តៃវ៉ាន់កំពុងរង់ចាំគំនាបកាន់តែខ្លាំងរបស់ចិននៅក្រោយការឡើងកាន់អំណាចអាណត្តិថ្មីរបស់លោកស៊ី ជីនពីង
នៅតៃវ៉ាន់ រដ្ឋមន្រ្តីការបរទេសលោកយ៉ូសែហ្វ វូបានបញ្ជាក់ក្នុងថ្ងៃពុធ ទី២៦ តុលាថា ក្រោយការឡើងកាន់អំណាចអាណត្តិថ្មីរបស់ប្រធានាធិបតីចិនលោកស៊ី ជីនពីង ចិននឹងប្រឹងប្រែងទ្វេដងដើម្បីដាក់គំនាបទៅលើក្រុមប្រទេសដែលកំពុងមានទំនាក់ទំនងការទូត ឬមានអ្នកតំណាងជាមួយតៃវ៉ាន់។ តាមលោកវូ ស្ថានទូតតៃវ៉ាន់ និងការិយាល័យតំណាងតៃវ៉ាន់នៅបរទេសកំពុងមានការប្រយ័ត្នប្រយែងខ្ពស់ និងថា តៃវ៉ាន់នឹងចាត់វិធានការគ្រប់យ៉ាងដើម្បីពង្រឹងទំនាក់ទំនាក់ការទូតរបស់ខ្លួននៅបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
« វាអាចដែលថា ស្ថានភាពការទូតរបស់យើងឈានទៅរកផ្លូវងងឹត » នេះជាការថ្លែងរបស់រដ្ឋមន្រ្តីការបរទេសតៃវ៉ាន់លោកយ៉ូសែហ្វ វូនៅក្នុងសភា។ ការហ៊ានលើកឡើងដូចនេះដោយលោកវូសំអាងថា ប្រធានាធិបតីចិនលោកស៊ី ជីនពីងដែលទើបជាប់ឆ្នោតអាណត្តិថ្មីបានពង្រឹង និងពូនអំណាចជាមេដឹកនាំដែលមានឥទ្ធិពលជាងគេតាំងពីជំនាន់លោកម៉ៅ សេទុង។ លោកយ៉ូសែហ្វ វូយល់ថា គំនាបរបស់ចិននឹងមានកាន់តែខ្លាំងទៅលើ ១៤ប្រទេសដែលកំពុងមានទំនាក់ទំនងការទូតជាមួយតៃវ៉ាន់។
« យើងបានទទួលព័ត៌មានសម្ងាត់ដែលទាញសញ្ញាអាសន្នប្រាប់យើង ហើយយើងសង្ឃឹមថា ទំនាក់ទំនងការទូតរបស់យើងនឹងមិនទទួលឥទ្ធិពលពីចិនទេ » នេះជាបញ្ជាក់របស់លោកយ៉ូសែហ្វ វូ មុននឹងបន្ថែមថា ស្ថានទូត និងស្ថានតំណាងទាំងអស់របស់តៃវ៉ាន់នៅបរទេសកំពុងស្ថិតក្នុងភាពប្រយ័ត្នប្រយែងខ្ពស់។ តែលោកវូមិនភ្លេចបញ្ជាក់ថា រដ្ឋាភិបាលនឹងផ្ទៀងផ្ទាត់លើព័ត៌មានសម្ងាត់ដែលទទួលបាន និងត្រៀមខ្លួនចាត់វិធានការគ្រប់យ៉ាងដើម្បីពង្រឹងទំនាក់ទំនងការទូតរបស់ខ្លួន។
ដោយឡែក សមាជិកសភាម្នាក់បានសួរលោកវូថា តើចិនកំពុងពន្លឿនកាលវិភាគដើម្បីក្រសោបយកតៃវ៉ាន់ឬ?។ លោកវូបានឆ្លើយដោយទទួលស្គាល់ថា ការគំរាមកំហែងរបស់ចិនបានកើនឡើងខ្លាំងនារយៈពេលប៉ុន្មានឆ្នាំចុងក្រោយនេះ។ តែតាមលោកវូ រឿងចិនសម្រេចវាយប្រហារលើតៃវ៉ាន់នៅឆ្នាំ ២០២៣ នៅឆ្នាំ ២០២៤ នៅឆ្នាំ ២០២៥ នៅឆ្នាំ ២០២៧ ឬនៅឆ្នាំ ២០៣០ វាមិនសំខាន់ទេ។ អ្វីដែលសំខាន់ គឺតៃវ៉ាន់ត្រូវត្រៀមខ្លួនឲ្យបានត្រឹមត្រូវដើម្បីការពារទប់ទល់នឹងចិនវិញ។
ចំណែកប្រធានាធិបតីតៃវ៉ាន់លោកស្រីសៃ អ៊ីងវេនបានថ្លែងនៅក្នុងកិច្ចប្រជុំគណបក្សរបស់លោកស្រីក្នុងថ្ងៃពុធ ទី២៦ តុលាដដែលថា កាលណាតៃវ៉ាន់កាន់តែត្រៀមខ្លួន ចិនពិចារណាច្រើនដងមុននឹងសម្រេចវាយប្រហារតៃវ៉ាន់ ហើយកាលណាតៃវ៉ាន់កាន់តែរួបរួម តៃវ៉ាន់រឹតតែខ្លាំង។ គួរបញ្ជាក់ថា ក្តីបារម្ភកាន់តែខ្លាំងជុំវិញចិនក្រសោបតៃវ៉ាន់បានកើតឡើង ក្រោយពីប្រធានាធិបតីចិនលោកស៊ីបានថ្លែងនាឱកាសបើកសមាជបក្សកុម្មុយនិស្តថា ចិនត្រូវបង្រួបបង្រួមតៃវ៉ាន់តាមផ្លូវសន្តិវិធី ឬមួយតាមកម្លាំងបាយ បើចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ