ប៉ាពូអាស៊ីនូវែលហ្គីណេ ចុះកិច្ចព្រមព្រៀងសហប្រតិបត្តិការសន្តិសុខជាមួយអាមេរិក
ថ្ងៃចន្ទ ទី២២ឧសភា រដ្ឋាភិបាលប៉ាពូអាស៊ីនូវែលហ្គីណេ បានចុះកិច្ចព្រមព្រៀងសហប្រតិបត្តិការសន្តិសុខ ជាមួយសហរដ្ឋអាមេរិក។ នេះគឺជាការបោះជំហានថ្មីមួយទៀត សម្រាប់ប្រទេសដ៏ធំជាងគេក្នុងតំបន់ប៉ាស៊ីហ្វិកនេះ ខណៈដែលសហរដ្ឋអាមេរិក កំពុងតែព្យាយាម រកទីសំចតវត្តមានកងទ័ពខ្លួន នៅក្នុងតំបន់នេះ។ ការពង្រឹងសមត្ថភាពកងទ័ពរបស់ចិននៅក្នុងតំបន់ប៉ាស៊ីហ្វិក បានធ្វើឲ្យអាមេរិក ព្រមទាំងប្រទេសដែនកោះមួយចំនួន មានការព្រួយបារម្ភ។
ចុះផ្សាយនៅថ្ងៃ៖
ស្តាប់ - ០២:៤៣
លោកនាយករដ្ឋមន្ត្រី James Marape បានលើកឡើងថា ទំនាក់ទំនងរវាងប៉ាពូអាស៊ីនូវែលហ្គីណេ និងសហរដ្ឋអាមេរិក បានបោះជំហានពីទំនាក់ទំនងសាមញ្ញទូទៅ ទៅជាទំនាក់ទំនងជាក់ច្បាស់ លើវិស័យសំខាន់។ ចំណែក លោកអង់តូនី ប្លីងកិន វិញ បានថ្លែងថា ប្រទេសទាំង២នឹងចាប់ដៃគ្នាកសាងអនាគត។
គួរបញ្ជាក់ថា កិច្ចព្រមព្រៀងសហប្រតិបត្តិការសន្តិសុខនេះ ត្រូវបានចុះហត្ថលេខាដោយលោករដ្ឋមន្ត្រីការបរទេសអាមេរិក និងលោករដ្ឋមន្ត្រីការបរទេសប៉ាពូអាស៊ីនូវែលហ្គីណេ នៅមុនពេលចាប់ផ្តើមបើកវេទិកាសហប្រតិបត្តិការប្រទេសដែនកោះតំបន់ប៉ាស៊ីហ្វិក។ វេទិកាលើកទី៣នេះ បានបើកទ្វានៅទីក្រុងកំពង់ផែ Port Moresby ដោយមានប្រទេសដែនកោះប៉ាស៊ីហ្វិកចូលរួមចំនួន ១៤ប្រទេស។
យោងតាមលោកនាយករដ្ឋមន្ត្រីប៉ាពូអាស៊ីនូវែលហ្គីណេ តាមរយៈកិច្ចព្រមព្រៀងសហប្រតិបត្តិការសន្តិសុខនេះ គឺប៉ាពូអាស៊ីនូវែលហ្គីណេ នឹងអនុញ្ញាតឲ្យកងទ័ពអាមេរិក អាចប្រើប្រាស់ដែនសមុទ្រ ដែលស្ថិតនៅកៀកបំផុតនឹងច្រកផ្លូវសមុទ្រអន្តរជាតិ ឆ្ពោះទៅកាន់ជប៉ុន និង អូស្ត្រាលី។ ជាថ្នូរវិញ អាមេរិកនឹងអនុញ្ញាតឲ្យប៉ាពូអាស៊ីនូវែលហ្គីណេ អាចប្រើប្រាស់ផ្កាយរណបតាមដានសន្តិសុខ។ លោកអង់តូនី ប្លីងកិន បានអះអាងថា កងទ័ពទាំងសងខាង អាចឡើងទៅលើនាវារបស់គ្នាទៅវិញទៅមក និងអាចចែករំលែកបទពិសោធន៍ការងារ ដើម្បីឈានទៅការពារយាមល្បាតដែនសមុទ្រ ឲ្យកាន់ល្អប្រសើរ។
សូមបញ្ជាក់ថា ព្រមជាមួយកិច្ចព្រមព្រៀងសហប្រតិបត្តិការសន្តិសុខនេះ សហរដ្ឋអាមេរិក បានផ្តល់កញ្ចប់ថវិកាចំនួន ៤៥លានដុល្លារ ជួយដល់ប៉ាពូអាស៊ីនូវែលហ្គីណេ នៅក្នុងយុទ្ធនាការប្រយុទ្ធប្រឆាំងបណ្តាញឧក្រិដ្ឋកម្ម ដោះស្រាយវិបត្តិអាកាសធាតុ ប្រយុទ្ធប្រឆាំងនឹងជំងឺស៊ីដា ព្រមទាំងទិញសម្ភារៈប្រើប្រាស់ខ្លះសម្រាប់កងទ័ព។
គួរកត់សំគាល់ថា កិច្ចព្រមព្រៀងសហប្រតិបត្តិការសន្តិសុខនេះ គឺមានខ្លឹមសារការពារព្រំដែនរបស់ប៉ាពូអាស៊ីនូវែលហ្គីណេ ខណៈដែលតំបន់ប៉ាស៊ីហ្វិក កំពុងតែរងនូវឥទ្ធិពលវាទទីរបស់កងទ័ពចិន។ យោងតាមអ្នកជំនាញ អាមេរិក កំពុងតែរកវិធី និងទីតាំងដើម្បីអាចមានវត្តមាន កុំឲ្យតំបន់នេះធ្លាក់ទៅក្នុងដៃចិនទាំងស្រុង។ យ៉ាងណាក៏ដោយ លោក James Marape បានអះអាងថា កិច្ចព្រមព្រៀងជាមួយអាមេរិកនេះ មិនមែនមានន័យថា ប្រទេសលោក បិទផ្លូវមិនធ្វើកិច្ចព្រមព្រៀង ជាមួយប្រទេសណាមួយផ្សេងទៀតនោះទេ។
ដោយឡែក លោកស្រី ម៉ៅ នីង អ្នកនាំពាក្យក្រសួងការបរទេសចិន បានប្រតិកម្មថា ចិនមិនទៅប្រឆាំងអ្វីជាមួយទំនាក់ទំនងទ្វេភាគី បែបសាមញ្ញ របស់ប្រទេសផ្សេងនោះទេ។ តែអ្វីដែលចិនសូមឲ្យប្រុងប្រយ័ត្ន គឺប្រយ័ត្នចំពោះពាក្យថា “សហប្រតិបត្តិការ” ដែលធាតុពិត គឺជាកលល្បិច ជាលេស ដើម្បីបម្រើល្បែង ភូមិសាស្ត្រនយោបាយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ