សេដ្ឋកិច្ចថៃចាប់ស្ទុះឡើងវិញ ក្រោយមានកំណើនលំហូរទេសចរបរទេស
សេដ្ឋកិច្ចជាតិថៃបានស្គាល់កំណើន ឡើងលឿន កំរិត៤,៥% នៅត្រីមាសទីបីឆ្នាំ២០២២នេះ។ នេះបើតាមសេចក្តីជូនដំណឹងរបស់អាជ្ញាធរ ដោយបញ្ជាក់ថា លំហូរទេសចរណ៍អន្តរជាតិ កើនឡើងបន្តិចម្តងៗជាថ្មី អាចជួយប៉ះប៉ូវផលវិបាកដែលបង្កឡើងវិបត្តិអតិផរណាបាន។
ចុះផ្សាយនៅថ្ងៃ៖
ស្តាប់ - ០១:៥៤
ការបើកទ្វារទទួលស្វាគមន៍ទេសចរបរទេស តាំងពីដើមឆ្នាំមក បានលើកស្ទួយវិស័យសេវាកម្មរបស់មហាអំណាចសេដ្ឋកិច្ចលំដាប់ទីពីរប្រចាំតំបន់អាស៊ីអាគ្នេយ៍ ឱ្យមានកំណើនដល់ទៅ៨៧% ក្នុងមួយឆ្នាំ។ នេះបើតាមទិន្នន័យផ្លូវការ របស់ទីប្រឹក្សាអភិវឌ្ឍន៍សេដ្ឋកិច្ចជាតិនិងសង្គម ដែលកត់ត្រាឃើញកំណើនផលិតផលសរុបក្នុងស្រុក រវាងពីខែកក្កដា-កញ្ញា ឡើងច្រើនជាងឆ្នាំមុន ចំនួន៤,៥%។ រដ្ឋាភិបាលថៃព្យាករថា កំណើនសេដ្ឋកិច្ចជាតិ សម្រាប់ឆ្នាំ២០២២នេះ នឹងមានកំរិត៣,២% និងពី៣ទៅ៤% នៅឆ្នាំ២០២៣។
អគ្គលេខាទីប្រឹក្សាអភិវឌ្ឍន៍សេដ្ឋកិច្ចនិងសង្គម លោក ដានុចា ពិចាយ៉ាណន Danucha Pichanan បានអះអាងថា វិស័យសេវាកម្ម បានបន្តកើនឡើងរហូត តាំងពីដើមឆ្នាំមក និងរំពឹងថាវិស័យទេសចរណ៍អាចនឹងនាំចំណូលដល់ប្រទេសប្រមាណ ១៥ពាន់លានដុល្លារសហរដ្ឋអាមេរិក។ តាំងពីបើកប្រទេសឡើងវិញ មានភ្ញៀវបរទេសចំនួន ១០,២លាននាក់ បានមកទស្សនាប្រទេសថៃ។ ជាចំនួនដ៏ទាបជាងឆ្ងាយខ្លាំងណាស់ពី ឆ្នាំ២០១៩ ដែលថៃទទួលទេសចរបរទេសដល់ទៅ៤០លាននាក់។ នៅឆ្នាំ២០២៣ ចំនួនទេសចរបរទេសនឹងអាចកើនឡើងដល់២៣លាននាក់ ជាមួយនឹងការនាំចំណូលបាន៣៣០ពាន់លានដុល្លារ។ ថៃសង្ឃឹមថាអាចទទួលទេសចរចិនបានខ្លះវិញ នៅឆ្នាំក្រោយ បន្ទាប់ពីចិនបន្ធូរបន្ថយវិធានការកូវីដ។ មុនវិបត្តិកូវីដ ទេសចរចិនតំណាងឱ្យ២៨%នៃទេសចរបរទេសមកលេងថៃ។ នេះបើតាមBloomberg។
ការចាយវាយរបស់ពលរដ្ឋក៏បានកើនឡើង៩%ដែរ។ ប៉ុន្តែ ថៃក៏ដូចជាបណ្តាប្រទេសនៅលើពិភពលោកផ្សេងទៀតដែរ ត្រូវប្រឈមនឹងវិបត្តិអតិផរណាយ៉ាងខ្លាំង (៧%) ទំនិញឡើងថ្លៃ ការប្រាក់ខ្ពស់ និងថាមពលថ្លៃ។ នេះបើតាមអគ្គលេខាទីប្រឹក្សាអភិវឌ្ឍន៍សេដ្ឋកិច្ចនិងសង្គម លោក ដានុចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ