ប្រធានាធិបតីក្វាតេម៉ាឡា ផ្តើមបំពេញទស្សនកិច្ចផ្លូវការនៅតៃវ៉ាន់
លោក Alejandro Giammattei ប្រធានាធិបតីក្វាតេម៉ាឡា បានអញ្ជើញទៅដល់ក្រុងតៃប៉ិ នៅថ្ងៃចន្ទទី ២៤មេសានេះ ដើម្បីបំពេញទស្សនកិច្ចផ្លូវរដ្ឋ។ ក្វាតេម៉ាឡា ជាប្រទេសក៏កម្រមួយនៅលើពិភពលោកដែលបន្តទទួលស្គាល់និងមានទំនាក់ទំនងការទូតជាផ្លូវការជាមួយតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:០២
ក្នុងពេលបំពេញទស្សនកិច្ចបួនថ្ងៃនៅលើកោះតៃវ៉ាន់ ដោយគិតចាប់ពីថ្ងៃចន្ទទី ២៤មេសានេះទៅ លោកប្រធានាធិបតីក្វាតេម៉ាឡា នឹងឡើងថ្លែងសុន្ទរកថានៅចំពោះមុខសភាតៃវ៉ាន់ ព្រមទាំងអញ្ជើញទៅទស្សនាក្រុមហ៊ុនបច្ចេកវិទ្យាមួយនៅភាគខាងត្បូងក្រុងតៃប៉ិ និងអញ្ជើញទៅចូលរួមក្នុងព្រឹត្តិការណ៍មួយ ដើម្បីលើកតម្កើងផលិតផលកាហ្វេក្វាតេម៉ាឡា។ នេះបើតាមសេចក្តីថ្លែងការណ៍លម្អិតរបស់ការិយាល័យប្រធានាធិបតីតៃវ៉ាន់។
ក្នុងកម្មវត្ថុពង្រឹងទំនាក់ទំនងការទូតជាមួយតៃវ៉ាន់ លោកប្រធានាធិបតី Giammattei បានប្រកាសប្រែក្លាយដំណើរទស្សនកិច្ចថ្ងៃនេះ ទៅជាសារដ៏ច្បាស់លាស់មួយផ្ញើជូនអន្តរជាតិថា គ្រប់ប្រទេសសុទ្ធតែមានសិទ្ធិស្វ័យដឹកនាំ។ ផ្ទុយពីចិនដែលប្រឹងធ្វើគ្រប់យ៉ាង ដើម្បីដាក់តៃវ៉ាន់ឱ្យកាន់ឯការ ក្វាតេម៉ាឡា ស្ថិតក្នុងចង្ក្រោម១៣ប្រទេសដែលទទួលស្គាល់និងមានទំនាក់ទំនងការទូតជាផ្លូវការជាមួយតៃវ៉ាន់។
ដោយគ្មានការភ្ញាក់ផ្អើល គ្រាន់តែឮដំណឹងស្តីអំពីទស្សនកិច្ចនេះភ្លាម ប៉េកាំង បានបញ្ចេញប្រតិកម្មអំពាវនាវឱ្យ រដ្ឋាភិបាលក្វាតេម៉ាឡា កុំជួយក្រុមឧក្រិដ្ឋជន កុំទៅជួបក្រុមប្រឆាំង ដែលនាំឱ្យប៉ះពាល់ដល់ប្រយោជន៍ផ្ទាល់ខ្លួន និងប្រយោជន៍របស់ប្រជាពលរដ្ឋក្វាតេម៉ាឡា។ ប៉ុន្តែសម្រាប់តៃវ៉ាន់ ប្រតិកម្មរបស់ចិន ជាសំដីដែលគ្មានទំនួលខុសត្រូវ ម៉ាក់ងាយទំនាក់ទំនងការទូតរវាងប្រទេសទាំងពីរផង និងប្រមុខរដ្ឋក្វាតេម៉ាឡាផ្ទាល់ផង។
សូមបញ្ជាក់ថា ទស្សនកិច្ចរបស់លោកប្រធានាធិបតី ក្វាតេម៉ាឡា ប្រព្រឹត្តទៅតែបីសប្តាហ៍ក្រោយទស្សនកិច្ចរបស់ ប្រធានាធិបតីតៃវ៉ាន់ លោកស្រី សៃ អ៊ីនវេន នៅតំបន់អាមេរិកឡាទីន ពោលគឺនៅ ក្វាតេម៉ាឡា និងបេលីហ្សេ។ នៅក្នុងតំបន់នេះ នៅសល់តែប្រទេសពីរគត់ ដែលបន្តមានទំនាក់ទំនងការទូតជាមួយតៃវ៉ាន់ ក្រោយពីហុងឌូរ៉ាស់ សម្រេចងាកទៅអោប ប៉េកាំង កាលពីខែមីនា២០២៣។
ចិនតែងចាត់ទុកតៃវ៉ាន់ជាខេត្តមួយរបស់ខ្លួនដែលត្រូវប្រើកម្លាំងក្រសោបយកវិញផងបើចាំបាច់ ហើយមិនអនុញ្ញាតឱ្យប្រទេសណាមានទំនាក់ទំនងការទូតជាមួយខ្លួនផងនិងតៃវ៉ាន់ផង ទន្ទឹមគ្នាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ