ចាញ់ឆ្នោតថ្នាក់មូលដ្ឋាន ប្រធានាធិបតីតៃវ៉ាន់ លាលែងចេញពីតួនាទីប្រមុខបក្ស
ក្នុងបរិបទនៃភាពតានតឹងខ្លាំងជាមួយចិន ការបោះឆ្នោតថ្នាក់មូលដ្ឋាននៅតៃវ៉ាន់ នៅថ្ងៃសៅរ៍ទី ២៦ វិច្ឆិកា ២០២២ មានតម្លៃជាយុទ្ធសាស្ត្រណាស់ សម្រាប់បក្សកាន់អំណាច ដែលប្រឆាំងយ៉ាងដាច់ខាតនឹងប៉េកាំង។ គ្រាន់តែឃើញបរាជ័យនៅក្នុងការបោះឆ្នោតភ្លាម លោកស្រីសៃអ៊ីនវេន បានប្រកាសភ្លាមដើរចេញពីតួនាទីជាប្រធានគណបក្ស។ ប៉ុន្តែលោកស្រី នៅតែជាប្រធានាធិបតីកោះតៃវ៉ាន់ដដែលទេ។
ចុះផ្សាយនៅថ្ងៃ៖
ស្តាប់ - ០២:១៨
“ការពារតៃវ៉ាន់ ហើយតស៊ូនឹងចិន” នេះគឺជាពាក្យស្លោករបស់គណបក្សចម្រើនប្រជាធិបតេយ្យតៃវ៉ាន់ ក្នុងយុទ្ធនាការឃោសនាបោះឆ្នោតថ្នាក់មូលដ្ឋានដែលប្រព្រឹត្តទៅនៅថ្ងៃទី ២៦វិច្ឆិកា២០២២នេះ។ ដូចការព្យាករចុងក្រោយ គណបក្សកាន់អំណាចដឹកនាំដោយលោកស្រី សៃ អ៊ីនវេន បានទទួលបរាជ័យ នៅតៃប៉ិ និងនៅក្នុងក្រុងចំនួន៣ទៀត ក្នុងចំណោមក្រុងទាំង៦ដែលរៀបចំការបោះឆ្នោត។ ប្រជាមតិស្តីពីបញ្ចុះអាយុពលរដ្ឋមានសិទ្ធិបោះឆ្នោតពី២០មក១៨ឆ្នាំក៏ត្រូវបានពលរដ្ឋតៃវ៉ាន់ច្រានចោលទៀត។
ភ្លាមមួយរំពេច លោកស្រីប្រធានាធិបតីតៃវ៉ាន់ សៃអ៊ីនវេន បានប្រកាសបោះបង់ តួនាទី ជាប្រធានបក្ស។ “លទ្ធផលឆ្នោតខុសពីការរំពឹងទុក ដូច្នេះខ្ញុំត្រូវតែលាលែងចេញពីតំណែងជាប្រមុខដឹកនាំបក្សភ្លាមតែម្តង”។ នេះជាប្រសាសន៍របស់លោកស្រីប្រធានាធិបតី ទៅកាន់អ្នកសារព័ត៌មាន ដែលនៅរក្សាតំណែងជាប្រមុខដឹកនាំកោះដដែល។
ចំណែកបក្សប្រឆាំង គួមីងតាង បក្សមានជំហរស្និទ្ធនឹងប៉េកាំង បានឡើងសំឡេងនាំមុខវិញ ជាមួយនឹងសំណើបែបផ្សះផ្សាជាមួយចិន និងដោយសន្យាជាថ្មីនៅថ្ងៃសៅរ៍នេះ ថានឹងប្រឹងព្យាយាមរក្សាសន្តិភាពក្នុងតំបន់ឱ្យដល់ទីបំផុត។ ប៉ុន្តែសម្រាប់អ្នកសង្កេតការណ៍ ការបោះឆ្នោតថ្នាក់មូលដ្ឋាននៅថ្ងៃសៅរ៍នេះ មិនមែនជាការធ្វើប្រជាមតិជ្រើសរើសស្និទ្ធ ឬប្រឆាំងនឹងចិនទេ។ ប្រជាពលរដ្ឋតៃវ៉ាន់៩៥%ប្រឆាំងនឹងគំនិតរណបចិនជានិច្ច។ ជោគជ័យរបស់បក្សប្រឆាំង ជាសញ្ញាពញ្ញាក់ស្មារតីដ៏សំខាន់មួយ ប៉ុន្តែមិនមែនមានន័យថាបក្សគួមីងតាង កំពុងឈានទៅឈ្នះឆ្នោតសភានិងប្រធានាធិបតី នៅពីរឆ្នាំទៀតខាងមុខឡើយ។ នេះបើតាមការវិភាគរបស់អ្នកស្រីគ្រីស្ទីនណា គីរ៉ុងស្កាKristina Kironska អ្នកស្រាវជ្រាវនៅវិទ្យាស្ថានអឺរ៉ុបសិក្សាអំពីអាស៊ី។
សូមរំលឹកថា តាំងពីលោកស្រី សៃអ៊ីនវេន ឡើងកាន់អំណាចមក ចិនបានកាត់ផ្តាច់ទំនាក់ទំនងផ្លូវការជាមួយកោះតៃវ៉ាន់ ហើយបានបង្កើនលំហាត់សឹក បន្តឹងគំនាបសេដ្ឋកិច្ច និងបានប្រលេះប្រទេសចំនួន៧ពីតៃវ៉ាន់ទៀត។ ភាពតានតឹងរវាងតៃវ៉ាន់និងចិនបានឡើងដល់កំពូលកាលពីខែសីហា នៅពេលប្រធានសភាអាមេរិកអញ្ជើញទៅតៃប៉ិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ