ថៃ៖រដ្ឋអំណាចកំពុងស្វែងរកស៊ីឡាំងផ្ទុកសារធាតុវិទ្យុសកម្មដែលបានបាត់ពីមជ្ឈមណ្ឌលអគ្គិសនីមួយ
នៅក្នុងប្រទេសថៃ រដ្ឋអំណាចបានប្រកាសឲ្យដឹងក្នុងថ្ងៃពុធ ទី១៥ មីនានេះពីការកំពុងបន្តស្វែងរកយ៉ាងសកម្ម និងជាបន្ទាន់នូវស៊ីឡាំងមួយដែលបានបាត់ពីមជ្ឈមណ្ឌលអគ្គិសនីមួយស្ថិតក្នុងខេត្តប្រាជីនប៊ូរី។ ការស្វែងរកយ៉ាងសកម្ម និងជាបន្ទាន់ដោយសារតែនៅក្នុងស៊ីឡាំងនោះមានផ្ទុកសារធាតុវិទ្យុសកម្មប្រកបដោយគ្រោះថ្នាក់ខ្លាំង។ រដ្ឋអំណាចបានព្រមានពីហានិភ័យធ្ងន់ធ្ងរដល់សុខភាព បើមានការប្រឈមផ្ទាល់នឹងការបែកធ្លាយវិទ្យុសកម្មចេញពីស៊ីឡាំងនោះ។
ចុះផ្សាយនៅថ្ងៃ៖
ស្តាប់ - ០២:១៥
ស៊ីឡាំងដែលបានបាត់ពីមជ្ឈមណ្ឌលអគ្គីសនីដើរដោយធ្យូងថ្មធ្វើឡើងពីដែកថែបមានទម្ងន់ ២៥គីឡូក្រាម មានបណ្តោយ ៣០សង់ទីម៉ែត្រ និងមានទទឹង ១៣សង់ទីម៉ែត្រ។ ព័ត៌មានស្តីពីការបាត់ស៊ីឡាំងនេះបានផ្តល់ដោយបុគ្គលិកមជ្ឈមណ្ឌលអគ្គិសនីនៅពេលចុះត្រួតពិនិត្យប្រចាំកាលពីថ្ងៃសុក្រ ទី១០ មីនា។ តែអ្វីដែលរដ្ឋអំណាចថៃកំពុងបារម្ភខ្លាំងពីការបាត់ស៊ីឡាំងនេះ គឺមកពីនៅក្នុងស៊ីឡាំងនោះមានផ្ទុកសារធាតុវិទ្យុសកម្មកម្រិតខ្ពស់ខ្លាំងប្រកបដោយគ្រោះថ្នាក់។ ការស្វែងរកតាំងពីចុងសប្តាហ៍កន្លងទៅនៅមិនទាន់មានសញ្ញាណាមួយដើម្បីអាចដឹងពីវត្តមានទីតាំងរបស់ស៊ីឡាំងនោះនៅឡើយទេ។
មួយវិញទៀត រដ្ឋអំណាចក៏នៅមិនទាន់អាចសន្និដ្ឋានបានពីការបាត់ស៊ីឡាំងនោះយ៉ាងម៉េចនៅឡើយដែរ។ តែក្រុមហ៊ុនថាមពលរដ្ឋដែលជាអ្នកគ្រប់គ្រងមជ្ឈមណ្ឌលអគ្គិសនីបានសន្មត់ថា ស៊ីឡាំងដែលចាប់ជាប់នឹងជញ្ជាំងនៅកម្ពស់ ១៨ម៉ែត្រពីដីបានធ្លាក់ចុះនៅប៉ុន្មានថ្ងៃមុននឹងដឹងថាបាត់។ ដើម្បីពន្លឿនការស្វែងរក ចៅហ្វាយខេត្តប្រាជីនប៊ូរីបានអំពាវនាវសុំជំនួយពីប្រជាជនដែលរស់នៅក្នុងតំបន់ និងព្រមានពីគ្រោះថ្នាក់ដល់សុខភាព ប្រសិនបើមានការព្យាយាមបើកស៊ីឡាំងដែលមានផ្ទុកសារធាតុវិទ្យុសកម្មនោះ។ ក្រៅពីការស្វែងរកដោយផ្ទាល់ រដ្ឋអំណាចក៏បានរូបភាពថតដោយកាំមេរ៉ាសុវត្ថិភាពដើម្បីស្វែងរកអត្តសញ្ញាណមនុស្សដែលបានយកស៊ីឡាំងចេញពីមជ្ឈមណ្ឌលអគ្គិសនី។
តាមរដ្ឋអំណាច ស៊ីឡាំងដែលបាត់ត្រូវបានប្រើដើម្បីវាស់សម្ពាធនៅក្នុងបំពង់ចំហាយទឹករបស់មជ្ឈមមណ្ឌលអគ្គិសនី។ តែរដ្ឋអំណាចមិនបានបញ្ជាក់ពីបរិមាណសារធាតុវិទ្យុសកម្មដែលមាននៅក្នុងស៊ីឡាំងនោះទេ។ គួរបញ្ជាក់ថា រឿងបាត់ស៊ីឡាំងមានផ្ទុកសារធាតុវិទ្យុសកម្មនៅថៃពេលនេះស្រដៀងគ្នានឹងការបាត់កូនបំពង់តូចមួយមានផ្ទុកសារធាតុវិទ្យុសកម្មដែលបានធ្លាក់ពីឡានកាំមីញ៉ុងមួយកាលពីពាក់កណ្តាលខែមករានៅក្នុងប្រទេសអូស្រ្តាលី។ តែក្រោយពីបានប្រើពេលស្វែងរកចំនួន ២សប្តាហ៍ រដ្ឋអំណាចអូស្រ្តាលីបានរកឃើញកូនបំពង់តូចនោះវិញដែលមានស្ថានភាពដូចដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ