របាយការណ៍អ.ស.ប៖របបសឹកបង្កើតវិបត្តិសិទ្ធិមនុស្សម្តងហើយ ម្តងទៀត
របបសឹកភូមាកំពុងធ្វើសង្រ្គាមប្រឆាំងប្រជាជនឯង។ នៅក្នុងរបាយការណ៍ កាលពីថ្ងៃសុក្រទី៣មីនា ក្រុមប្រឹក្សាសិទ្ធិមនុស្សរបស់អង្គការសហប្រជាជាតិបានចោទប្រកាន់របបសឹកភូមាថា បានបង្កើតវិបត្តិសិទ្ធិមនុស្ស ឥតល្ហែរ តាមរយៈការប្រើអំពើហិង្សា សម្លាប់មនុស្ស ចាប់ខ្លួនដោយអយុត្តិធម៌ ការធ្វើទារុណកម្ម និងការបាត់ខ្លួនរបស់អ្នកប្រឆាំងរដ្ឋប្រហារយោធា។ នៅក្នុងសេចក្តីថ្លែងការណ៍ ដាច់ដោយឡែក ឧត្តមស្នងការសិទ្ធិមនុស្សរបស់អង្គការសហប្រជាជាតិ ទាមទារឲ្យមានដំណោះស្រាយបន្ទាន់ ដើម្បីបិទបញ្ចប់អំពើហិង្សា ដ៏មហន្តរាយនៅភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៣
របាយការណ៍របស់ក្រុមប្រឹក្សាសិទ្ធិមនុស្ស អង្គការសហប្រជាជាតិ ចេញផ្សាយនៅថ្ងៃសុក្រទី ៣មីនា បង្ហាញថា នៅរយៈពេល២ឆ្នាំ ក្រោយរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កងទ័ពភូមាបានបង្កើនទាំងសមរភូមិប្រយុទ្ធ និងក្រុមសត្រូវ។
តាមអង្គការសហប្រជាជាតិ នៅក្រោយបើកការបង្រ្កាបហិង្សាទៅលើអ្នកប្រឆាំងរដ្ឋប្រហារ កាលពី ២ឆ្នាំមុន សមរភូមិប្រយុទ្ធរបស់កងទ័ពភូមា បានកើនឡើង ដល់ចំនួន ១៣កន្លែង នៅទូទាំងប្រទេស មិនថា នៅក្នុងតំបន់កាន់កាប់ដោយពួកឧទ្ទាមជនជាតិភាគតិច ឬនៅក្នុងតំបន់គ្រប់គ្រងដោយជនជាតិភូមាខ្លួនឯង។
ថ្លែងប្រាប់អ្នកកាសែតនៅទីក្រុងហ្សឺណែវ កាលពីថ្ងៃសុក្រ ប្រធានការិយាល័យសិទ្ធិមនុស្ស ទទួលបន្ទុកកិច្ចការភូមា លោកJames Rodehaver បាននិយាយថា របបសឹកភូមាបង្កើនការវាយប្រហារតាមផ្លូវអាកាស និងការបាញ់គ្រាប់ផ្លោង ដើម្បីបើកផ្លូវឲ្យកងទ័ពថ្មើជើង នៅលើទីសមរភូមិ។ ទឹកដីភូមាប្រមាណ ៧៧%កំពុងជួបប្រទះការប្រយុទ្ធគ្នារវាងកងទ័ព និងក្រុមប្រឆាំង ដែលមួយចំនួនបានទទួលការគាំទ្រផ្នែកអាវុធ ពីពួកឧទ្ទាមជនជាតិភាគតិច។ ជាលទ្ធផល ទីក្រុង ស្រុកភូមា ជាង ៣៣០ប៉ះពាល់ដោយផ្ទាល់ ដោយសារការប្រយុទ្ធគ្នារបស់គូបដិបក្ខ។
សម្រាប់ប្រធានការិយាល័យសិទ្ធិមនុស្សអង្គការសហប្រជាជាតិ នេះជាលើកទី១ ដែលភូមាជួបវិបត្តិសិទ្ធិមនុស្សដ៏ធ្ងន់ធ្ងរ និងសង្រ្គាមរាលដាលពេញប្រទេសយ៉ាងដូច្នេះ។
នៅទូទាំងប្រទេស ផ្ទះជិត ៤ម៉ឺនខ្នងត្រូវកងទ័ពដុតបំផ្លាញ ឬវាយកម្ទេច គិតចាប់តាំងពីខែកុម្ភៈ ឆ្នាំ ២០២២ចំណែកមនុស្សយ៉ាងតិច ២៩៤០នាក់ ត្រូវគេសម្លាប់ ដែលនៅក្នុងនោះ ៣០% ស្លាប់នៅក្នុងមន្ទីរឃុំឃាំង។
នៅក្នុងរបាយការណ៍ ដែលកត់ត្រាពីខែកុម្ភៈ ឆ្នាំ ២០២២ ដល់ខែមករា ឆ្នាំ ២០២៣ ការិយាល័យសិទ្ធិមនុស្សរបស់អង្គការសហប្រជាជាតិ នៅបានបរិហារយុទ្ធសាស្រ្តថ្មីរបស់របបសឹក ដែលមានគោលដៅកាត់ផ្តាច់ប្រភពទ្រទ្រង់របស់ក្រុមប្រឆាំង ដែលមានដូចជា ស្បៀង ការរើសបញ្ចូលកម្លាំងទ័ព ព័ត៌មានសម្ងាត់ និងការទទួលថវិកាហិរញ្ញវត្ថុពីខាងក្រៅ។
នៅក្នុងសេចក្តីថ្លែងការណ៍ដាច់ដោយឡែក ប្រធានឧត្តមស្នងការសិទ្ធិមនុស្សលោក Volker Turk បាននិយាយចោទប្រកាន់កងទ័ពភូមាថា ក្រៅតែពីបង្កើតច្បាប់ថ្មី និងអនុវត្តច្បាប់អាជ្ញាសឹក កងទ័ពភូមាបើកប្រតិបត្តិកាទៅលើក្រុមប្រឆាំង ជាមួយនិទណ្ឌភាព។ ចាប់តាំងពីកើតមានរដ្ឋប្រហារយោធាមក ប្រជាជនភូមាត្រូវរស់នៅ ប្រឈមគ្រប់ពេលវេលានឹងអំពើហិង្សា ឧក្រិដ្ឋកម្មសម្លាប់មនុស្ស ការចាប់ខ្លួនដោយបង្ខំ ទារុណកម្ម និងការរំលោភផ្លូវភេទ។
សម្រាប់ប្រធានការិយាល័យសិទ្ធិមនុស្សទទួលបន្ទុកភូមា នៅ២ឆ្នាំមកនេះ កងទ័ពភូមាបានបង្កើតវិបត្តិដ៏ធំមួយ ដែលនៅក្នុងនោះ ការគោរពសិទ្ធិមនុស្សបានធ្លាក់ចុះ ហៅលែងលឺ ប្រជាជនរងទុក្ខសោក បាត់បង់គ្រប់បែបយ៉ាង សូម្បីមូលដ្ឋានគ្រឹះ ដើម្បីរស់ និងក្តីសង្ឃឹមសម្រាប់អនាគតសេដ្ឋកិច្ចរបស់ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ