ថៃ៖វិស័យទេសចរណ៍បានចាប់ស្គាល់កំណើនជាថ្មី ក្រោយពីរងគ្រោះយ៉ាងដំណំដោយកូវីដ១៩
នៅក្នុងប្រទេសថៃ ចំនួនអ្នកទេសចរបានឡើងដល់ ១០លាននាក់ក្នុងថ្ងៃសៅរ៍ ទី១០ ធ្នូ។ នេះជាសញ្ញាបញ្ជាក់ថា ទេសចរណ៍ដែលជាវិស័យគន្លឹះរបស់សេដ្ឋកិច្ចបានចាប់ផ្តើមស្គាល់កំណើនឡើងវិញ បន្ទាប់ពីបានរងគ្រោះដោយវិបត្តិកូវីដ១៩ យ៉ាងដំណំនារយៈពេលប៉ុន្មានឆ្នាំចុងក្រោយនេះ។ តែសន្ទុះកំណើននេះនៅឆ្ងាយខ្លាំងនៅឡើយបើធៀបនឹងមុនពេលផ្ទុះកូវីដ១៩។ ដើម្បីសាទរចំនួនអ្នកទេសចរ ១០លាននាក់នេះ រដ្ឋអំណាចបានរៀបចំពិធីរាំរែក និងប្រគំភ្លេងបូរាណនៅអាកាសយានដ្ឋានក្រុងបាងកកដើម្បីទទួលអ្នកដំណើររបស់ក្រុមហ៊ុនអាកាសចរណ៍ Saudi Arabian Airlines។
ចុះផ្សាយនៅថ្ងៃ៖
ស្តាប់ - ០២:១៨
គឺអ្នកដំណើរមួយយន្តហោះរបស់ក្រុមហ៊ុនអាកាសចរណ៍ Saudi Arabian Airlines នេះហើយដែលបានធ្វើឲ្យថៃមានចំនួនអ្នកទេសចរ ១០លាននាក់ក្នុងថ្ងៃសៅរ៍ ទី១០ ធ្នូ។ ក្រៅពីពិធីរាំរែក និងប្រគំភ្លេងបូរាណនៅអាកាសយានដ្ឋានក្រុងបាងកក ក្រុមអ្នកតំណាងរដ្ឋអំណាចទេសចរបានឲ្យបាច់ផ្កា ប័ណ្ណកាដូ និងសំបុត្រចូលទស្សនាសួនលេងទឹកទៅឲ្យគ្រួសារជនជាតិអារ៉ាប៊ីសាអូឌីតមួយគ្រួសារ។ ព្រឹត្តិការណ៍មួយនេះមិនត្រូវបាននាយករដ្ឋមន្រ្តីលោកប្រាយុទ្ធ ចាន់អូចាមើលរំលងដោយបានសាទរពីភាពធន់របស់អ្នកវិនិយោគក្នុងវិស័យទេសចរ និងវិស័យសណ្ធាគារ។
អ្វីដែលលោកប្រាយុទ្ធ ចាន់អូចាចង់បាននាពេលខាងមុខ គឺពង្រឹងទំនុកចិត្តដោយធ្វើយ៉ាងណាឲ្យប្រទេសថៃស្ថិតជាគោលដៅទេសចរណ៍មួយយ៉ាងសំខាន់របស់ប្រជាជននៅក្នុងលោក។ គួរបញ្ជាក់ថា ទេសចរណ៍ជាវិស័យគន្លឹះមួយរបស់សេដ្ឋកិច្ចថៃ។ តែក៏ដូចជាប្រទេសមួយចំនួនដែរ វិស័យមួយនេះបានរងគ្រោះយ៉ាងខ្លាំងដោយជំងឺកូវីដ១៩។ ក្នុងឆ្នាំ ២០១៩ ពោលមុនផ្ទុះកូវីដ១៩ ថៃទទួលបានអ្នកទេសចរជិត ៤០លាននាក់។ តែបានធ្លាក់នៅត្រឹម ៤២៧ ០០០នាក់ក្នុងឆ្នាំ ២០២១។ បន្ទាប់មកក្នុងឆ្នាំ ២០២២ ចំនួនអ្នកទេសចរបានហក់ឡើងលើសខ្សែបន្ទាត់ ១០លាននាក់។
តែសម្រាប់រដ្ឋាភិបាល ១០លាននាក់នៅឆ្ងាយសែនឆ្ងាយពីជិត ៤០លាននាក់ដែលថៃធ្លាប់ទទួលបាន។ លោកស្រីម៉ារីហ្សា ស៊ូកូសុល ប្រធានសមាគមសណ្ធាគារថៃបានថ្លែងដោយសង្ឃឹមលើអ្នកទេសចរចិនដែលកំពុងជាប់គាំងដោយនយោបាយសូន្យកូវីដ។ តាមលោកស្រីម៉ារីហ្សា ស៊ូកូសុល នយោបាយសូន្យកូវីដរបស់រដ្ឋាភិបាលក្រុងប៉េកាំងបានធ្វើឲ្យថៃបាត់បង់អ្នកទេសចរចិនប្រមាណជា ១០លាននាក់ក្នុងមួយឆ្នាំ។ ទោះជាយ៉ាងនេះក្តី លោកស្រីម៉ារីហ្សា ស៊ូកូសុលមិនភ្លេចគូសបញ្ជាក់ថា ពិភពលោកនៅផុយស្រួយដែលគេត្រូវប្រយ័ត្នប្រយែង។
យ៉ាងណាក៏ដោយ រដ្ឋាភិបាលថៃសង្ឃឹមទទួលបានអ្នកទេសចរចំនួន ២៣លាននាក់នៅឆ្នាំ ២០២៣ ដែលនឹងអាចនាំចំណូលបានជាង ៣២ ០០០លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ