ចិនបន្តធ្វើសមយុទ្ធជុំវិញតៃវ៉ាន់ ចំពេលតៃប៉ិផ្តើមលំហាត់សឹកដែរ
ទោះបីមានសេចក្តីអំពាវនាវ ពីសំណាក់ក្រុមលោកខាងលិច និងជប៉ុនយ៉ាងណាក៏ដោយ ក៏ចិនមិនធ្វើឮដែរ។ ចិននៅតែបន្តសម្តែងកំហឹងប្រឆាំងនឹងដំណើរទស្សនកិច្ចនៅតៃវ៉ាន់របស់លោកស្រី ណាន់ស៊ី ប៉េឡូស៊ី ដដែល ដោយមិនបញ្ឈប់សកម្មភាពយោធានៅជុំវិញកោះតៃវ៉ាន់ទេ។ សមយុទ្ធទ្រង់ទ្រាយធំរបស់កងទ័ពចិន ដែលតាមគម្រោងត្រូវចប់ត្រឹមថ្ងៃអាទិត្យទី ៧សីហា នៅតែបន្តធ្វើទៀត នៅថ្ងៃចន្ទទី ៨សីហានេះ។
ចុះផ្សាយនៅថ្ងៃ៖
ស្តាប់ - ០២:០៩
“កងទ័ពរំដោះប្រជាជនចិន បន្តធ្វើលំហាត់អនុវត្តអន្តរយោធា ក្នុងផ្ទៃសមុទ្ទ និងលើអាកាសជុំវិញតៃវ៉ាន់ ដោយផ្ចង់លើប្រតិបត្តិការរួម រវាងកងកម្លាំងប្រឆាំងនាវាមុជទឹក និងកងកម្លាំងវាយលុកតាមផ្លូវសមុទ្ទ”។ នេះជាសេចក្តីថ្លែងការណ៍របស់ទីបញ្ជាការដ្ឋានខាងកើតនៃកងទ័ពចិន។ ប៉ុន្តែអាជ្ញាធរចិន មិនបានបញ្ជាក់ អំពីទីតាំងឬកន្លែងធ្វើសមយុទ្ធទេ ហើយក៏មិនលម្អិតថានឹងមានការបាញ់គ្រាប់ពិតឬអត់ ឡើយ។
តាំងពីថ្ងៃព្រហស្បតិ៍ទី ៤សីហាមក កងទ័ពចិនបានធ្វើសមយុទ្ធទ្រង់ទ្រាយធំ មានទាំងយន្តហោះប្រដេញ នាវាចម្បាំង ដ្រូន និងដោយបាញ់គ្រាប់ពិត ជាមីស៊ីល នៅ៦កន្លែងសំខាន់ៗ ក្នុងផ្ទៃសមុទ្ទជុំវិញកោះតៃវ៉ាន់។ នៅចំពោះមុខលំហាត់សឹក ដ៏ធំសម្បើមជាប្រវត្តិសាស្ត្ររបស់ចិននេះ ប្រមុខការទូតនៃក្រុមប្រទេសមហាឧស្សាហកម្មទាំង៧ (សហរដ្ឋអាមេរិក ជប៉ុន បារាំង អាល្លឺម៉ង់ អ៊ីតាលី កាណាដានិងអង់គ្លេស) បានរិះគន់ថាចិនធ្វើជ្រុលហួសហេតុ។ ជាមួយសមភាគីជប៉ុននិងអូស្ត្រាលី លោកអង់តូនី ប្លីងកិន រដ្ឋមន្ត្រីការបរទេសអាមេរិកបានចេញសេចក្តីថ្លែងការណ៍មួយអំពាវនាវឱ្យប៉េកាំង បញ្ឈប់សមយុទ្ធ។ ប៉ុន្តែការហាត់សមព័ទ្ធកោះតៃវ៉ាន់ មិនបានបិទបញ្ចប់ ដូចគម្រោងប្រកាសដំបូង ត្រឹម វេលាម៉ោង១២ថ្ងៃត្រង់ថ្ងៃអាទិត្យទី ៧សីហាទេ។
នៅថ្ងៃចន្ទនេះ ចិនបន្តធ្វើសមយុទ្ធជុំវិញកោះតៃវ៉ាន់ទៀត។ អ្វីជាការគួរឱ្យកត់សម្គាល់ ការបន្តសមយុទ្ធរបស់ចិន ប្រព្រឹត្តទៅជួនចំពេលដែលតៃវ៉ាន់ត្រូវផ្តើមធ្វើលំហាត់សឹករបស់ខ្លួនដែរ។ នៅថ្ងៃអង្គារ ទី៩សីហា និងថ្ងៃព្រហស្បតិ៍ កងទ័ពតៃវ៉ាន់ជាច្រើនរយនាក់ ប្រដាប់ដោយអាវុធធុនធ្ងន់ នឹងជួបប្រជុំគ្នាធ្វើលំហាត់សឹកប្រយុទ្ធតតាំងនឹងការចូលឈ្លានពានរបស់សត្រូវ នៅតំបន់ប៉ែកខាងត្បូងបំផុតនៃកោះ។ បើតាមអ្នកនាំពាក្យយោធា សមយុទ្ធរបស់តៃវ៉ាន់ ជាគម្រោងដែលរៀបចំឡើងតាំងពីយូរ មិនមែនជាប្រតិកម្មតបតទៅនឹងលំហាត់សឹករបស់កងទ័ពចិនពេលនេះទេ។ តៃវ៉ាន់ តែងតែធ្វើសមយុទ្ធ ត្រៀមប្រឈមនឹងការឈ្លានពានរបស់ចិន និងបានហាត់ប្រយុទ្ធបណ្តេញសត្រូវដែលវៃចូលតាមសមុទ្ទផង កាលពីខែមុន ក្នុងក្របខ័ណ្ឌនៃសមយុទ្ធប្រចាំឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ