីហានេះ ចិនបានព្រលយឱ្យដឹងអំពីគម្រោងធ្វើសមយុទ្ធផ្សេងទៀត “ជាទៀងទាត់” នៅឆ្នេរខាងកើតប្រទេស ត្រង់បន្ទាត់ពុះចែកច្រកសមុទ្ទ រវាងតៃវ៉ាន់និងចិន។ បន្ទាត់ដែលគូសដោយសហរដ្ឋអាមេរិក ក្នុងសម័យសង្គ្រាមត្រជាក់ ដែលចិនមិនទទួលស្គាល់សោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ