អាវុធនុយក្លេអ៊ែរ៖ ចិនវាយបកថា របាយការណ៍អាមេរិកធ្វើឡើងដោយគ្មានមូលដ្ឋាន
មួយសប្តាហ៍ក្រោយអាមេរិកចេញរបាយការណ៍ស្តីពីកំណើនក្បាលគ្រាប់នុយក្លេអ៊ែររបស់ចិន អ្នកនាំពាក្យរបស់ក្រសួងការពារជាតិចិនបានចេញមុខកាលពីថ្ងៃអង្គារទាត់ចោលការចោទប្រកាន់របស់ភាគីអាមេរិក។ របាយការណ៍របស់មន្ទីរបញ្ចកោនបង្ហាញថា ជាមួយការអភិវឌ្ឍសព្វាវុធមិនឈប់ ចិននឹងអាចផលិតស្តុកក្បាលគ្រាប់នុយក្លេអ៊ែរជាង ១៥០០គ្រាប់ពីពេលនេះដល់ឆ្នាំ ២០៣៥។ សម្រាប់អ្នកនាំពាក្យរបស់ក្រសួងការពារជាតិចិន របាយការណ៍ចោទប្រកាន់របស់មន្ទីរបញ្ចកោនធ្វើឡើងដោយគ្មានមូលដ្ឋាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ចិនសព្វថ្ងៃមានក្បាលគ្រាប់នុយក្លេអ៊ែរច្រើនជាង៤០០គ្រាប់។ បើសិនចិននៅតែបន្តអភិវឌ្ឍគ្រឿងសព្វាវុធ នោះ នៅក្នុងរយៈពេល១៣ឆ្នាំទៅមុខ ចំនួនស្តុកក្បាលគ្រាប់នុយក្លេអ៊ែររបស់ចិននឹងកើនឡើងជាង៣ដង ដល់ចំនួន ១៥០០គ្រាប់។ នេះបើតាមរបាយការណ៍របស់មន្ទីរបញ្ចកោន។
ចាត់ទុកចិនជាគូប្រជែងផ្នែកយោធាដ៏សំខាន់មួយ ក្រសួងការពារជាតិអាមេរិកបានចេញរបាយការណ៍ដែលសង្កត់ធ្ងន់ពីការរីកចម្រើនខ្លាំងរបស់ចិននៅក្នុងការអភិវឌ្ឍន៍គ្រឿងសព្វាវុធនុយក្លេអ៊ែរ។ អ្នកនាំពាក្យរបស់ក្រសួងការពារជាតិអាមេរិក លោក Pat Ryder បាននិយាយមិនលាក់លៀមថា ការពង្រីកចំនួនស្តុកក្បាលគ្រាប់នុយក្លេអ៊ែររបស់ចិនអាចជាប្រភពនៃអស្ថិរភាព។ “អាវុធនុយក្លេអ៊ែររីកសាយភាយកាន់តែច្រើន ក្តីបារម្ភនិងការបង្កអស្ថិរភាពក្នុងតំបន់ក៏មានកាន់តែច្រើន”។
សម្រាប់អ្នកនាំពាក្យរបស់ក្រសួងការពារជាតិចិន ការលើកឡើងទាំងអម្បាលម៉ានរបស់អាមេរិកនៅក្នុងរបាយការណ៍ ធ្វើឡើងដោយគ្មានមូលដ្ឋាន គ្មានភស្តុតាងពិតប្រាកដ។ តាមអ្នកនាំពាក្យចិន អាមេរិកបានចោទប្រកាន់ បំប៉ោងព័ត៌មានទាក់ទងនឹងការធ្វើទំនើបកម្មអាវុធនុយក្លេអ៊ែររបស់ចិន។ ប៉ុន្តែ តាមពិតគឺអាមេរិកខ្លួនឯងទេដែលត្រូវសើរើពិនិត្យមើលស៊ីជម្រៅនយោបាយនុយក្លេអ៊ែរបស់ខ្លួន។
ទោះចិនអាចមានកំណើនក្បាលគ្រាប់នុយក្លេអ៊ែរដល់១៥០០គ្រាប់ ប៉ុន្តែ ចិននៅតែស្ថិតនៅក្រោយមហាអំណាចយោធាអាមេរិកដែលមានចំនួនក្បាលគ្រាប់នុយក្លេអ៊ែរជាង៥៥០០គ្រាប់ ចំណែករុស្ស៊ីមានក្បាលគ្រាប់នុយក្លេអ៊ែរច្រើនជាងគេ ប្រមាណ ៦២៥០គ្រាប់។ នេះបើតាមការប៉ាន់ស្មានរបស់វិទ្យាស្ថានស្រាវជ្រាវអន្តរជាតិដែលមានទីតាំងនៅទីក្រុងស្តុកខូម។
នៅថ្ងៃអង្គារអ្នកនាំពាក្យរបស់ក្រសួងការពារជាតិចិនបានបរិហាររិះគន់ផងដែររបាយការណ៍អាមេរិកដែលលើកឡើងពីការបោះជំហានរីកចម្រើនយ៉ាងលឿនរហ័សរបស់វិស័យកងទ័ពជើងអាកាសរបស់ចិន។ នៅមុនមន្ទីរបញ្ចកោនចេញរបាយការណ៍ទៅទៀត អ្នកទទួលខុសត្រូវជាន់ខ្ពស់អាមេរិកម្នាក់បានលម្អិតថា កងទ័ពជើងអាកាសរបស់ចិនព្យាយាមបង្កើនសមត្ថភាពគ្រប់មុខព្រួញ ជាពិសេសការពង្រឹងសមត្ថភាពរបស់អ្នកបើកយន្តហោះ។
របាយការណ៍របស់អាមេរិកបានវាយតម្លៃដែរថា ចិនកំពុងធ្វើសកម្មភាពបែបបង្ខិតបង្ខំ និងឈ្លានពាននៅក្នុងតំបន់ឥណ្ឌូប៉ាស៊ីហ្វិក ជាពិសេសនៅជុំវិញតៃវ៉ាន់។
សម្រាប់អ្នកនាំពាក្យចិន ចំណុចចុងក្រោយដែលអាមេរិកបានលើកឡើងនៅក្នុងរបាយការណ៍បានបញ្ជាក់កាន់តែច្បាស់ ពីការលូកដៃចូលក្នុងកិច្ចការផ្ទៃក្នុងរបស់ចិន ព្រោះថា ចិននៅតែចាត់ទុកតៃវ៉ាន់ ជាខេត្តមួយដែលចិននឹងអាចយកមកគ្រប់គ្រងវិញនៅថ្ងៃណាមួយ ទោះបីជាត្រូវប្រើកម្លាំងយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ