សម្ពាធកាន់តែខ្លាំងនៅពេលដែលការបាតុកម្មនៅអ៊ីរ៉ង់ បន្តចូលដល់សប្តាហ៍ទី ៤
កំហឹងជាសាធារណៈ បានផ្ទុះឡើងដោយសារការស្លាប់របស់ស្រ្តីវ័យក្មេងម្នាក់ បីថ្ងៃបន្ទាប់ពីនាងត្រូវបានចាប់ខ្លួននៅទីក្រុង តេហេរ៉ង់ ដោយប៉ូលីសសីលធម៌។ ការចាប់ខ្លួននេះ ត្រូវបានធ្វើឡើងព្រោះ នាងមិនបានស្លៀកពាក់សមរម្យ ទៅតាមការចែងរបស់ច្បាប់សាសនាអ៊ីស្លាម នៅអ៊ីរ៉ង់។ ៤សប្តាហ៍បានកន្លងទៅ រលកនៃភាពចលាចលនៅតែបន្ត រីករាលដាលពេញប្រទេស ជាហេតុធ្វើរដ្ឋាភិបាលបារាំងកាលពីថ្ងៃសុក្រម្សិលមិញប្រកាសណែនាំ ជនជាតិរបស់ខ្លួនឲ្យ ចាកចេញពីប្រទេសអ៊ីរ៉ង់ជាបន្ទាន់។
ចុះផ្សាយនៅថ្ងៃ៖
ស្តាប់ - ០២:២៥
មកដល់ពេលនេះបើយោងតាមការស៊ើបអង្កេតរបស់អ៊ីរ៉ង់ ការពិត Mahsa Amini បានស្លាប់ដោយជំងឺរ៉ាំរ៉ៃ ផ្ទុយពីអ្វីដែលសាធារណជនបានស្មាន គិតថាជាទង្វើរបស់ប៉ូលីស។ តែទោះជាយ៉ាងនេះក្តី ការខឹងសម្បារនៅតែបន្ត បណ្តាលឲ្យមាន អំពើហឹង្សាតាមដងផ្លូវ ប៉ះពាល់ដល់អាយុជីវិតមនុស្សរាប់សិបនាក់។ ការប្រមូលផ្តុំគ្នាបាតុកម្មភាគច្រើនកើតឡើង នៅក្នុងសាកលវិទ្យាល័យ និងតាមសាលារៀនទូទាំងប្រទេស។
កាលពីថ្ងៃសៅរ៍ ក្នុងកិច្ចខិតខំប្រឹងប្រែងកាត់បន្ថយកំហឹងរបស់សិស្ស ប្រធានាធិបតីអ៊ីរ៉ង់ បានចូលរួមប្រារព្ធពិធីចាប់ផ្តើមឆ្នាំសិក្សាថ្មី ជាមួយសិស្សនិស្សិតស្រីនៅសាកលវិទ្យាល័យមួយ នៅទីក្រុងតេហេរ៉ង់។
យ៉ាងនេះក្តីបាតុកម្មនៅតែបន្ត សិស្សជាច្រើនបានដើរដង្ហែរតាមដងផ្លូវ។ សិស្សស្រីដោះគ្រវីកន្សែងទទូរក្បាល និងស្រែកទាមទារសិទ្ធិ ស្ត្រី ជីវិត និង សេរីភាព។ អង្គការសិទ្ធិមនុស្សអ៊ីរ៉ង់ ដែលមានមូលដ្ឋាននៅទីក្រុងអូស្លូ និយាយថា បាតុករយ៉ាងតិច ៩២នាក់បានស្លាប់នៅក្នុងការបង្ក្រាបរបស់ប៉ូលីស។
ប្រព័ន្ធផ្សព្វផ្សាយក្នុងស្រុកបានរាយការណ៍ថា ថ្នាក់រៀនត្រូវបានផ្អាកចាប់តាំងពីថ្ងៃច័ន្ទមក នៅសាកលវិទ្យាល័យ វិទ្យាសាស្ត្រកំពូលរបស់ប្រទេសអ៊ីរ៉ង់ បន្ទាប់ពីមានជម្លោះហិង្សារវាងនិស្សិត និងកងកម្លាំងសន្តិសុខ រហូតដល់មានការប្រើឧស្ម័នបង្ហូរទឹកភ្នែក និងអាវុធបង្ក្រាបផ្សេងៗទៀត។
ប្រធានាធិបតីអ៊ីរ៉ង់ ដែលជាអ្នកអភិរក្សជ្រុលនិយម បានអំពាវនាវឱ្យមានឯកភាពឡើងវិញ។ នេះបន្ទាប់ពីលោកបានបានអំពាវនាវឱ្យមានការរីតបណ្តឹងច្បាប់សាសនាអ៊ីស្លាម កាលពីខែកក្កដាកន្លងទៅ។ លោកបានចោទប្រកាន់ ប្រទេសលោកខាងលិច ថាបានញុះញង់ឱ្យមានការតវ៉ានៅអ៊ីរ៉ង់។ ជាក់ស្តែងកាលពីសប្តាហ៍មុន ប៉ូលីសបានចាប់ខ្លួនជនបរទេសប្រាំបួននាក់ មកពីប្រទេសបារាំង អាល្លឺម៉ង់ អ៊ីតាលី ប៉ូឡូញ និងហូឡង់។
រដ្ឋាភិបាលបារាំងកាលពីថ្ងៃសុក្របានណែនាំជនជាតិរបស់ខ្លួន ឲ្យចាកចេញពីប្រទេសអ៊ីរ៉ង់ឱ្យបានឆាប់តាមដែលអាចធ្វើទៅបាន ព្រោះ ពួកគេកំពុងប្រឈមនឹងហានិភ័យខ្ពស់នៃការចាប់ខ្លួន ការឃុំខ្លួនដោយបំពាន និងការកាត់ក្តីដោយអយុត្តិធម៌។
កាប្រកាសរបស់រដ្ឋាភិបាលបារាំងកើតឡើង បន្ទាប់ពីទូរទស្សន៍រដ្ឋអ៊ីរ៉ង់ចាក់ផ្សាយ សម្តីសារភាពរបស់ជនជាតិបារាំងពីរនាក់ នៅប្រាំខែបន្ទាប់ពីពួកគេត្រូវបានចាប់ខ្លួន នៅក្នុងសាធារណរដ្ឋអ៊ីស្លាម ពីបទព្យាយាមបង្កចលាចលអំឡុងពេលកូដកម្មរបស់គ្រូបង្រៀនកាលពីដើមឆ្នាំនេះ។
ក្រៅពីនេះ មានជនជាតិបារាំងពីរទៀត ត្រូវបានកាត់ទោសឱ្យជាប់ពន្ធនាគាររយៈពេល 5 ឆ្នាំ និង ៨ឆ្នាំ ពីបទធ្វើឱ្យខូចសន្តិសុខជាតិ និងចារកម្ម។ ពួកគេស្ថិតក្នុងចំណោមជនជាតិលោកខាងលិចជាង 20 នាក់ ដែលត្រូវបានឃុំខ្លួន ឬរារាំងមិនឱ្យចាកចេញពីប្រទេសអ៊ីរ៉ង់។
ក្រុមសិទ្ធិមនុស្សបានចោទប្រកាន់ ថានេះជាការអនុវត្ត ចំណាប់ខ្មាំងការទូត ខណៈពេលដែល គេហទំព័រក្រសួងការបរទេសបារាំងបានព្រមានថា សមត្ថភាពរបស់ស្ថានទូតបារាំងក្នុងទីក្រុងតេហេរ៉ង់ ក្នុងការផ្តល់ការការពារដល់ជនជាតិដែលត្រូវបានចាប់ខ្លួន ឬឃុំខ្លួនក្នុងប្រទេសអ៊ីរ៉ង់នៅមានកម្រិត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ