ឥណ្ឌូណេស៊ី ៖ អាស៊ាន មិនគួរក្លាយជាទីលានប្រឈមមុខដាក់គ្នារវាងមហាអំណាចទេ
ឥណ្ឌូណេស៊ី ស្នើមហាអំណាចទាំងឡាយ មិនត្រូវយកតំបន់អាស៊ាន ធ្វើជាទីលានប្រឈមមុខដាក់គ្នា។ ការស្នើអំពាវនាវរបស់រដ្ឋបាលទីក្រុងហ្សាការតាបែបនេះ គឺធ្វើឡើងនៅខណៈពេលដែល ឥណ្ឌូណេស៊ី ធ្វើប្រធានអាស៊ានផ្លាស់វេន និងនៅក្នុងឱកាសបើកកិច្ចប្រជុំថ្នាក់រដ្ឋមន្ត្រីការបរទេសអាស៊ាន នាថ្ងៃសុក្រ ទី៣កុម្ភៈ ម្សិលមិញ។ ក៏ប៉ុន្តែ ក្នុងពេលជាមួយគ្នានេះ សហរដ្ឋអាមេរិកនិងហ្វីលីពីន បានប្រកាសពីការយាមល្បាតយោធារួមគ្នា នៅដែនសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:២១
ប្រមុខការទូតឥណ្ឌូណេស៊ី បានពាំនាំពាក្យរបស់ប្រធានាធិបតី ចូកូ វីដូដូ (Joko Widodo) ដែលស្នើក្តីអំពាវនាវថា «សមាគមប្រជាជាតិអាស៊ីអាគ្នេយ៍ មិនត្រូវធ្វើជាទីប្រឈមមុខដាក់គ្នានៃប្រទេសមហាអំណាច ព្រោះតែហេតុផលក្តីបារម្ភអ្វីណាក៏ដោយ»។ សេចក្តីប្រកាសដូច្នេះ គឺ ឥណ្ឌូណេស៊ី បានដឹងជាស្រេចថា ក្នុងឋានៈជាប្រធានផ្លាស់វេនអាស៊ាន ក្រុងហ្សារកាតានឹងត្រូវទទួលស្វាគមន៍ថ្នាក់ដឹកនាំមហាអំណាចចិននិងសហរដ្ឋអាមេរិក ទៅចូលរួមប្រជុំគ្នា ឆ្នាំ២០២៣។ សំណុំក្តៅគគុក គឺបញ្ហាសមុទ្រចិនខាងត្បូង ដែលរដ្ឋសមាជិកអាស៊ាន ជ្រើសរើសខ្នងបង្អែកតែរៀងៗគ្នា។
ជាក់ស្តែង នៅថ្ងៃព្រហស្បតិ៍ រដ្ឋមន្ត្រីការពារជាតិហ្វីលីពីន និងសហរដ្ឋអាមេរិក បានយល់ព្រម ថានឹងសហការយាមល្បាតរួមគ្នា នៅសមុទ្រចិនខាងត្បូង។ ដំណឹងនេះ ត្រូវទម្លាយចេញពីសំណាក់ថ្នាក់ដឹកនាំជាន់ខ្ពស់ហ្វីលីពីន ប្រាប់ទៅកាន់អ្នកកាសែតនៃទីភ្នាក់ងារព័ត៌មានបារាំង នៅថ្ងៃសុក្រ ទី៣កុម្ភៈ។
គួររំឭកថា ការយាមល្បាតក្តី ឬធ្វើសមយុទ្ធក្តីរវាងហ្វីលីពីននិងសហរដ្ឋអាមេរិក ត្រូវផ្អាកនៅជំនាន់ប្រធានាធិបតីចាស់ រ៉ូឌ្រីហ្គោ ឌុយទែរតេ។ ឌុយទែរតេ យល់ថា រដ្ឋបាលទីក្រុងវ៉ាស៊ីនតោន ធ្លាប់ដាក់អាណានិគមលើហ្វីលីពីន ដូច្នេះលោកមិនចង់ឲ្យម្ចាស់អាណានិគមត្រួតទៀតទេ។ ក្នុងរជ្ជកាលរបស់ប្រធានាធិបតីហ្វីលីពីនថ្មី ហ្វ៊ែរឌីណង់ ម៉ាកូស ជូញ៉រ កិច្ចសហការយោធាជាមួយអាមេរិក បានត្រឡប់មកវិញ។ កិច្ចព្រមព្រៀងថ្មីនៅថ្ងៃព្រហស្បតិ៍ ក៏អនុញ្ញាតឲ្យទាហានអាមេរិកដាក់មូលដ្ឋានយោធា៤កន្លែងបន្ថែមទៀតនៅហ្វីលីពីន។ ហ្វីលីពីន ដែលនៅកៀរក្បែរនឹងកោះតៃវ៉ាន់។ សំណុំរឿងតៃវ៉ាន់ ឧត្តមសេនីយអាមេរិកម្នាក់ ពាក់ផ្កាយមាសបួន បានព្យាករថា អាចប្រឈមប៉ះទង្គិចដាក់គ្នា នៅថ្ងៃណាមួយ ឬប្រហែលជា នៅឆ្នាំ២០២៥។
ក្រៅពីបញ្ហាសមុទ្រចិន អាស៊ានត្រូវលំបាកដោះស្រាយក្នុងបញ្ហាភូមា។ សំណុំរឿងភូមា នៅតែបន្តតាមញ៉ាំញីកិច្ចប្រជុំអាស៊ាន មិនថាថ្នាក់រដ្ឋមន្ត្រី ឬថ្នាក់កំពូលឡើយ។ ការប្រជុំថ្នាក់រដ្ឋមន្ត្រីបរទេសពីថ្ងៃសុក្រ គ្មានវត្តមានប្រមុខការទូតភូមាទេ ហើយរបបសឹកភូមា ក៏បានបដិសេធមិនព្រមបញ្ជូន«តំណាងស៊ីវិល» ទៅចូលរួមប្រជុំដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ