រឿងកាត់បន្ថយអាវុធនុយក្លេអ៊ែរ អាមេរិកថា អ្វីៗអាស្រ័យលើការចូលរួមរបស់ចិន
នៅឆ្នាំ២០២៦ខាងមុខ កិច្ចព្រមព្រៀងគ្រប់គ្រងអាវុធនុយក្លេអ៊ែរ រវាងអាមេរិក និងរុស្ស៊ី នឹងត្រូវចប់សុពលភាព។ រដ្ឋាភិបាលអាមេរិក ធ្លាប់បានលើកឡើងថា ចង់រៀបចំកិច្ចព្រមព្រៀងថ្មី ដែលនឹងមានការចូលរួមពីសំណាក់ចិន។ យ៉ាងណាមិញ មន្ត្រីជាន់ខ្ពស់អាមេរិកម្នាក់ បានបង្ហើបឲ្យដឹងថា ក្នុងរឿងកាត់បន្ថយអាវុធនុយក្លេអ៊ែរ អ្វីៗ គឺអាស្រ័យទៅលើគោលជំហររបស់ចិន ដោយអាមេរិកមិនអាចធ្វើតែម្នាក់ឯងទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ដោយសុំមិនបញ្ចេញឈ្មោះ មន្ត្រីជាន់ខ្ពស់ម្នាក់របស់សេតវិមាន បានប្រាប់អ្នកកាសែតថា អាមេរិកអាចសុខចិត្តគោរព នូវកាតព្វកិច្ច ឬក៏ចូលរួម ក្នុងក្របខណ្ឌកាត់បន្ថយអាវុធ ល្គឹកណាទាល់តែមានចិនចូលរួមដែរ។ អ្វីៗគឺវាអាស្រ័យទៅលើការចរចាគ្នា ជាមួយភាគីចិន។ ទន្ទឹមគ្នានេះ មន្ត្រីអាមេរិករូបនេះ លើកឡើងថា អាមេរិក ក៏មិនភ្លេចអំពីបញ្ហារុស្ស៊ីដែរ បើទោះបីពេលនេះ អាមេរិកផ្តោតការយកចិត្តទុកដាក់ខ្លាំង ទៅលើបញ្ហាសព្វាវុធនុយក្លេអ៊ែររបស់ចិន។
មន្ត្រីអាមេរិកខាងលើ បានលើកឡើងថា គ្រឿងសព្វាវុធនុយក្លេអ៊ែររបស់ចិន បានរីកចំរើនយ៉ាងលឿនរហ័ស ទាំងផ្នែកគុណភាព សមត្ថភាព និងទាំងបរិមាណ។ សមត្ថភាពនុយក្លេអ៊ែររបស់ចិន គឺមានឥទ្ធិពលដោយផ្ទាល់ មកលើគោលនយោបាយរបស់រដ្ឋាភិបាលអាមេរិក ទៅថ្ងៃអនាគត។ ជានេះទៀត វាជះឥទ្ធិពល និងពាក់ព័ន្ធ ដោយផ្ទាល់ ជាមួយគោលនយោបាយសព្វាវុធនុយក្លេអ៊ែរ របស់មហាអំណាចនុយក្លេអ៊ែរផ្សេងទៀត មានដូចជា បារាំង អង់គ្លេស និងរុស្ស៊ីជាដើម។
ផ្អែកតាមមន្ត្រីអាមេរិករូបនេះ គឺរដ្ឋាភិបាលលោកចូ បៃដិន បានព្យាយាមទាក់ទងទៅខាងចិន ច្រើនដងហើយ ដើម្បីចាប់ផ្តើមនិយាយគ្នា រៀបចំឲ្យមានក្របខណ្ឌអន្តរជាតិគ្រប់គ្រងសព្វាវុធនុយក្លេអ៊ែរ។ ក៏ប៉ុន្តែ ទំនាក់ទំនងរវាងចិន និងអាមេរិក បានជួបបញ្ហារកាំរកូសខ្លាំងណាស់ នាពេលកន្លងមកនេះ ដែលធ្វើឲ្យគេពិបាកសង្ឃឹមថានឹងមានការចូលតុចរចាគ្នា។ យ៉ាងណាមិញ ថ្មីៗនេះ ភាគីចិនបានបដិសេធ មិនព្រមឲ្យមានជំនួបរវាងរដ្ឋមន្ត្រីការពារជាតិចិន និងរដ្ឋមន្ត្រីការពារជាតិអាមេរិកទេ។
សូមរំលឹកថា កិច្ចព្រមព្រៀងគ្រប់គ្រងក្បាលគ្រាប់នុយក្លេអ៊ែរ ឈ្មោះថា New Start រវាងរុស្ស៊ីនិងអាមេរិក គឺនឹងត្រូវចប់សុពលភាព នៅឆ្នាំ២០២៦ខាងមុខ។ ក្រោយពីបានបញ្ឆេះសង្គ្រាមឈ្លានពានអ៊ុយក្រែន លោកពូទីន បានសម្រេចឈប់អនុវត្តកិច្ចព្រមព្រៀងនេះ ជាឯកតោភាគី។ ភាគីអាមេរិកធ្លាប់បានអះអាងថា ខ្លួននៅតែហុចដៃ រងចាំទទួលភាគីរុស្ស៊ីជាថ្មី ដើម្បីនិយាយគ្នាអំពីយន្តការថ្មី ក្នុងការគ្រប់គ្រងគ្រឿងសព្វាវុធនុយក្លេអ៊ែរ។
ដោយឡែក គ្រឿងសព្វាវុធនុយក្លេអ៊ែររបស់ចិន ហាក់កំពុងតែធ្វើឲ្យមានការព្រួយបារម្ភជាខ្លាំង ដោយសារតែគេមានដំណឹងតិចតួចបំផុត។ យោងតាមវិទ្យាស្ថានសិក្សាស្តីពីសន្តិភាព នៅទីក្រុងស្តុកខូម គឺបច្ចុប្បន្នចិនមានក្បាលគ្រាប់នុយក្លេអ៊ែរចំនួន៣៥០គ្រាប់ ព្រោះគឺតិចជាងគេឆ្ងាយណាស់ ប្រើធៀបទៅរុស្ស៊ី ដែលមាន ៤៤៧៧គ្រាប់ និងអាមេរិកដែលមាន ៣៨០៨គ្រាប់។ ក៏ប៉ុន្តែ យោងតាមរបាយការណ៍មួយរបស់ក្រសួងការពារជាតិអាមេរិក គឺពីនេះដល់ឆ្នាំ ២០៣៥ ចិនអាចនឹងមានក្បាលគ្រាប់នុយក្លេអ៊ែរ ចំនួន១៥០០គ្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ