ចិនកំពុងក្តៅស្លឹកត្រចៀកខ្លាំងនឹងជំនួបរវាងប្រធានាធិបតីតៃវ៉ាន់ និងប្រធានសភាអាមេរិក
នៅតៃវ៉ាន់ រដ្ឋមន្រ្តីការពារជាតិបានប្រកាសក្នុងថ្ងៃព្រហស្បតិ៍ ទី៦ មេសានេះថា ចិនបានបញ្ជូននាវាចម្បាំងទៅកាន់ដែនទឹកព័ទ្ធជុំវិញកោះតៃវ៉ាន់។ តាមរដ្ឋមន្រ្តីការពារជាតិតៃវ៉ាន់រូបនេះដដែល តៃវ៉ាន់ក៏បានឃើញវត្តមានឧទ្ធម្ភាគចក្រប្រឆាំងនាវាមុជទឹករបស់ចិនបានហោះឆ្លងកាត់តំបន់ការពារដែនអាកាសរបស់តៃវ៉ាន់ដែរ។ ការដែលចិនកំពុងដំឡើងសាច់ដុំដាក់តៃវ៉ាន់ជាថ្មីបានកើតមានឡើង ក្រោយពីប្រធានាធិបតីតៃវ៉ាន់លោកស្រី សៃ អ៊ីងវេនបានចូលជួបប្រធានសភាអាមេរិកលោកគេវីន ម៉ាកការទីក្នុងរដ្ឋកាលីហ្វ័រញ៉ា។
ចុះផ្សាយនៅថ្ងៃ៖
ស្តាប់ - ០២:០៦
ទោះបីមានការព្រមាន និងគំរាមច្រើនដងពីចិនក៏តៃវ៉ាន់មិនខ្ចីយកត្រចៀកស្តាប់ និងបន្តធ្វើមិនដឹង មិនឮ។ ដូចដែលបានគ្រោងទុកក្នុងថ្ងៃពុធ ទី៥ មេសា ប្រធានាធិបតីតៃវ៉ាន់លោកស្រី សៃ អ៊ីងវេនបានចូលជួបប្រធានសភាអាមេរិកលោកគេវីន ម៉ាកការទីក្នុងរដ្ឋកាលីហ្វ័រញ៉ា ក្រោយពីលោកស្រីបានវិលត្រឡប់ពីទស្សនកិច្ចនៅតំបន់អាមេរិកឡាទីន។ ដូចដែលបានគំរាម និងព្រមាន ចិនបានបញ្ជូននាវាចម្បាំងសរុបចំនួន ៤ គ្រឿងនៅដាក់ក្នុងដែនទឹកព័ទ្ធជុំវិញកោះតៃវ៉ាន់។ ទន្ទឹមគ្នានេះ និងបើតាមរដ្ឋមន្រ្តីការពារជាតិតៃវ៉ាន់លោកឈាវ គួរជឹង មានឧទ្ធម្ភាគចក្រប្រឆាំងនាវាមុជទឹករបស់ចិនមួយគ្រឿងបានហោះឆ្លងកាត់តំបន់ការពារដែនអាកាសរបស់តៃវ៉ាន់។
គួររម្លឹកថាក្នុងខែសីហា ឆ្នាំ ២០២២ ចិនបានធ្វើសមយុទ្ធទ្រង់ទ្រាយធំនៅជុំវិញតៃវ៉ាន់ដែលកាលណោះ ជាចម្លើយតបនឹងទស្សនកិច្ចរបស់ប្រធានសភាអាមេរិកពេលនោះលោកស្រីណាន់ស៊ី ប៉េឡូស៊ីនៅតៃវ៉ាន់។ ចុះនៅក្នុងជំនួបរវាងប្រធានាធិបតីតៃវ៉ាន់លោកស្រី សៃ អ៊ីងវេន និងប្រធានសភាអាមេរិកលោកគេវីន ម៉ាកការទីពេលនេះ តើចិនអាចនឹងធ្វើសមយុទ្ធទ្រង់ទ្រាយធំដូចក្នុងខែសីហា ឆ្នាំ ២០២២ ដែរ ឬទេ?។ « យើងមិនទាន់ចោលសម្មតិកម្មមួយនេះទេ ហើយយើងបន្តឃ្លាំមើល »នេះជាការថ្លែងរបស់រដ្ឋមន្រ្តីការពារជាតិតៃវ៉ាន់លោកឈាវ គួរជឹងនៅចំពោះមុខក្រុមអ្នកកាសែត។
បើតាមមើលទៅ ចម្លើយរបស់ចិនប្រហែលមិនមានត្រឹមបញ្ជូននាវាចម្បាំងនៅដាក់ជុំវិញតៃវ៉ាន់ប៉ុណ្ណោះទេ។ អ្នកនាំពាក្យក្រសួងការបរទេសចិនលោកស្រីម៉ាវ នីងបានបញ្ជាក់ក្នុងថ្ងៃព្រហស្បតិ៍ ទី៦ មេសានេះថា ចិននឹងចាត់វិធានការម៉ឺងម៉ាត់ដើម្បីការពារអធិបតេយ្យជាតិ និងបូរណភាពទឹកដីរបស់ខ្លួន។ គួររម្លឹកថា ចិនតែងចាត់ទុកតៃវ៉ាន់ជាខេត្តឧទ្ទាមរបស់ខ្លួន និងប្រើកម្លាំងវាយប្រហារបើកោះនេះហ៊ានប្រកាសឯករាជ្យនៅថ្ងៃណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ