ចិនមានប៉ុស្តិ៍ប៉ូលិសពីរ ចាំឃ្លាំមើលអ្នកប្រឆាំងនៅអាល្លឺម៉ង់
ឆ្លើយតបទៅនឹងសំណួររបស់សមាជិកសភា រដ្ឋាភិបាលអាល្លឺម៉ង់ បានបញ្ជាក់នៅថ្ងៃសុក្រទី៩ ធ្នូ២០២២នេះថា ចិនមានប៉ុស្តិ៍ប៉ូលិសខុសច្បាប់ និងដោយអាថ៌កំបាំង ចំនួន២កន្លែង។ ទំនងជាប៉ុស្តិ៍ប៉ូលិសសម្រាប់ឃ្លាំមើលអ្នកបះបោរចិន នៅបរទេស។ ព័ត៌មាននេះបានលេចឡើងបន្ទាប់ពី អង្គការក្រៅរដ្ឋាភិបាលចេញរបាយការណ៍មួយកាលពីដើមសប្តាហ៍ ទម្លាយឱ្យដឹងថាចិនមានបង្កប់ទីស្នាក់ការប៉ូលិសជាងមួយរយនៅលើពិភពលោក។
ចុះផ្សាយនៅថ្ងៃ៖
ស្តាប់ - ០១:៥៦
ក្រសួងមហាផ្ទៃអាល្លឺម៉ង់បានអះអាងថារដ្ឋាភិបាលបានដឹងអំពីវត្តមាននៃប៉ុស្តិ៍ប៉ូលិសចិនមិនស្របច្បាប់ចំនួនពីរកន្លែងនៅក្នុងទឹកដីអាល្លឺម៉ង់។ ជាប៉ុស្តិ៍ប៉ូលិសដែលគ្មានការិយាល័យឬទីស្នាក់ការច្បាស់លាស់ទេ ហើយដឹកនាំនិងរៀបចំឡើងដោយបុគ្គលិកឯកជន ដោយជនភៀសខ្លួនចិន មានដើមកំណើតមកពីតំបន់ដែលមានទម្លាប់ភៀសខ្លួនច្រើន។ តែអាជ្ញាធរចិន គ្មានអំណាចប្រតិបត្តិអ្វីនៅលើទឹកដីសហព័ន្ធអាល្លឺម៉ង់ឡើយ។ នេះបើតាមក្រសួងមហាផ្ទៃអាល្លឺម៉ង់ដដែល ដែលធានាថា រដ្ឋាភិបាលបានទាក់ទងទៅស្ថានទូតចិន ដើម្បីបំភ្លឺអំពីស្ថានភាពនេះហើយ។
ប៉ុន្តែសម្រាប់សមាជិកសភាអាល្លឺម៉ង់ បក្សស្តាំនិយមជ្រុលដែលអ្នកផ្ញើលិខិតទៅចោទសួររដ្ឋាភិបាលវិញ យល់ថា ការដែលរដ្ឋាភិបាលដឹងហើយបណ្តោយឱ្យចិនមានប៉ុស្តិ៍ប៉ូលិស ក្នុងទឹកដីឯង និងព្រមបញ្ជាក់ព័ត៌មាននៅពេលគេចុចសួរ ជារឿងអាស្រូវហួសហេតុ។
សូមបញ្ជាក់ថា វត្តមានប៉ុស្តិ៍ប៉ូលិសសម្ងាត់និងខុសច្បាប់ចិន នៅបរទេស ទើបត្រូវបានអង្គការក្រៅរដ្ឋាភិបាលទម្លាយឱ្យដឹងកាលពីថ្ងៃចន្ទ ថាមានចំនួនកើនឡើងដល់ជាងមួយរយកន្លែងនៅទូទាំងពិភពលោក។ កាលពីថ្ងៃទី ២៦ តុលា អាជ្ញាធរហូឡង់ក៏បានប្រកាសបើកអង្កេតជុំវិញការបង្កើតប៉ុស្តិ៍ប៉ូលិសដោយគ្មានសុំការអនុញ្ញាតពីរដ្ឋាភិបាលហូឡង់។ បើតាមសារព័ត៌មានហូឡង់ ចិនមានប៉ុស្តិ៍ប៉ូលិសពីរកន្លែង តាំងពីឆ្នាំ២០១៨មក មួយនៅក្នុងក្រុងអាំស្ទែរដាំ និងមួយនៅក្រុងកំពង់ផែរ៉ូទែរដាំ សម្រាប់ចាំបំបិទមាត់សកម្មជនប្រឆាំងចិនរស់នៅហូឡង់។
របបកុម្មុយនិស្តចិន ក៏មានប៉ុស្តិ៍ប៉ូលិសកំបាំងមុខពីរកន្លែងដែរនៅក្នុងប្រទេសសាធារណរដ្ឋឆែក។ តែ ប្រឈមនឹងការទម្លាយព័ត៌មានឱ្យដឹងអំពីវត្តមាននៃទីស្នាក់ការប៉ូលិសទាំងនោះផង និងការបរិហារប្រឆាំងរបស់សកម្មជនប្រឆាំងផង ប៉េកាំងបានសម្រេចបិទប៉ុស្តិ៍ប៉ូលិសទាំងពីរនៅប្រទេសឆែកកាលពីថ្ងៃព្រហស្បតិ៍ទី៨ធ្នូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ