ចិនដាក់«ទណ្ឌកម្មបុគ្គល»ចំពោះអ្នកតំណាងតៃវ៉ាន់នៅអាមេរិក និងស្ថាប័នអាមេរិកមួយចំនួន
ថ្ងៃសុក្រ ទី៧មេសា រដ្ឋអំណាចចិនប៉េកាំង បានសម្រេចដាក់«ទណ្ឌកម្មបុគ្គល»ចំពោះ«អ្នកតំណាង»កោះតៃវ៉ាន់ប្រចាំនៅសហរដ្ឋអាមេរិក ដោយហាមឃាត់«រដ្ឋទូត»តៃវ៉ាន់មិនឲ្យចេញចូលទឹកដីរបស់ចិន។ មិនតែប៉ុណ្ណោះ រដ្ឋអំណាចចិន ក៏បានដាក់ទណ្ឌកម្មដូចគ្នានេះដែរ ចំពោះថ្នាក់ដឹកនាំស្ថាប័នមួយចំនួនរបស់សហរដ្ឋអាមេរិក ដែលជួយ«ជ្រោមជ្រែង»កោះតៃវ៉ាន់។ ជាប្រតិកម្មឆ្លើយតប អាជ្ញាធរតៃវ៉ាន់ សោកស្តាយចំពោះការសម្រេចរបស់រដ្ឋបាលចិនដីគោក ក៏ប៉ុន្តែ រដ្ឋបាលក្រុងតៃប៉ិ អះអាងថា ទណ្ឌកម្មរបស់ចិននេះ គ្មានបានផលទេ ហើយតៃវ៉ាន់នឹងនៅតែបន្តកិច្ចការរបស់ខ្លួនជានិច្ច។
ចុះផ្សាយនៅថ្ងៃ៖
សារព័ត៌មានផ្លូវរដ្ឋចិនបញ្ជាក់ថា ទណ្ឌកម្មបុគ្គល ទៅលើអ្នកស្រី ស៊ូវ មីជីន តំណាងទូតតៃវ៉ាន់នៅអាមេរិក គឺហាមឃាត់អ្នកស្រីនិងសមាជិកក្រុមគ្រួសារ មិនឲ្យចេញចូលជាន់ដែនដីរបស់ចិនដីគោក ហុងកុង និង ម៉ាកាវ។ ទណ្ឌកម្មនេះដាក់ចេញពី ការិយាល័យរដ្ឋបាលចិនទទួលបន្ទុកកិច្ចការតៃវ៉ាន់ ហើយបំរាមហាមឃាត់នេះក៏ជះឥទ្ធិពលប៉ះពាល់ដូចគ្នាទៅដល់ បណ្តាក្រុមសហគ្រាស ឈ្មួញវិនិយោគទុន ឬបុគ្គលឯកជនណា ដែលជាប់ពាក់ព័ន្ធនឹងអ្នកតំណាងទូតតៃវ៉ាន់រូបនេះ។ មូលនិធិ Prospect Foundation ដែលបំផុសគំនិតសេរីនិយមនិងប្រជាធិបតេយ្យនៅអាស៊ី បង្កើតដោយអតីតថ្នាក់ដឹកនាំតៃវ៉ាន់ ក៏ធ្លាក់ខ្លួនចូលក្នុងបញ្ជីទណ្ឌកម្មចិនដែរ។
ចិនដាក់ទណ្ឌកម្មដូច្នេះ គឺបន្ទាប់ពីការជួបជជែកគ្នារវាងថ្នាក់ដឹកនាំតៃវ៉ាន់ អ្នកស្រី សៃ អ៊ីងវេន និងប្រធានសភាអាមេរិក លោក Kevin McCharhty។ ទណ្ឌកម្មថ្ងៃសុក្រ គឺក្រោយពីថ្ងៃព្រហស្បតិ៍ ដែល ចិន បានរំកិលនាវាចម្បាំង ៣ គ្រឿង និង បង្ហោះឧទ្ធម្ភាគចក្រប្រឆាំងនាវាមុជទឹក ទៅកៀកកោះតៃវ៉ាន់។
នៅសុក្រដែរ ក្រសួងការបរទេសចិន បានដាក់ចេញចំណាត់ការនិងទណ្ឌកម្មថែមទៀត ចំពោះវិទ្យាស្ថាន Hudson ជាក្រុមសញ្ជឹងគិតនៅវ៉ាស៊ីនតោន និង បណ្ណាល័យ Ronald Reagan ដែលជួយសម្របសម្រួលជំនួបរវាងប្រធានាធិបតីតៃវ៉ាន់និងប្រធានរដ្ឋសភាអាមេរិក។ ក្រសួងការបរទេសចិន បញ្ជាក់ថាស្ថាប័នអាមេរិកទាំងនេះ បានផ្តល់វេទិកា និងជួយជំរុញសម្រួលដល់សកម្មភាពចង់ផ្តាច់ខ្លួនរបស់តៃវ៉ាន់។ ទីភ្នាក់សារព័ត៌មានបារាំងAFP ទាក់ទងសុំការបំភ្លឺពីស្ថាប័នអាមេរិកទាំង២ដែរ តែគ្មានប្រតិកម្ម។
រីឯ ក្រសួងការបរទេសតៃវ៉ាន់ បានថ្លែងក្តីខឹងក្រោធ និងបានបន្ទោសចិនថាគ្មានសិទ្ធិមកជ្រៀតជ្រែងដំណើរទៅបរទេសរបស់ប្រធានាធិបតីរបស់ខ្លួនឡើយ ហើយទង្វើរបស់ចិនកុម្មុយនិស្ត គឺគួរឲ្យអស់សំណើច។ តៃវ៉ាន់បន្ទរទៀតថា រដ្ឋអំណាចចិន យល់ច្រឡំ និងគិតខុស។ គិតខុសដែលដេកស្រមៃថា ទណ្ឌកម្មមានប្រសិទ្ធភាព តែតាមពិតគឺ ទទេស្អាត។
រដ្ឋបាលក្រុងតៃប៉ិ លើកឡើងពន្យល់ថា សាច់ការជាក់ស្តែង ទណ្ឌកម្មរបស់ក្រុងប៉េកាំង មានឥទ្ធិពលតិចតួចស្តួចស្តើង ឬស្ទើរតែគ្មាន ដ្បិតថា ថ្នាក់ដឹកនាំតៃវ៉ាន់ មិនដែលទៅជាន់ដីចិនដីគោក ហើយតុលាការចិន ក៏គ្មានដែនយុត្ថាធិការ គ្មានសមត្ថកិច្ច អ្វី នៅលើកោះតៃវ៉ាន់ ទេ។ ផ្ទុយទៅវិញ អាជ្ញាធរតៃវ៉ាន់ ឌឺដងថា ទណ្ឌកម្មចិន គឺកាន់តែជំរុញឆន្ទៈឲ្យតៃវ៉ាន់ប្រឹងប្រែងធ្វើការនៅលើឆាកអន្តរជាតិ កាន់តែខ្លាំងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ