ថៃ៖គិតតាំងពីដើមឆ្នាំ ២០២៣ មានមនុស្សជាង ១លាន ៣សែននាក់បានធ្លាក់ខ្លួនឈឺដោយខ្យល់ពុលក្នុងបរិយាកាស
នៅក្នុងប្រទេសថៃ រដ្ឋអំណាចសុខាភិបាលបានបញ្ជាក់ថាក្នុងសប្តាហ៍នេះ មានមនុស្សប្រមាណជា ២០ម៉ឺននាក់បានធ្លាក់ខ្លួនឈឺចូលពេទ្យដោយសារស្រូបខ្យល់ពុលក្នុងបរិយាកាស ហើយបើគិតតាំងពីដើមឆ្នាំ ២០២៣ មក គឺមានជាង ១លាន ៣សែននាក់។ បាងកកជាទីក្រុងដែលកំពុងគ្របដណ្តប់ដោយខ្យល់ពុលខ្លាំងជាងគេ។ នៅថ្ងៃព្រហស្បតិ៍ ទី៩ មីនា នេះ បាងកកកំពុងបន្តស្ថិតក្នុងស្ថានភាពអាសន្ន ព្រោះអត្រាល្អងធូលីតូចល្អិតមានកម្រិតខ្ពស់ខ្លាំងនៅក្នុងបរិយាកាស។
ចុះផ្សាយនៅថ្ងៃ៖
ស្តាប់ - ០២:០៥
មានមនុស្សរស់នៅប្រមាណជា ១១លាននាក់ បាងកកបាន និងកំពុងបន្តជាទីក្រុងដែលមានសកម្មភាពមមាញឹកខ្លាំងទាំងផ្នែកជំនួញ និងទេសចរណ៍។ តែអ្វីដែលក្រុងបាងកកមិនអាចបាំងភ្នែកមនុស្សទូទៅបាន គឺការកកស្ទះចរាចរណ៍ និងមនុស្សម្នាស្អេកស្កះណែនណាន់តាន់តាប់នៅតាមផ្លូវគ្រប់ច្រកល្ហកទាំងអស់។ តាំងពីដើមសប្តាហ៍នេះមក ក្រុងបាងកក និងតំបន់ជុំវិញបានគ្របដណ្តប់ដោយផ្សែងពុលក្រាស់ឃ្មឹកដែលចេញពីបំពង់ស៊ីម៉ាំងឡាន និងបំពង់ផ្សែងរោងច្រក។ អត្រាផ្សែងពុលក្រាស់ឃ្មឹកនៅក្នុងខ្យល់នេះបានជំរុញឲ្យប្រជាជនពាក់ម៉ាសនៅពេលចេញពីផ្ទះ។ អនុសាសន៍របស់គ្រូពេទ្យម្នាក់នៃក្រសួងសុខាភិបាលសម្រាប់អ្នកក្រុងបាងកក គឺពាក់ម៉ាសប្រភេទ N៩៥ នៅពេលចេញក្រៅ។
ចំណែកកូនក្មេង ស្រ្តីមានផ្ទៃពោះ និងអ្នកមានបញ្ហាផ្លូវដង្ហើម ឬបេះដូងមិនត្រូវចេញក្រៅទេ។ ក្នុងថ្ងៃពុធ ទី៨ មីនា សង្កាត់ទាំង ៥០ នៅក្រុងបាងកកមានកម្រិតអត្រាល្អងធូលីតូចល្អិតលើសកម្រិតបង្ការឆ្ងាយណាស់។ ទីភ្នាក់ងារឃ្លាំមើលផ្សែងពុលក្នុងបរិយាកាសបានឲ្យដឹងក្នុងថ្ងៃព្រហស្បតិ៍ ទី៩ មីនានេះថា ក្នុងរយៈពេល ២៤ម៉ោងចុងក្រោយ កម្រិតអត្រាល្អងធូលីតូចល្អិតក្នុងសង្កាត់ប្រាទូណាមមានដល់ទៅ ៧០មីក្រូក្រាមក្នុងមួយម៉ែតគូបខ្យល់ ពោលលើសឆ្ងាយខ្លាំងពីកម្រិតកំណត់ដោយអង្គការសុខភាពពិភពលោកដែលមានត្រឹម ១៥មីក្រូក្រាម។ ដើម្បីទប់ស្កាត់នឹងកម្រិតផ្សែងពុលខ្ពស់ក្នុងបរិយាកាស រដ្ឋអំណាចក្រុងបាងកក និងតំបន់ជុំវិញបានចាត់វិធានការត្រួតពិនិត្យលើបំពង់ស៊ីម៉ាំងឡាននៅតាមផ្លូវ។
ចំណែកកន្លែងមើលកូនក្មេងរបស់រដ្ឋត្រូវបានបំពាក់ដោយម៉ាស៊ីនបន្សុតខ្យល់។ គួររម្លឹកថា ក្រុងបាងកក និងតំបន់ជុំវិញធ្លាប់ជួបកម្រិតផ្សែងពុលខ្ពស់ក្នុងបរិយាកាសនាដំណាច់ខែមករា។ កាលណោះ រដ្ឋអំណាចបានស្នើឲ្យអ្នកក្រុងបាងកកធ្វើការពីផ្ទះ។ សំណើនេះកំពុងបន្តស្ថិតជាបច្ចុប្បន្នភាពមកដល់សព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ