អតីតនាយករដ្ឋមន្រ្តីប៉ាគីស្ថានត្រូវហាមមិនឲ្យឈរឈ្មោះបោះឆ្នោត រយៈពេល ៥ឆ្នាំ
វិបត្តិនយោបាយនៅប៉ាគីស្ថាន បានកើនឡើងកំដៅ សាជាថ្មី នៅចុងសប្តាហ៍នេះ បន្ទាប់ពីអតីតនាយករដ្ឋមន្រ្តីលោកអ៊ីមរ៉ាន់ ខាន់ត្រូវហាមឃាត់មិនឲ្យឈរឈ្មោះបោះឆ្នោត រយៈពេល៥ឆ្នាំ។ នៅថ្ងៃសុក្រទី ២១តុលា គណៈកម្មការបោះឆ្នោតប៉ាគីស្ថាន បានសម្រេចហាមឃាត់លោកអ៊ីមរ៉ាន់ ខាន់ មិនឲ្យឈរឈ្មោះបោះឆ្នោត ក្នុងហេតុផលថា លោកមិនបានប្រកាសពីចំនួនអំណោយ ដែលលោកបានទទួល នៅក្នុងអំឡុងពេលដឹកនាំរដ្ឋាភិបាលប៉ាគីស្ថាន ពីឆ្នាំ ២០១៨ ដល់ឆ្នាំ ២០២២។
ចុះផ្សាយនៅថ្ងៃ៖
ស្តាប់ - ០២:៤៥
គណៈកម្មការបោះឆ្នោតប៉ាគីស្ថានបានសម្រេចហាមមិនឲ្យ អតីតនាយករដ្ឋមន្រ្តី អ៊ីមរ៉ាន់ ខាន់ឈរឈ្មោះបោះឆ្នោត រយៈពេល ៥ឆ្នាំ ដោយពឹងផ្អែកលើការសន្និដ្ឋានដែលថា អតីតប្រមុខរដ្ឋាភិបាលប៉ាគីស្ថាន រូបនេះ មានជាប់ពាក់ព័ន្ធក្នុងការប្រព្រឹត្តអំពើពុករលួយ។
ការសម្រេចរបស់គណៈកម្មការបោះឆ្នោតបានទៅបង្កកំហឹងរបស់អ្នកគាំទ្រលោកអ៊ីមរ៉ាន់ ខាន់ ដែលបានសងសឹក វាយបំផ្លាញរថយន្ត នៅខាងក្រៅការិយាល័យរបស់គណៈកម្មការបោះឆ្នោត កាលពីថ្ងៃសុក្រ។ ប៉ូលិសប៉ាគីស្ថាន វិញ បានចាប់ឃាត់ខ្លួនអង្គរក្សម្នាក់របស់លោកអ៊ីមរ៉ាន់ ខាន់ ដែលបានបាញ់កាំភ្លើងទៅលើដី។
អតីតរដ្ឋមន្រ្តីព័ត៌មាន និងជាមន្រ្តីជាន់ខ្ពស់របស់គណបក្ស Tehreek-e-insag (PTI) ចលនាប៉ាគីស្ថានដើម្បីយុត្តិធម៌ របស់លោក អ៊ីនរ៉ាន់ខាន់ បានទាត់ចោល ការសម្រេចដ៏អាម៉ាស់ របស់គណៈកម្មការបោះឆ្នោត និងបានអំពាវនាវឲ្យក្រុមអ្នកគាំទ្រ គណបក្សចុះថ្នល់ធ្វើបាតុកម្មតវ៉ាប្រឆាំងនឹងការសម្រេចរបស់គណៈកម្មការបោះឆ្នោត។ ការអំពាវនាវមានប្រសិទ្ធិភាព ភ្លាម ព្រោះថា សកម្មជនរបស់គណបក្សរាប់រយនាក់បានលើកគ្នា ទៅដុតកង់ឡាន បិទផ្លូវ បង្កការកកស្ទះ ចរាចរណ៍ នៅទីក្រុងLahore និងFaisalabad ភាគខាងកើតប្រទេស។ ខណៈពេលប៉ូលិសប៉ាគីស្ថានទាញសញ្ញាអាសន្នខ្ពស់នៅរដ្ឋធានី អ៊ីស្លាម៉ាបាដ អ្នកវិភាគវាយតម្លៃថា ការសម្រេចរបស់គណៈកម្មការបោះឆ្នោតនឹងទៅដុតកំដៅភាពតានតឹងនយោបាយ មួយកម្រិតទៀតនៅប៉ាគីស្ថាន។
មេធាវីរបស់លោកអ៊ីមរ៉ាន់ ខាន់អះអាងថា នឹងដាក់ពាក្យបណ្តឹងភ្លាមដើម្បីឲ្យតុលាការលុបចោលការសម្រេចរបស់គណៈកម្មការបោះឆ្នោត។ ក្នុងករណីដែលតុលាការប៉ាគីស្ថានរក្សាការសម្រេចរបស់គណៈកម្មការបោះឆ្នោត នោះ លោកអ៊ីមរ៉ាន់ ខាន់នឹងត្រូវបិទផ្លូវមិនឲ្យចូលរួមប្រកួតប្រជែង នៅក្នុងការបោះឆ្នោតសភា ដែលអាចប្រព្រឹត្តទៅ ពីខែតុលា រហូតដល់ឆ្នាំ២០២៣។
គួររំលឹកថា គណៈកម្មការបោះឆ្នោតប៉ាគីស្ថានទើបសម្រេចហាមលោកអ៊ីមរ៉ាន់ ខាន់មិនឲ្យឈរឈ្មោះ បោះឆ្នោត នៅបន្ទាប់ពីទទួលពាក្យបណ្តឹង កាលពីឆ្នាំមុនរបស់គណបក្សប្រឆាំង នៅក្នុងពេលលោកអ៊ីមរ៉ាន់ ខាន់ នៅធ្វើជានាយករដ្ឋមន្រ្តី។ កាលណោះ គណបក្សប្រឆាំងបានចោទប្រកាន់លោកអ៊ីមរ៉ាន់ ខាន់ និងភរិយា ថា បានទទួលអំណោយរាប់សែនដុល្លារ ដែលអាចជានាឡិកាដៃ គ្រឿងអលង្កការ ទឹកអប់ កាបូបប្រណិតៗ នៅក្នុងអំឡុងពេលធ្វើទស្សនកិច្ចនៅបរទេស។ តាមក្រុមប្រឆាំង លោក អ៊ីមរ៉ាន់ ខាន់ បានលួចលក់អំណោយ យកលុយមកទុកក្នុងហោប៉ៅផ្ទាល់ខ្លួន។
តាមច្បាប់ប៉ាគីស្ថាន មន្រ្តីរដ្ឋាភិបាលត្រូវប្រកាសអំណោយដែលគេទទួលបានក្នុងអំឡុងកាន់តំណែង ដោយពួកគេអាចរក្សាទុកអំណោយដែលមិនសូវមានតម្លៃ។ សម្រាប់អំណោយដែលថ្លៃខ្លាំង ពួកគេអាចមានសិទ្ធិទទួលបាន៥០%។ គឺរដ្ឋាភិបាលរបស់លោកអ៊ីមរ៉ាន់ ខាន់ផ្ទាល់ដែលជាអ្នកដំឡើងពី២០% ទៅដល់៥០%។
ធ្លាក់ពីតំណែង កាលពីខែមេសា ឆ្នាំ ២០២២ ដោយសារការបោះឆ្នោតរបស់សភាទៅលើញត្តិដកសេចក្តីទុកចិត្ត លោកអ៊ីមរ៉ាន់ ខាន់ អតីតកីឡាករជើងឯកផ្នែកគ្រីកេ នៅតែមានប្រជាប្រិយភាពក្នុងចំណោមប្រជាជនប៉ាគីស្ថាន។ ដោយអះអាងថា រូបលោកត្រូវកម្ចាត់ ខ្ទាតចេញ ពីអំណាច ដោយសារតែផែនការឃុបឃិតរបស់អាមេរិក លោកអ៊ីមរ៉ាន់ ខាន់បានរិះគន់មិនសំចៃមាត់រដ្ឋាភិបាលចម្រុះសព្វថ្ងៃ ដឹកនាំដោយគណបក្សប្រឆាំង និងទាមទារឲ្យគេរៀបចំការបោះឆ្នោតមុនអាណត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ