Sipri ៖ ចិនបង្កើនបរិមាណអាវុធនុយក្លេអ៊ែរ ខ្លាំងជាងគេ ក្នុងបរិបទតានតឹងពិភពលោក
ចំនួនសព្វាវុធនុយក្លេអ៊ែរ បានកើនឡើង នៅតាមបណ្តាប្រទេសជាច្រើន ជាពិសេសនៅក្នុងចិន។ ប៉ុន្តែមហាអំណាចនុយក្លេអ៊ែរផ្សេងទៀត ក៏បន្តធ្វើទំនើបកម្មសព្វាវុធរបស់ពួកគេខ្លាំងដែរ។ នេះបើតាមសេចក្តីពញ្ញាក់របស់ក្រុមអ្នកស្រាវជ្រាវ Sipri នាថ្ងៃ ចន្ទទី ១២ មិថុនា២០២៣។
ចុះផ្សាយនៅថ្ងៃ៖
ស្តាប់ - ០២:២១
ដំណើរចុះថយចំនួនអាវុធនុយក្លេអ៊ែរ នៅលើពិភពលោក ប្រហែលជាលែងមានហើយ។ នេះបើតាមប្រដាសន៍របស់លោក ដាន ស្មីត (Dan Smith) នាយកវិទ្យាស្ថានអន្តរជាតិស្រាវជ្រាវសន្តិភាពនៅស្តុកខុម ឬហៅកាត់ថាSipri។
បើតាមវិទ្យាស្ថាន ចំនួនក្បាលគ្រាប់នុយក្លេអ៊ែរ របស់ក្រុមប្រទេសមហាអំណាចនុយក្លេអ៊ែរទាំង៩លើលោក គឺ អាមេរិក រុស្ស៊ី អង់គ្លេស បារាំង ចិន ឥណ្ឌា ប៉ាគីស្ថាន អ៊ីស្រាអែល និងកូរ៉េខាងជើង សរុបចូលគ្នា មានត្រឹម១២៥១២ គ្រាប់ គិតត្រឹមដើមឆ្នាំ២០២៣ ទល់នឹង១២៧១០គ្រាប់កាលពីឆ្នាំ២០២២។ ប៉ុន្តែ ក្បាលគ្រាប់នុយក្លេអ៊ែរក្នុងស្តុក ដែលមានសក្តានុពលអាចប្រើបានភ្លាម មានចំនួនកើនឡើងដល់ ៩៥៧៩គ្រាប់ ពោលគឺច្រើនជាងឆ្នាំមុនដល់ទៅ ៨៦គ្រាប់។ សម្រាប់លោកនាយកវិទ្យាស្ថាន នេះមានន័យថា ចំនួនក្បាលគ្រាប់នុយក្លេអ៊ែរ អាចប្រើបាន កំពុងតែចាប់ផ្តើមកើនឡើងហើយ គ្រាន់តែនៅតិចជាងកាលពីទសវត្សរ៍ឆ្នាំ៨០ ដែលកាលណោះពិភពលោកមានសព្វាវុធប្រល័យលោកដល់ទៅ ជាង ៧ម៉ឺនគ្រាប់។ សូមបញ្ជាក់ថា នៅក្នុងការរាប់ចំនួនសព្វាវុធនុយក្លេអ៊ែរ វិទ្យាស្ថានSipri បែងចែងដាច់ពីគ្នា រវាងអាវុធនុយក្លេអ៊ែរក្នុងឃ្លាំងស្តុកសម្រាប់ប្រើប្រាស់ និងចំនួនសព្វាវុធសរុបដែលខ្លះចាស់ជ្រុលមិនអាចប្រើកើត ហើយត្រូវបំផ្លាញចោល។
លោកស្មីត បានលម្អិតទៀតថា ស្តុកនុយក្លេអ៊ែររបស់ឥណ្ឌា ប៉ាគីស្ថាន និងកូរ៉េខាងជើង ព្រមទាំងរុស្ស៊ី បានកើនតិចទេ គឺពី ៤៤៧៧ទៅ ៤៤៨៩គ្រាប់ តែចិនមានចំណែកបង្កើនចំនួនស្តុកក្បាលគ្រាប់នុយក្លេអ៊ែរ ខ្លាំងជាង គឺពីចំនួន៣៥០គ្រាប់ទៅ ៤១០គ្រាប់។ ហើយនៅឆ្នាំ២០៣៥ បើតាមការព្យាកររបស់ក្រសួងការពារជាតិអាមេរិកចេញផ្សាយកាលពីខែវិច្ឆិកា២០២២ ចិននឹងអាចមានក្បាលគ្រាប់នុយក្លេអ៊ែរចំនួន១៥០០គ្រាប់។
ចំណែកមហាអំណាចនុយក្លេអ៊ែរផ្សេងទៀត រក្សាបរិមាណស្តុកនុយក្លេអ៊ែរដដែល តែបន្តធ្វើទំនើបកម្មសព្វាវុធរបស់ខ្លួន។ ប៉ុន្តែកំណើនស្តុកនុយក្លេអ៊ែរ ទំនងជាមិនអាចបណ្តាលមកពីមូលហេតុមានសង្គ្រាមអ៊ុយក្រែនផ្ទុះឡើងទេ ព្រោះបើតាមលោកស្មីត ដើម្បីអភិវឌ្ឍក្បាលគ្រាប់នុយក្លេអ៊ែរមួយៗ គេត្រូវការប្រើពេលវេលាយូរជាចាំបាច់។ ម្យ៉ាងទៀត ប្រទេសទាំងនោះគ្មានពាក់ព័ន្ធដោយផ្ទាល់នឹងសង្គ្រាមអ៊ុយក្រែនទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ