អាជ្ញាធរតៃប៉ិ បង្ហាញក្តីបារម្ភពីវត្តមាន«វត្ថុហោះ១» លើដែនអាកាសក្បែរកោះតៃវ៉ាន់
យោធាអាកាសក្រុងតៃប៉ិ បានប្រកាសប្រាប់ដំណឹងពីវត្តមាន«វត្ថុហោះ១» នៅដែនអាកាសប៉ែកខាងជើងកោះតៃវ៉ាន់ នាថ្ងៃសុក្រ។ ក្រៅពីសម្តែងក្តីបារម្ភ អាជ្ញាធរតៃវ៉ាន់នៅមិនទាន់វាយតម្លៃថា «វត្ថុហោះ១»នេះនឹងបង្កគ្រោះថ្នាក់ខ្លាំងកម្រិតប៉ុណ្ណាដល់សន្តិសុខកោះតៃវ៉ាន់ទេ។ នេះបើតាមសេចក្តីថ្លែងការណ៍របស់ យោធាអាកាសក្រុងតៃប៉ិ និងឲ្យដឹងថាបានផ្តល់ដំណឹងដល់យន្តហោះទាំងឡាយដែលហោះក្បែរៗនោះ ត្រូវបង្កើតការប្រុងប្រយ័ត្ន។
ចុះផ្សាយនៅថ្ងៃ៖
ស្តាប់ - ០១:៤៦
យោធាអាកាសក្រុងតៃប៉ិ បានយកចិត្តទុកដាក់យ៉ាងដិតដល់ចំពោះ«វត្ថុហោះ១» និងបានតាមដានជាប់រហូតទាល់តែវាហោះចេញផុតបាត់។ វត្ថុហោះដែលគេមិនទាន់អាចបញ្ជាក់អត្តសញ្ញាណនេះ កំពុងតែប្រុងធ្លាក់នៅក្នុងសមុទ្រចិន នៅម្តុំចម្ងាយប្រហែល ២៨០គីឡូម៉ែត្រ ពីក្រុងតៃប៉ិ។ នេះបើសេចក្តីថ្លែងការណ៍របស់ អាជ្ញាធរតៃវ៉ាន់ ប៉ុន្តែ មិនបានប្រាប់ពីជំហរនិងសេចក្តីសន្និដ្ឋានឲ្យច្បាស់លាស់ទេ ថា«វត្ថុហោះ១»នោះជាអ្វីឲ្យពិតប្រាកដ ហើយនិងប្រភព វាហោះមកពីណា ក៏ទេដែរ។
ជុំវិញវត្ថុហោះនេះ ពីរបីសប្តាហ៍មុន គឺភាពចម្រូងចម្រាស់គ្នាខ្លាំង រវាងសហរដ្ឋអាមេរិកនិងមហាយក្សចិន ដ្បិតថា ទ័ពអាកាសអាមេរិក បានបាញ់កម្ទេចបាឡុងចារកិច្ចចិន ជាបន្តបន្ទាប់ ដល់ទៅ ៣ បាឡុង ដែលហោះលើដែនអាកាសរបស់ខ្លួននិងប្រទេសកាណាដា។ រដ្ឋអំណាចចិន តែងតែបដិសេធទាល់ចោលថា នោះពុំជាបាឡុងចារកិច្ចទេ តែជាបាឡុងស៊ីវិល និងបង្ហោះពិនិត្យអាកាសធាតុតែប៉ុណ្ណោះ។
នៅពាក់កណ្តាលខែកុម្ភៈ ក្រសួងការពារជាតិតៃវ៉ាន់ ក៏ធ្លាប់បានបង្ហើបឲ្យដឹងពីវត្តមានបាឡុងហោះពិនិត្យអាកាសធាតុរបស់ចិនដែរ តែ ក្រុងតៃប៉ិ មិនរៀបរាប់លម្អិតថាមានចំនួនប៉ុន្មានទេ គឺគ្រាន់តែបញ្ជាក់ថា វាផ្ទុះបែកនៅលើអាកាស ហើយកម្រិតគំរាមកំហែងនៃគ្រោះថ្នាក់ មិនទាន់ដល់ថ្នាក់ប្រកាសអាសន្ន នៅឡើយទេ។
កាលពីថ្ងៃព្រហស្បតិ៍ ក្នុងសប្តាហ៍ មន្ត្រីសហរដ្ឋអាមេរិកម្នាក់សុំមិនបញ្ជេញឈ្មោះ ប្រាប់កាសែត The Wall Street Journal ថា សហរដ្ឋអាមេរិកនឹងបញ្ជូនកងទ័ព ចំនួន ១០០ ទៅ២០០នាក់ ទៅកោះតៃវ៉ាន់ ដើម្បីនឹងជួយបង្ហាត់ហ្វឹកហ្វឺនយោធាតៃវ៉ាន់។ សព្វថ្ងៃ ទ័ពអាមេរិក មានប្រមាណតែ ៣០នាក់ប៉ុណ្ណោះ នៅកោះតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ