ថ្នាក់ដឹកនាំតៃវ៉ាន់ អះអាងថានឹងរក្សា«ជំហរដដែល» ចំពោះមុខរដ្ឋអំណាចចិន
ថ្ងៃសៅរ៍ ទី២០ឧសភា ប្រធានាធិបតីតៃវ៉ាន់ អ្នកស្រី សៃ អ៊ីងវេន អះអាងថានៅតែបន្តរក្សាជំហរចំពោះសន្តិភាពនិងស្ថិរភាពជានិច្ច ហើយតៃវ៉ាន់ប្តេជ្ញាចិត្តការពារខ្លួនជានិច្ចទប់ទល់នឹងការគំរាមកំហែង។ ក៏ប៉ុន្តែ ថ្នាក់ដឹកនាំតៃវ៉ាន់ បញ្ជាក់ដែរថា «សង្គ្រាមគឺពុំមែនជាជម្រើសសម្រាប់តៃវ៉ាន់ឡើយ»។
ចុះផ្សាយនៅថ្ងៃ៖
ស្តាប់ - ០២:៤៣
ក្នុងសុន្ទរកថា ប្រធានាធិបតីតៃវ៉ាន់ អ្នកស្រី សៃ អ៊ីងវេន បានកោតសរសើរកម្លាំងប្រជាជាតិរបស់ខ្លួន ប្រមាណ២៤លាននាក់ ដែលបានប្តេជ្ញាចិត្តមាំទប់ទល់នឹងការគំរាមកំហែងឥទ្ធិពលយោធាពីសំណាក់ចិនប៉េកាំង។ តាមប្រសាសន៍អ្នកស្រី សៃ អ៊ីងវែន គឺនៅចំពោះមុខការគំរាម ពលរដ្ឋតៃវ៉ាន់បែរជារក្សាភាពស្ងប់ស្ងៀម រក្សាការជញ្ជឹងគិតពិចារណាដោយប្រាកដនិយម មិនបញ្ចេញសកម្មភាពហិង្សាច្រឡោតច្រងែងច្រងាង និងមិនញុះញង់។ អ្នកស្រីថ្នាក់ដឹកនាំតៃវ៉ាន់ បន្ថែមទៀតថា ទោះបីជាពលរដ្ឋមិនហិង្សា និងមិនញុះញង់ក្តី តែពលរដ្ឋយើង ក៏មិនចុះញមឱនក្បាលក្រោមសម្ពាធជិះជាន់ដែរ។ ជំហររបស់យើង គឺមិនមែនចង់បង្កសង្គ្រាមទេ ក៏ប៉ុន្តែ តៃវ៉ាន់មិនព្រមទាល់តែសោះ បើភាគីណា មកផ្លាស់ប្តូរសភាពនៅទ្រឹងដដែលដូច្នេះ ដោយបង្កប្រើកម្លាំងហិង្សាដើម្បីបង្រួបបង្រួមតៃវ៉ាន់។
សម្តីនេះ គឺគ្មានអ្វីពីបង្ហាញជំហរដដែលប្រាប់ទៅរដ្ឋបាលក្រុងប៉េកាំងនោះឡើយ។ រយៈពេលប្រមាណ១០ឆ្នាំចុងក្រោយនេះ ទំនាក់ទំនងចិននិងតៃវ៉ាន់ ធ្លាក់ចុះដុនដាបខ្លាំង ពិសេសនៅក្នុងអាណត្តិដឹកនាំរដ្ឋអំណាចចិន របស់លោក ស៊ី ជីនពីង ហើយនិងក្នុងអាណត្តិដឹកនាំតៃវ៉ាន់របស់អ្នកស្រី សៃ អ៊ីងវេន។ ចិន កាន់តែបង្កើនឥទ្ធិពលយោធា និងខិតៗទៅក្បែរតៃវ៉ាន់ ហើយតៃវ៉ាន់ក៏ចេះតែស្រែករកជំនួយ និងពឹតតែបង្ហាញភាពស្និទ្ធស្នាលនឹងសហរដ្ឋអាមេរិក ជាសត្រូវរបស់ចិន។
អាយុ៦៦ឆ្នាំ អ្នកស្រី សៃ អ៊ីងវេន ដឹកនាំតៃវ៉ាន់២អាណត្តិហើយ និងគ្មានសិទ្ធិឈរឈ្មោះបោះឆ្នោត១អាណត្តិទៀតទេ។ ការបោះឆ្នោតនៅតៃវ៉ាន់ នឹងត្រូវរៀបចំនៅខែមករា ដើមឆ្នាំថ្មី។ ចាប់ពីឥលូវទៅហើយ ដែល រដ្ឋបាលក្រុងតៃប៉ិ បានគិតគូរពីអ្នកជំនួសបន្តវេន។ ខាងបក្សប្រជាធិបតេយ្យរបស់អ្នកស្រី សៃ អ៊ីងវេន គឺបានរើសរួចស្រេចហើយ លោកអនុប្រធានាធិបតី William Lai អាយុ៦៣ ជាមនុស្សប្រកាន់ជំហរចង់ឃើញ «តៃវ៉ាន់ មាន ស្វយ័តភាព អធិបតេយ្យ របស់ខ្លួន»។
ចំណែកបក្សប្រឆាំង គួមីងតាំង គឺជ្រើសរើសលោក Hou Yu-ih ដែលមាននិន្នាការស្និទ្ធខ្លាំងនឹងរដ្ឋអំណាចចិន ដោយមិនចង់ឃើញតៃវ៉ាន់ប្រកាសឯករាជ្យ ហើយនិងយល់ស្របឲ្យតៃវ៉ាន់បន្តប្រកាន់គោលការណ៍«ប្រទេស១ប្រព័ន្ធ២»ដូចដែលធ្លាប់ប្រើនៅ ហុងកុង។ ដែលចំណុចនេះ ត្រូវសឲ្យ ម្ចាស់ឆ្នោតកត់សម្គាល់ឃើញថា ការបោះឆ្នោតជាតិតៃវ៉ាន់ខាងមុខ គឺមានជម្រើស ២ រវាង «ក្រុមអ្នកប្រជាធិបតេយ្យនិយម និងក្រុមនិយមលទ្ធិអំណាចអត្តាធិបតេយ្យ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ