អតីតនាយករដ្ឋមន្ត្រីប៉ាគីស្ថានលោក អ៊ីមរ៉ាន់ខាន់ ប្រឈមនឹងការចាប់ខ្លួន
នៅថ្ងៃចន្ទទី ២២សីហានេះ ប្រមុខដឹកនាំបក្សប្រឆាំងប៉ាគីស្ថាន បានព្រមានអាជ្ញាធរកាន់អំណាច ថាកន្លងបន្ទាត់ក្រហម បើហ៊ានចាប់ខ្លួនអតីតនាយករដ្ឋមន្ត្រី អ៊ីនរ៉ាន់ខាន់។ ដើម្បីរារាំងប៉ូលិស សកម្មជនបក្សគាំទ្រជាច្រើនពាន់នាក់បានមកជួបជុំប្រមូលផ្តុំគ្នានៅមុខគេហដ្ឋានលោក អ៊ីមរ៉ាន់ខាន់ តាំងពីថ្ងៃអាទិត្យមក។ រដ្ឋាភិបាលចម្រុះប៉ាគីស្ថាន បានបើកអង្កេតប្រឆាំងនឹងលោក ក្រោយសុន្ទរកថាបែបវាយប្រហារលើស្ថាប័នប៉ូលិសនិងតុលាការ កាលពីថ្ងៃសៅរ៍ទី ២០សីហា។
ចុះផ្សាយនៅថ្ងៃ៖
ស្តាប់ - ០១:៥៣
វិបត្តិនយោបាយប៉ាគីស្ថាន បន្តតានតឹង ! សកម្មជនជាច្រើនរយនាក់ បានមកប្រមូលផ្តុំគ្នានៅល្ងាចថ្ងៃអាទិត្យ និងថ្ងៃចន្ទនេះ នៅមុខគេហដ្ឋានលោក អ៊ីមរ៉ាន់ខាន់ ដោយមានលើកបដា គ្រវីទង់ជាតិគណបក្ស Tehreek-e-insag (PTI) ចលនាប៉ាគីស្ថានដើម្បីយុត្តិធម៌ របស់លោក អ៊ីនរ៉ាន់ខាន់ផង។ បាតុកម្មនេះ ជាសម្តែងការគាំទ្រដល់មេដឹកនាំនយោបាយផង និងជាខែលការពារមិនឱ្យប៉ូលិសអាចចូលចាប់លោកអតីតនាយករដ្ឋមន្ត្រីផង។ ក្រុមបាតុករបានព្រមានទៀតថា នឹងដណ្តើមយករដ្ឋធានីប្រសិនបើអាជ្ញាធរពិតជាហ៊ានចាប់ខ្លួនប្រមុខដឹកនាំបក្សរបស់ពួកគេ។
សូមរំលឹកថា តាំងពីធ្លាក់ពីតំណែងនៅថ្ងៃទី ១០ មេសា២០២២ ដោយញត្តិចាប់ថ្នាក់មក លោក អ៊ីនរ៉ាន់ខាន់ អតីតតារាឯកផ្នែកកីឡាគ្រីកេ បានរៀបចំការជួបជុំធំៗ ព្រមានមិនឱ្យស្ថាប័នរដ្ឋផ្សេងៗ រាប់ទាំងយោធាដ៏មានអំណាច គាំទ្ររដ្ឋាភិបាលចម្រុះទេ។ គ្រប់សកម្មភាពរបស់លោក មានកម្មវត្ថុចម្បងតែមួយ គឺទាមទារឱ្យមានការបោះឆ្នោតទូទៅមុនអាណត្តិ តែរដ្ឋាភិបាលដឹកនាំដោយគូប្រជែងនយោបាយធ្វើមិនឮ។ នៅអាទិត្យទី ២១សីហា អតីតនាយករដ្ឋមន្ត្រីអស់តំណែងនេះ បានរិះគន់មេប៉ូលិសក្រុងអ៊ីស្លាម៉ាបាត និងចៅក្រមម្នាក់ដែលចាប់ឃុំខ្លួន និងធ្វើទារុណកម្ម អ្នកទទួលខុសត្រូវបក្ស PTI ម្នាក់ ក្នុងមន្ទីរឃុំឃាំង តាំងពីមួយសប្តាហ៍មកហើយ។
ប៉ូលិសប៉ាគីស្ថាន មិនមើលស្រាលពាក្យព្រមានរបស់លោកអ៊ីនរ៉ាន់ខាន់ទេ។ បន្ទាប់ពីហាមឃាត់មិនឱ្យទូរទស្សន៍ផ្សាយបន្តផ្ទាល់សុន្ទរកថាលោកអ៊ីនរ៉ាន់ខាន់ ក្រោមហេតុផលថាអាចមានខ្លឹមសារញុះញង់បែបស្អប់ខ្ពើម ហើយបង្កឱ្យមានអស្ថិរភាពជាតិ នៅថ្ងៃចុងសប្តាហ៍កន្លងទៅនេះ ប៉ូលិសប៉ាគីស្ថានបានប្រកាសបើកអង្កេតប្រឆាំងនឹងលោកអ៊ីនរ៉ាន់ខាន់ ពីបទបានរំលោភច្បាប់ប្រឆាំងភេវកម្ម។ នេះជាដំណាក់កាលទីមួយ មុននឹងឈានដល់ការចោទប្រកាន់ជាផ្លូវការ និងការចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ