មហាសមយុទ្ធរវាងកូរ៉េខាងត្បូង និងអាមេរិកត្រូវបានកូរ៉េខាងជើងសាទរដោយបាញ់មីស៊ីលចំនួន ២គ្រាប់
នៅឧបទ្វីបកូរ៉េ សមយុទ្ធក្រោមឈ្មោះ « Freedom Shield ២០២៣ » រវាងកូរ៉េខាងត្បូង និងអាមេរិកបានចាប់ផ្តើមក្នុងថ្ងៃចន្ទ ទី១៣ មីនាសម្រាប់រយៈពេល ១០ថ្ងៃ។ តែនៅថ្ងៃអាទិត្យ ទី១២ មីនា ពោលនៅប៉ុន្មានម៉ោងមុនក្រុងសេអ៊ូល និងក្រុមវ៉ាស៊ីនតោនផ្តើមសមយុទ្ធរួមគ្នា ក្រុងព្យុងយ៉ាងបានបាញ់មីស៊ីលយុទ្ធសាស្រ្តចំនួន ២គ្រាប់ចេញពីនាវាមុជទឹក។ តាមរយៈការបាញ់មីស៊ីលនេះ កូរ៉េខាងជើងចង់សម្តែងការប្រឆាំងរបស់ខ្លួនចំពោះសមយុទ្ធរវាងកូរ៉េខាងត្បូង និងអាមេរិកពេលនេះ។
ចុះផ្សាយនៅថ្ងៃ៖
ស្តាប់ - ០២:០១
កំណើនភាពតានតឹងនៅឧបទ្វីបកូរ៉េដែលក្រុមអ្នកជំនាញបានទន្ទឹងរង់ចាំក្នុងសប្តាហ៍នេះបានកើតមានមែន។ ក្រុងព្យុងយ៉ាងបានបាញ់មីស៊ីលយុទ្ធសាស្រ្តចំនួន ២គ្រាប់ចេញពីនាវាមុជទឹក ហើយមីស៊ីលទាំង ២គ្រាប់នេះពិតជាបានធ្លាក់ចំផ្ទាំងស៊ីបដែលបានកំណត់ទុកមុននៅសមុទ្រខាងកើតកូរ៉េ ឬហៅសមុទ្រជប៉ុន នេះបើតាមទីភ្នាក់ងារផ្លូវការកូរ៉េខាងជើងឈ្មោះ KCNA។ តាម KCNA ដដែល ការបាញ់មីស៊ីលយុទ្ធសាស្រ្តទាំង ២គ្រាប់ចេញពីនាវាមុជទឹកបានអនុញ្ញាតឲ្យក្រុងព្យុងយ៉ាងផ្ទៀងផ្ទាត់នូវសមត្ថភាព និងមធ្យោបាយប្រតិបត្តិការការពារខ្លួនដោយនុយក្លេអ៊ែរ។
តែអ្វីជាការកត់សម្គាល់ ការបាញ់មីស៊ីលទាំង ២គ្រាប់របស់កូរ៉េខាងជើងបានធ្វើឡើងតែប៉ុន្មានម៉ោងប៉ុណ្ណោះ មុនកូរ៉េខាងត្បូង និងអាមេរិកផ្តើមសមយុទ្ធរួមគ្នាក្រោមឈ្មោះ « Freedom Shield ២០២៣ »។ ដូច្នេះ ការបាញ់មីស៊ីលរបស់ក្រុងព្យុងយ៉ាងពេលនេះមានបង្កប់ដោយសញ្ញាពីរ ទី១ ជាការធ្វើតេស្តិ៍សមត្ថភាពខ្លួនឯង និងទី២ ជាការសម្តែងភាពមិនសប្បាយចិត្តនឹងសមយុទ្ធរវាងអាមេរិក និងកូរ៉េខាងត្បូង។ ចូរកុំភ្លេចថា កូរ៉េខាងជើងបានចាត់ទុកគ្រប់សមយុទ្ធរវាងអាមេរិក និងកូរ៉េខាងត្បូងជាការរៀបចំជើងព្រួលត្រៀមវាយចូលឈ្លានពានខ្លួន។
« ពួកចក្រពត្តិនិយមអាមេរិក និងកងកម្លាំងអាយ៉ងកូរ៉េខាងត្បូងកំពុងបោះជំហានទៅមុខៗបន្តិចម្តងៗនៅក្នុងសមយុទ្ធរបស់ពួកគេដើម្បីប្រឆាំងកូរ៉េខាងជើង » នេះជាការយល់ឃើញរបស់ KCNA។ គួរបញ្ជាក់ថា សមយុទ្ធរវាងកូរ៉េខាងត្បូង និងអាមេរិកក្រោមឈ្មោះ « Freedom Shield ២០២៣ » រយៈពេល ១០ថ្ងៃមានគោលដៅបង្កើនកិច្ចសហប្រតិបត្តិផ្លូវអាកាស ក្នុងទឹក និងលើគោករវាងកងទ័ពទាំងពីរប្រទេស។ តែអ្វីដែលគេអាចរង់ចាំពីសមយុទ្ធរវាងក្រុងសេអ៊ូល និងក្រុងវ៉ាស៊ីនតោនពេលនេះ គឺការបាញ់មីស៊ីល ឬការសាកល្បងនុយក្លេអ៊ែររបស់ក្រុងព្យុងយ៉ាងនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ